Informuja wo spěchowanju
Budyšin. Załožba za serbski lud přeproša wšitkich zajimowanych na prěnje informaciske zarjadowanje, na kotrymž chcedźa wšelake móžnosće spěchowanja předstajić, hladajo předewšěm na nowe směrnicy załožby k programej „Serbska rěč a kultura w strukturnej změnje“. Zarjadowanje budźe online a wotměje so jutře, štwórtk, w 17 hodź. Link wozjewja na internetnej stronje załožby. Wobdźělnicy změja móžnosć swoje prašenja wotbyć. Sobudźěłaćerjo załožby na nje rady wotmołwja.
Zběraja wěcne dary
Smochćicy. Hromadźe z Wenclec transportnym předewzaćom zběraja w Smochčanskim kubłanišću swjateho Bena wěcne dary za ludźi z Ukrainy, kotřiž su do Pólskeje a Rumunskeje ćeknyli. Dary přijimuja na parkowanišću za recepciju, a to wšědnje wot 8.30 do 17 hodź. Předewšěm proša wo sćěhowace wudźěłki: začinjene awtowe kašćiki za prěnju pomoc (tež wotběžane), zubne šćětki a pastu, spanske měchi za dźěći a dorosćenych, spódnju drastu (termo), pjelški, mydło, nuznikowu papjeru, suchu jědź za ćěšenki, měcy, šawle, rukajcy, nohajcy – wšo, štož ćopło dźerži. Čerstwe twory, wodu a druhu drastu njepřijimuja.
Połsta kilometrow pućować
Hórki/Radwor (SN). Dosć swojorazne a chětro naročne sportowe zarjadowanje serbscy młodostni tuchwilu přihotuja. Skupinka wokoło Radworčana Mateja Wjeńki a Hórčanki Leonie Matješkec planuje tak mjenowany „Slaviamarš“. Wotměć ma so tón 11. junija. Je to pućowanje nimo łužiskich honow a lěsow z Hórkow do Radworja na distancy 50 kilometrow w běhu dwanaće hodźin.
Při pućowanju njejedna so wo wubědźowanje. Jenički zaměr je so mentalnje a ćělnje wužadać, kaž organizatorojo zdźěleja. Woni skedźbnjeja w tym zwisku tež na sćěhi dwě lěće trajaceje koronapandemije bjez wjetšich sportowych zarjadowanjow, štož drje je so mjez mnohimi negatiwnje na motiwaciju wuskutkowało so sam abo sama k sportowanju přewinyć. „Swoboda a nadźija na žiwjenje kaž do wirusa pak nam zaso kiwatej. Je potajkim načasu, sej z nowej energiju zaso wjetše zaměry stajeć“, w zdźělence rěka.
Krótkopowěsće (09.03.22)
Rada wójnu na Ukrainje zasudźa
Podstupim. Braniborska Rada za naležnosći Serbow wójnu Ruskeje na Ukrainje zasudźa. Na swojim wčerawšim internetnym posedźenju schwalichu rezoluciju, w kotrejž rěka: „W zmysle měrniweho zhromadneho žiwjenja w Europje apelujemy wójnu hnydom skónčić, so k jednanjam wróćić a nańć rozrisanje za wobaj słowjanskej ludaj.“
Incidenca lědma změnjena
Budyšin. Niwow incidency w Hornjej Łužicy je lědma změnjeny. Roberta Kochowy institut poda dźensa za Budyski wokrjes hódnotu 1 161,4, za Zhorjelski 869,3. Wokrjes Budyšin informowaše wčera wo 408 natyknjenjach z koronawirusom. Mjez 724 nowonatyknjenymi we wokrjesu Zhorjelc je 150 dźěći. Ličba w hornjołužiskich chorownjach lěkowanych schorjenych powjetši so na 182.
Pomoc ćěkancam na A4
Policija (08.03.22)
Štyri pincy wurumowali
Budyšin. Wjaceswójbny dom w Budyšinje na hasy Při rězarni su sej njeznaći minjeny kónc tydźenja jako cil wupytali. Kaž policija rozprawja, zadobychu so woni do štyrjoch pincow. Pokradnyli su mjez druhim štyri awtowe kolesa, mountainbike a wšelki grat. Hódnota rubizny wučinja něhdźe 2 500 eurow. Nimo toho nasta 50 eurow wěcneje škody.
