Policija (29.01.19)

wutora, 29. januara 2019 spisane wot:

Kwětki kradnył

Kulow. Štóž je minjenu sobotu w Kulowje abo wokolinje kwětki darjene dóstał, ­by so radšo prašeć měł, zwotkel wone su. Dopołdnja mjenujcy měješe kwětkowy wobchod na Kulowskim Kolpingowym naměsće njeprošeny wopyt. Tam je nje­znaty kwěćel w hódnoće 13 eurow pokradnył. Předawarka runje žonu poradźowaše, jako muž do wobchoda zastupi, so skrótka rozhladowaše a so wotsali. Hakle na to zwěsćichu, zo kwěćel pobrachuje. Po wuprajenju předawarki bě muž něhdźe 180 centimetrow wulki, sylneje postawy a měješe blond, trochu kudźerjate włosy. Woblečeny bě žołto-zeleny kabat. Podobne wopisanje zdźělichu policiji z dalšeju kwětkoweju wobchodow na torhošću. Tam pak so mužej přiležnosć k padustwu skićiła njebě.

Literarna rozmołwa

wutora, 29. januara 2019 spisane wot:

Budyšin. Z diskusiju wo knize „Doma we wućekach“ z pjera Benedikta Dyrlicha pokročuje Zwjazk serbskich wuměłcow z rjadom swojich wuměłskich rozmołwow pod titulom „tracTare“ jutře, srjedu, we 18 hodź. w hosćencu „Tiroler Stuben“ na Lessingowej 1 w Budyšinje. Zawod do diskusije poda Dietrich Šołta. Na zarjadowanje njejsu jeničce čłonojo ZSW přeprošeni, ale tež dalši zajimcy.

Trochu mjenje ludźi

Kulow (SN). W běhu lěta 2018 je woby­dlerstwo města Kulowa wo 19 ludźi woteběrało. Kaž z ličbow z měšćanskeje radnicy wuchadźa, bydleše w měsće a jemu přisłušacych wsach kónc zašłeho lěta 5 764 ludźi. W Kulowje samym bě jich 3 391, lěto do toho hišće 3 416. Koćina ma nětko něšto mjenje hač 200 wobydlerjow, Klóšterska Nowa Wjes mjenje hač 80. Snadnje rozrostła je porno tomu ličba wobydlerjow w Hózku, Salowje, Brěžkach, Kulowcu a Dubrjenku.

Wjace družin a nowoplahowanja

póndźela, 28. januara 2019 spisane wot:

Při dundanju po Wojerowskej coologiskej zahrodźe móža wopytowarjo dokładnje 938 zwěrjatow w 129 družinach wuhladać. To je lětuša inwentura wunjesła, kotraž bě tamnišich sobudźěłaćerjow minjene tydźenje zaběrała.

Wojerecy (SN). Přirunujo z lětom 2017 maja we Wojerowskim coowje nětko wjace družin. „Tři nowe družiny ptačkow a štyri družiny cycakow móžemy ludźom předstajić“, praji nawoda zwěrjenca Eugène Bruins. Nimo pasowca (Gürteltier) Güntera a jeho partnerki Gwendolyn je to lěniwc (Faultier) Carlo. Loni su štyri pawy do coowa zaćahnyli, kotrež budu wot lětušeho widźeć.

Pola něhdźe dwaceći družin běchu loni při plahowanju wuspěšni. Najspektakularniši drje bě porod małych kubaskich krokodilow. Dorost mějachu tohorunja mjez druhim pola hadow, žorawjow, wopičkow, žabkow a kokošow. Wulki dźěl nowych wobydlerjow pak wotedachu­ zwěrjencam w Francoskej, Šwicarskej, Słowakskej a Danskej.

Krótkopowěsće (28.01.19)

póndźela, 28. januara 2019 spisane wot:

Změnja wotličenje

Drježdźany. Spěchowanske prawidła programa Leader budu přichodnje za priwatnych zajimcow a předewzaćelow jednoriše. Tak njetrjebaja přichodnje na­stupajo saněrowanje twarjenjow hižo žane­ wobličenja abo dopokazy swojich wudawkow zapodać. Předwidźane je, spěchowanje po kwadratnych metrach z wotpowědnej sumu wotličić. Změnu prawidłow je nětko sakski minister za ratarstwo Thomas Schmidt (CDU) wukazał.

Namołwa Łužiskeje aliancy

Wětošow. Z namołwu „Smy Łužica“ je so Łužiska alianca tele dny na wolerjow w Delnjej Łužicy wobroćiła, kotrymž su serbske naležnosće wažne. „Namołwjamy was, dajće Łužicy hłós tych ludźi, kotřiž­ tu běchu, su a budu! Dajće nam swoje mocy w regionalnopolitiskim zwjazkarstwje wjazać a rosć!“, tam mjez druhim rěka. Zdobom pozbudźeja zajimcow, při lětušich wólbach za parlamenty wšelakich runin kandidować.

Chce na němske wiki

Policija (28.01.19)

póndźela, 28. januara 2019 spisane wot:

Jandźel pěston kedźbował

Ćisow. Z dotal njeznateje přičiny je za­wčerawšim popołdnju 43lětna wodźerka wosoboweho awta na zwjazkowej dróze B 97 mjez Wojerecami a Njedźichowom při wotbóčce do Ćisowa na lěwy bok puća zajěła. Tam zrazy do dweju štomow, při čimž so ćežko zrani. 21 měsacow stare dźěćo měješe porno tomu kedźbliweho jandźela pěstona a wosta njezranjene. Wosobowe awto pak bě dospołnje skóncowane.

