Porjedźenka
Krótkopowěsće (03.04.24)
Hódnoty běchu jutry přewysoke
Drježdźany. Njewšědne wjedrowe zjawy su minjeny jutrowny kónc tydźenja wobwliwowali, zdźěli wčera sakski wobswětowy zarjad. Njejasne njebjo je nimo procha z pusćiny Sahara tež mikroproch zawinował. Koncentracija procha bě na měrjenskich stacijach minjenu sobotu a njedźelu dnjowu hódnotu 50 mikrogramow na kubikny meter překročiła.
Prawidła spěšnišo předźěłać
Podstupim. Braniborski hońtwjerski zwjazk sej žada, zo maja so prawidła za zatřělenje problematiskich wjelkow spěšnišo předźěłać. „Zatřělenje wjelkow, kotrež su škody zawinowali, dyrbi rutina być“, wuzběhny jednaćel zwjazka Kai Hamann. Mjeztym drje je braniborske knježerstwo postajenja přeměriło, naćiski pak hišće we wuběrkach krajneho sejma wobjednawaja.
Aziatiski šeršeń so rozpřestrěwa
Z kmótřiskej całtu so zaběrali
Policija (02.04.24)
Bijeńca před hosćencom
Šunow. Po informacijach Zhorjelskeje policajskeje direkcije je w nocy na póndźelu před Šunowskej Fabrikskej hospodu k tak mjenowanemu zhromadnemu zranjenju ćěła dóšło. Skupina něhdźe wosom njeznatych je so něhdźe w 3 hodź. k hosćencej podała a z někotrymi hosćimi rozkoru započała. Spočatnje werbalne rozestajenje wuwjercholi skónčnje w bijeńcy, při kotrejž třoch młodostnych w starobje 18 do 21 lět zranichu, dweju z nich ćežko. Wuchowanska słužba dowjeze jeju do chorownje. Skućićeljo so do njeznateho směra zhubichu. Wo jich motiwje policiji dotal ničo znate njeje. Policija pad přepytuje a prosy wobydlerjow wo pomoc. Swědkojo, kotřiž su bijeńcu abo do toho werbalne rozestajenje wobkedźbowali, abo kotřiž móža snano pokiwy k podhladnym skućićelam podać, njech přizjewja so na Kamjenskim policajskim rewěrje pod telefonowym čisłom 03578 3520 abo na kóždym druhim policajskim rewěrje.
Nowa frakcija w měšćanskej radźe
Wojerecy (AK/SN). Frakcija AfD Wojerowskeje měšćanskeje rady so wot wosom na pjeć radźićelow pomjeńši. Tole zdźěli měšćanosta za šule, kulturu a socialne Mirko Pink na zašłym posedźenju měšćanskeje rady. Michael Ratzing, Toni Schneider a Marco Gburek su 19. měrca z frakcije AfD wustupili. Woni załožichu na to „Konserwatiwny wobydlerski zwjazk Wojerecy“ (KBH). Jeho předsyda je Michael Ratzing, zastupjer je Marco Gburek. Nowe wjednistwo frakcije AfD staj Detlef Degner jako předsyda a Sebastian Dömmel jako městopředsyda.
Krasna jutrońčka dušu hrěła
1 380 serbskich křižerjow poselstwo Zrowastanjeneho wozjewiło
Wostrowc (SN/at). Ze 74 křižerjemi, dwěmaj wjace hač loni, je so ekumeniski procesion wo dobry wusyw z Wostrowca do klóštra Marijineho doła podał. Nalětnje wjedro je tójšto přihladowarjow přiwabiło. Z katolskim fararjom Vinzenzom Brendlerom z Pirny a ewangelskim fararjom Thomasom Schädlichom z Huski jěchaštaj lětsa dwaj duchownaj sobu. Mjez wobdźělnikami wysoko na konju su ludźi znowa Zhorjelskeho krajneho radu Stephana Meyera wuhladali. Wosebitosć procesiona we Wostrowcu su křižerjo-trubjerjo. „Běchmy lětsa jědnaćo“, wjeseli so zamołwity procesiona Andreas Posselt.Njebjelčicy (SN/MiR). 51 křižerskich porow wotjěcha lětsa z Njebjelčic do Wotrowa. A runje telko nawróći so nawječor zaso do domjaceje wosady. Nowačkaj běštaj Tom Symank a Pius Cyž z Njebjelčic, slěbornej jubilaraj pak Tomaš Šwjeda a kantor procesiona Xaver Smoła. Po puću pozastachu křižerjo ke krótkemu nyšporej před rjenje pyšenej a ze swěčkami wobswětlenej kapałku w Jaworje.