Wulke wjeselo we Worklecach
Zběraja pjenjezy
Wobmyslenja techniki dla
Zarjadniski zwjazk při Klóšterskej wodźe dóstanje nowe ćišćaki
Chrósćicy (JK/SN). Přistajeni zarjadniskeho zwjazka Při Klóšterskej wodźe maja w Pančicach-Kukowje wot lońšeho nowe a lěpše dźěłowe wuměnjenja. Wšako běchu tamniše běrowowe twarjenje na Póstowej wobšěrnje ponowili. Za to trjebaja nětko tež nowe ćišćaki respektiwnje nowe zrěčenje z firmu, kotraž so wo nje stara. Zamołwita za personal Gabriela Mikelowa rozłoži na minjenym posedźenju zarjadniskeho zwjazka pozadk aktualnych prócowanjow. Najebać digitalizaciju a načasne składowanje dokumentow a podłožkow je trjeba wotpowědne ćišćaki měć. Zrěčenje z firmu, kotraž je so dotal wo to starała, wuběži. A tak dyrbja za nowym posłužbowarjom hladać. Po tym zo bě so dźewjeć firmow za wupisany nadawk zajimowało, je jenož jedna poskitk wotedała, a to dotalna firma. Wšitke tamne techniskich a dodawanskich problemow dla poskitk wotedać njemóžachu.
Dźěl Ludoweho domu zrumowany
Běła Woda (CK/SN). Na Běłowodźanskim Ludowym domje so zaso něšto hiba. Nic z ćežkej techniku, ale wobhladniwje z ruku su sobudźěłaćerjo Trjebinskeje firmy dźěl wonkowneje fasady dospołnje skóncowaneje žurle zrumowali. Zbytk wonkowneje fasady na wysokosć přizemja zawěsća nětko z hrjadami wotnutřka, runje tak nabóčne sćěny. Po žadanju pomnikoškitneho zarjada dyrbjachu dźěl murje z woknami zawěsćić, zo móhli pozdźišo wšitko zaso natwarić.
Při wulkim wohenju loni 25. apryla so Ludowy dom chětro wobškodźi. W oktobru je twarska nawodnica města Dorit Baumeister rozłožiła, kak chcedźa dale postupować. Plan předwidźeše, twarske wotpadki zrumować a fasadu wotnutřka stabilizować. Ručež budźe financowanje jasne, móhli firmy započeć, tehdy rěkaše. Město Běła Woda pak dyrbješe za pjenježnym přemosćenjom pytać, dokelž bě hižo loni nazymu wotwidźomne, zo zawěsćernja za twarjenje płaćić nochce.
Profijojo a lajkojo za Ukrainu
Budyšin (SN). Surowa wójna na Ukrainje a z njej zwjazane ćerpjenje ukrainskeje ciwilneje ludnosće wuskutkuje najwšelakoriše pomocne iniciatiwy. Zo by ukrainski lud podpěrała, přewjedźe Towaršnosć za spěchowanje Serbskeho ludoweho ansambla beneficnej koncertaj. Nimo wuměłcow SLA tež serbske lajske skupiny sobu skutkuja. Dochody koncertow, moderěrowaneju wot Diany Fryčec-Grimmigoweje, přepokazaja na socialnu załožbu „St Wolodymyr Fonds“ ukrainsko-katolskeje cyrkwje. Wona pomha ćěkancam a ludźom, kotrymž je wójna škodu načiniła.
Próstwu chcedźa hišće lětsa zapodać
Hamor (AK/SN). Gmejna Hamor prócuje so dale wo strowotniski centrum, zo móhli wobydlerjow wobstajnje lěkarsce zastarować (SN rozprawjachu). To podšmórny tamniši wjesnjanosta Achim Junker (CDU) na wčerawšim posedźenju gmejnskich radźićelow. „Chcemy ručež móžno próstwu wo spěchowanje sakskemu ministerstwu za regionalne spěchowanje we wobłuku strukturneje změny zapodać“, Junker rozłoži.
Hamorski strowotniski centrum ma přichodne pjeć lět nastać. Do twarjenja na Diesterwegowej měli mjez druhim domjacy lěkarjo, zubny lěkar, fyzioterapija a apoteka zaćahnyć. „Pozadk je, zo našej domjacaj lěkarjej za něšto lět na wuměnk póńdźetej. Tohodla dyrbimy na přichod přihotowani być. Čujemy so runje za našich mnohich staršich wobydlerjow zamołwići“, Junker wuswětli. Hišće lětsa chcedźa próstwu za projekt zapodać a najpozdźišo 2024 twarić započeć. Wuwićowa towaršnosć Delnjošleska Hornja Łužica gmejnu podpěra.
