Njebjelčicy. Serbskopazličanske karnewalowe towarstwo přeprošuje sobotu, 10. februara, na druhi kapičkowy wječor aktualneje sezony do Njebjelčanskeje „Bjesady“. Do toho maja dźěći móžnosć k hejsowanju. Pjatk, 9. februara, swjeća w towarstwje žónske póstnicy. Tam budu najrjeńše kostimy mytować. Hižo minjenu sobotu su seniorojo gmejny karnewal woswjećili. Hinak hač na kapičkowych wječorach je tam dźěćaca škričkowa garda wustupiła.

Caren Lay přeprošuje na jězbu

Budyšin. Zapósłanča zwjazkoweho sejma Caren Lay (Lěwica) je dwudnjowsku busowu jězbu do Berlina na 21. a 22. februarje organizowała za kotruž je hišće swobodnych městnow. Jězba z busom, program, přenocowanje ze snědanju w hotelu a dalše zastaranje w hosćencu su dar­motne. Program wopřijima wopyt plenarneho posedźenja zwjazkoweho sejma a rozmołwu z Caren Lay. Přizjewjenje z mjenom, adresu, narodninami a tele­fonowym čisłom njech sćelu zajimcy na . Přenocować budu wobdźělnicy w stwach za dwě wo­sobje. Tuž je přizjewjenje za dweju radźomne.

Lessing by so dźiwał

Wětrow (ML/SN). Z powědančka „Row w holi“ serbskeje spisowaćelki Marje Kubašec je wučerka na wuměnku Elke Karbinski na lětušim prěnim literarnym kofeju we Wětrowskim wjacegeneraciskim zetkanišću čitała. Zarjadowanje bě přewšo derje wopytane, wšako hraje w powědce wopisany podawk w susodnym Łomsku.

W lěsu mjez Łomskom a dróhu mjez Njeswačidłom a Koslowom běchu nacionalsocialisća w Druhej swětowej wójnje pólskeho nućeneho dźěłaćerja powěsnyli. Wón je na Panošec ratarstwje słužił a měješe njedowoleny lubosćinski poměr ze serbskej holcu z Łomska. To běše přičina, zo bu k smjerći zasudźeny. Dźesatki pólskich nućenych dźěłaćerjow dyrbjachu wotprawjenju krajana přihladować.

Běła Woda podpěruje načasne digitalne wuhotowanje na swojich šulach

Běła Woda (AK/SN). Město Běła Woda stara so zaměrnje wo digitalizaciju swojich šulow. Hač do kónc lěta 2025 chce tři zakładne šule a jednu wyšu šulu z na­časnej digitalnej techniku wuhotować. Tole potwjerdźi wyši měšćanosta Torsten Pötzsch (Klartext), srjedu na posedźenju měšćanskeje rady. Radźićeljo su jednohłósnje wutwar elektriskeje a datoweje syće w Běłowodźanskej zakładnej šuli ­Pestalozzi wobzamknyli. Předewzaće ERF Elektro-elektronik tzwr Běła Woda ma trěbnu syć we wobłuku zwjazkoweho spěchowanja za digitalizaciju šulow we wysokosći 133 000 eurow instalować. Mjeztym je město jako nošer kubłanišća hižo tablety a dalšu techniku za wuhotowanje šule kupiło. „Hišće hač do lěta 2024 so na­prawy z „digitalneho pakta šula“ spěchuja. W Sakskej su spěchowanske pjenjezy hižo nimale dospołnje přetrje­bane“, Torsten Pötzsch zwurazni. W Běłej Wodźe su we wobłuku spěchowanskeho programa Zwjazka w etaće za lěto 2023 něhdźe 12 500 a za lěto 2024 něhdźe 121 600 eurow financielnych inwesticijow zaplanowali.

Arlette Nürnberger je w Kubšicach nowe towarstwo załožiła, kotrež w nuzy pomha. Tola – hinak hač sej mysliš – nic w prěnim rjedźe ludźom, ale zwěrjatam.

Kubšicy (UM/SN). Psy Ailika, Bartholomäus und Hummel so derje čuja. Su wotpinane. Přetož Ailika a Hummel stej psaj družiny American Staffordshire-Terrier, Bartholomäus je Rottweiler. Arlette Nürnberger pak trjeba jenož słowo rjec a psy hnydom stanu. Wone wědźa, zo póńdu hnydom won na čerstwy powětr. Za Kubšičanku a jeje štyri a połlětneho syna twori trójka psow „Kožuch zboža“. Pod tutym mjenom je wona towarstwo załožiła. Arlette Nürnberger je wukubłana trenarka psow. „Hižo jako dźěćo běch do swojeho poezijoweho albuma powołanske přeće ‚dompterka‘ ­napisała.“ A kaž dompter tež psyča trenarka ze zwěrjatami dźěła. Wona wšak kij a křud njewužiwa, ale dźěła skerje z lubosću a začućom. Předewšěm pak stara so wona wo ludźi, kotřiž chcedźa psa wodźić.