W duchu po Hornjej Łužicy

póndźela, 28. januara 2019 spisane wot:

Budyšin. Hač do nowembra 2019 poskića Budyske staroměšćanske towarstwo rjad zajimawych přednoškow. Jutře, wutoru, su stawiznisce zajimowani na turu „Kołowokoło Hornjeje Łužicy“ přepro­šeni. Pod mjenowanym hesłom přednošuje dr. Gabriele Lang wot 19 hodź. w Budyskej měšćanskej bibliotece. Wona wěnuje so wšelakim kónčinam Hornjeje Łužicy a zaběra so při tym z hornjołužiskim hraničnym wopismom z lěta 1241 runje tak kaž z dźělenjom Łužicy 1815. Zastup je darmotny.

Tójšto namjetow zapodali

Wojerecy. Za tak mjenowany wobydlerski etat města Wojerec 2019 je cyłkownje 180 namjetow do radnicy dóšło, nimale sto z nich z wokolnych wsow. Wot měšćanskeje rady zasadźena wosebita skupina měješe pruwować, kotre ideje předpisanym kriterijam wotpowěduja. Hladajo na mnóstwo namjetow dyrbješe so gremij wjacekróć zetkać. Tohodla móža hakle w februaru měšćanskej radźe li­sćinu předpołožić. Kotre namjety so na kóncu­ přesadźa, rozsudźa wobydlerjo sami.

7. lětnik Radworskeje wyšeje šule „Dr. Marja Grólmusec“ bě hač do wčerawšeho w sněhakowanskim lěhwje w Rugiswalde pola Neu­stadta. We wobłuku sportoweje wučby je tam 34 šulerjow pod dohladom šěsć wučerjow sněhakować wuknyło. Při dobrych­ wjedrowych wuměnjenjach mějachu wšitcy zhromadnje wjele wjesela. Foto: Diana Wowčerjowa

Na gmejnu čakaja ćežke časy

pjatk, 25. januara 2019 spisane wot:

Trjebin (AK/SN). Komplikowaneho hospodarskeho połoženja Trjebinskeje gmejny dla budźe přewšo ćežko, dwójny etat 2019/2020 nastajić. To rjekny komornica Carmen Petrick na zašłym posedźenju tamnišeje gmejnskeje rady. „Tež lětsa žane klučowe připokazanki Swobodneho stata Sakskeje njedóstanjemy. Nawopak, energijowemu koncernej Vattenfall dyrbimy přemysłowy dawk wróćić. Kelko to budźe, njeje dotal jasne. Nimo­ toho dyrbimy tež hišće swobodnemu statej tak mjenowany dawk bohatych płaćić“, wona na wurjadnej zhroma­dźiznje radźićelow rozłoži.

Přiwšěm su někotre naprawy trěbne, kotrež njemóža wobeńć. Tak mjenowaše Carmen Petrick nadróžne wobswětlenje w Trjebinku za 200 000 eurow, dalši wu­twar wopłóčkoweje syće za 900 000 eurow a wutwar šěrokopasmoweje syće za 630 000 eurow. Lětsa chcedźa znajmjeńša wopłóčkowu syć planować, spěšny internet ma klětu dotwarjeny być. Kaž komornica wuzběhny, wuńdźe Trjebinska gmejna dale bjez kreditow.

Diskusiju přepołoža do cyrkwje

pjatk, 25. januara 2019 spisane wot:

Hižo loni běchu diskusije wo mjezsobnym wobchadźe ludźi w Budyšinje wulki zajim wobydlerjow zbudźili. Na tym so po wšěm zdaću ničo změniło njeje, kaž planowany wječor pokaza.

Budyšin (SN/MWj). Kónc minjeneho lěta je Budyski wyši měšćanosta Alexander Ahrens (SPD) připowědźił, přewjesć diskusijne zarjadowanja, zo móhli woby­dlerjo wotewrjenje a konstruktiwnje zhromadnje wo towaršnosći w sprjewinym měsće rěčeć. W srjedźišću maja prašenja kaž Kak mjez sobu wobchadźamy?, Kak z druhim rěčimy?, Hdźe su hranicy? a dalše stać. Jako moderatora zdobychu Drježdźanskeho stawiznarja dr. Justusa Ulbrichta, kiž je za saksku krajnu cen­tralu za politiske kubłanje hižo wjacore diskusije koncipował a nawjedował.

Wo Wendlandźe w hospodźe

pjatk, 25. januara 2019 spisane wot:

Chrósćicy (SN). „Słowjenjo we Wendlandźe“ rěka tema, wo kotrejž porěči serbski rozhłosownik a muzejownik Werner Měškank­ jutře, sobotu, w 19.45 hodź. w Chróšćanskej putniskej hospodźe. Geografiske pomjenowanje „Wendland“ w Delnjej Sakskej wobswědča, zo tež zapadnje Łobja něhdy Słowjenjo sydlachu. Jich rěč mjenuja wědomostnicy „dra­wehnisch“ abo „drawehnopolabisch“. Přirjadowana je rěč bóle obodritskim kmjenam, sydlacym něhdy při Baltiskim morju, w Schleswigskej a zapadnej Mecklenburgskej, dyžli Serbam. Drjewjanšćinje najbliša dźensniša rěč je kašubšćina wokoło Gdańska w Pólskej. W lěće 1756 je wumrěła poslednja žona, kotraž je drjewjanšćinu jako swoju maćeršćinu rěčała. Z kultury wendlandskich Słowjanow zwostachu hač do dźensnišeho swójbne mjena, geografiske pomjenowanja, njewšědne mjena městow a wsow, swojorazna sydlenska forma kulowca, narodna drasta, wšelake nałožki a powěsće kaž tež ludowy spěw „Katü mes Ninka bayt?“ (Štó ma njewjesta być?).

nawěšk

nowostki LND