Wulkotna nalada při Hrodźišku
Krótkopowěsće (02.04.24)
Hans-Joachim Meyer njeboh
Podstupim/Drježdźany. Prof. dr. Hans-Joachim Meyer, sakski minister za wědomosć a kulturu wot 1990 do 2002 w kabineće Kurta Biedenkopfa, je minjeny pjatk 87lětny zemrěł. Wón bě Serbam jara přichileny. Jeho ministerstwo je naćisk referentow za sakski Serbski zakoń zdźěłało. Wulke připóznaće zdoby sej Meyer tež w funkciji prezidenta Centralneho komiteja němskich katolikow.
„Křižerjo“ w sewjernej Čěskej
Mikulášovice. Někotre dźesatki swjatočnje zwoblěkanych jěcharjow na wupyšenych konjach su jutrownu njedźelu přez Milulášovice w Šluknowskim wuběžku ćahnyli. Tamniše „jutrowne jěchanje“, kotrež nawjazuje na dawnu tradiciju wuhnatych němskich wobydlerjow, su před 14 lětami wožiwili. Z toho časa nałožk wulku ličbu přihladowarjow z regiona přiwabi.
Nětko rejuja najmjeńši
Serbowka powołanje hladarki załožiła
Za swoje slědźenja mjez druhim wo pozabytej rjekowce, z Dobruše pochadźacej Mari Simo- nowej (1824–1877) je Čerwjeny křiž Němskeje Andréja Uebe z prěni raz wupisanym Mytom za stawizny Castiglione počesćił. Z lawreatom je so Axel Arlt wo tutych slědźenjach rozmołwjał.
Knježe Uebe, Wy dźěłaće jako hladar. Kak je tomu dóšło, zo sće sej slědźenje w stawiznach jako konik wuzwolił?
To bě wliw mojeho nana. Wón předsydarješe towarstwu čerwjeneho křiža w Beierfeldźe. Składnostnje 60. jubileja towarstwa w lěće 1969 je wón chroniku zestajał. Tuta je mje jara zajimowała, kaž tež stawizny. Sym hižo za čas NDR spytał wšelake temy rešeršować. To pak ze snadnym wuspěchom. Po přewróće smy styki k druhim muzejam čerwjeneho křiža nawjazali a 1996 ze skromnej zběrku muzej w Beierfeldźe wotewrěli.
Kak swoje temy namakaće? Wšako ta nastupajo Marju Simonowu runje před Wašimi chěžinymi durjemi njeleži.
Policija (28.03.24)
Dweju paduchow lepili
Kamjenc. Hnydom dweju paduchow su wutoru w Kamjenskej kupnicy lepili. Dopołdnja spytaše 39lětny Uzbeka słódčizny w hódnoće 75 eurow pokradnyć. Přistajeny kupnicy tole wobkedźbowaše a muža hromadźe z kuražěrowanym kupcom zadźerža. Podhladny so wjacore razy wutorhnyć spyta a woběmaj z namocu hrožeše. Jimaj pak so poradźi, jeho tak dołho kruće dźeržeć, doniž policija njepřijědźe. W druhim padźe je popołdnju 35lětny pólski staćan spytał, kofej w hódnoće 140 eurow pokradnyć. Tež jeho při tym wobkedźbowachu a zadźeržachu, jako chcyše kupnicu bjez zapłaćenja wopušćić. Zastojnicy Kamjenskeho policajskeho rewěra we woběmaj padomaj wotpowědne wozjewjenja wupisachu. Kriminalisća padaj přewzachu.
