Kandidatka perspektiwu změnja
Wo wšelake poskitki so nětko spěšnje požadać
Biskopicy (SN/MiR). Socialne zarjadnišća wabja tuchwilu za wobsadźenje swobodnych městnow w socialnym dobrowólnym lěće a w zwjazkowej dobrowólnej słužbje (BFD). Tutej naprawje stej dobra składnosć sej swoje zamóžnosće wuwědomić abo so na nowy žiwjenski puć přihotować.
Dźěłowy kruh so zetka
Ze zhromadnej skazanku je tuńšo
Wjesne dobrowólne wohnjowe wobory Hamorskeje gmejny běchu w lěće 2020 prěnje w Zhorjelskim wokrjesu, kotrež su indiwiduelnje přiměrjenu drastu dóstali. Zo je nětko nowa trěbna, ma jara zwjeselacu přičinu.
Hamor (CK/SN). Škitnu drastu za wjace hač 42 000 eurow chce Hamorska gmejna za swoje dobrowólne wohnjowe wobory kupić. Přičina za to je jara zwjeselaca. Wot lěta 2020 je ličba wobornikow wo dohromady 29 přiběrała, to woznamjenja, zo maja dźensa 15 procentow wjace kameradow w aktiwnej słužbje hač před štyrjomi lětami, informuje nawoda hłowneho zarjada Arian Leffs. „To je wulkotny wuslědk, na kotryž chcemy nawjazać, mjez druhim tež z dźěłom w młodźinskej woborje“, wón praji.
Nakupowanišćo zachować
Wobydlerska zhromadźizna so z wikowanjom w měsće zaběrała
Wojerecy (AK/SN). Wobydlerjo Wojerec chcedźa nakupowanišćo Treff 8 napřećo klinikumej jako centralne zastaranišćo za přichod zachować. Wón ma potencial za dalše wuwiće. Nowe centralne wikowanišćo „Kinajchtska hola“ widźa woni kritisce. To je facit wobydlerskeje zhromadźizny wčera we Łužiskej hali, hdźež wobjednachu drobnowikowanje a koncept wikowanišćow. Na přeće wuběrka za měšćanske wuwiće je měšćanske zarjadnistwo zhromadźiznu zwołało. Něhdźe 420 wobydlerjow je přišło.
Termin dotwara šule přestorčeny
Zwjazuja kompjuterowu a serbsku rěč
Budyšin (SN/MiR). Na Budyskej Sukelnskej pola towarstwa „Dźěłań dźeń“ kaž tež w Serbskim domje pola projekta LUCIJA hraja nowe medije wažnu rólu. „Wěnujemy aktualnu dźěłarničku wuwiwanju aplikacijow“, rjekny projektowy koordinator LUCIJE Michał Cyž, „naš zaměr je, na hižo předležacym powjerchu swójske objekty a grafiki instalować.“ Kónčny produkt ma być wupłód zwjazanosće techniskich wuměnjenjow z fantaziju młodych ludźi, kotřiž so w koděrowanju wuspytaja. Z koděrowanjom dawaja młodostni programej přikazy, zdobom zwučuja so we wužiwanju kompjuteroweje rěče. „Nam słuži za to digitalna rěč Java Script, kotraž hodźi so tež za produkty w serbskej rěči wužiwać“, rjekny Feliks Šołta, referent dźěłarnički. Kilian Bjarš měni: „Sym hižo dołho na tym zajimowany wuslědźić, kak móžu w programach dźěłać.“ A Simon Herfurth rjekny: „Mje woprawdźe wabi swójsku aplikaciju wuwiwać.“ Wobaj so toho nadźijataj, zo budźe tónle pjatk na wobrazowce produkt widźeć, kotryž staj kóždy po swojim słodźe na hižo wobstejacej platformje wuwiłoj.
Krótkopowěsće (22.02.24)
Wustajeńca wo energiji
Hórnikecy. Kónc měsaca ma so w Hórnikečanskej Energijowej fabrice wustajeńca z titulom Power2Change – Mission Energiewende“ wotewrěć. Hač do 26. meje změja wopytowarjo składnosć, so intensiwnje z problemami a móžnymi rozrisanjemi na mjenowanu temu interaktiwnje rozestajeć. Samsny dźeń wotměwa so tam 10. Budyski Energijowy forum.
Žadaja sej měrowe jednanja
Kamjenc. Skupina prominentnych ludźi z Budyskeho wokrjesa sej wot zwjazkoweho knježerstwa iniciatiwu hromadźe z USA a druhimi wulkimi krajemi za měrowe jednanja Ruskeje a Ukrainy žada. Iniciatorojo su něhdyši krajny rada Michael Harig, Kamjenski wyši měšćanosta Roland Dantz, teologa Peter-Paul-Straube, lěkarka Ursula Straube a něhdyši wjesnjanosta Hodźija Peter Beer.
SLA digitalizuje twórby D. Kobjele
Za Fête de la Musique so přizjewić
We Łuze zwónicu za historiske zwony natwarili
Łuh. Za wojerskim pomnikom při wjesnym haće we Łuze su w minjenych měsacach postajili drjewjanu wěžu za tři historiske zwony, kiž pochadźeja z něhdyšeho ryćerkubła we wsy. Swoje městno mějachu tam w małej wěži na třěše knježeho konjenca. Roboćanam, kiž na ryćerkuble a wokolnych polach dźěłachu, wozjewjachu ze swojim zynkom něhdy započatk dźěła, přestawki a swjatok. Hdyž twarjenje z wěžičku srjedź 1970ych lětach zwottorhachu, składowachu zwony w zarjadnistwje wjesnjanosty. Po zagmejnowanju Łuha do Njeswačidła přewjezechu je na tamniši twarski dwór. Wo jich nawrót do Łuha je so nětko wjesne towarstwo Wittinghof z pomocu spěchowanskich srědkow postarało. Poslednje dźěła wokoło zwónicy w blišim času dokónča. Mjeztym historiske zwony zaso po wsy klinča a šestu, dwanatu kaž tež 18. hodźinu dnja wotbiwaja.
Trudla Malinkowa
