Budyšin. Štóž ma zajim na rěčnym kursu čěšćiny wot 22. julija do 19. awgusta w Praze abo wot 14. awgusta do 5. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: wina.de). Wotpowědny formular a dalše informacije su na internetnej stronje pod „Nowosće“ přistupne.
Jězbne plany znowa změnili
Budyšin. Znowa su jězbne plany w Budyskim wokrjesu změnjene a přiměrjene. Zamołwići reagowachu tak na skóržby a pokazki sobujěducych. Wot nětko płaćiwych změnow profituja předewšěm šulerjo. Potrjecheni móža so na internetnej stronje wobchadneju zaměroweju zwjazkow ZVON abo VVO kaž tež w aktualnych powěsćach wokrjesa wobhonić. Mjez druhim změnili su čaru 790 Kamjenc–Chrósćicy–Ralbicy. Ale tež liniji 503 Budyšin–Wulka Dubrawa a 780 Wojerecy–Kulow–Rakecy stej potrjechenej. Tuchwilu zamołwići hišće dalše pokazki z wobchadnymi předewzaćemi přepruwuja a wothłosuja.
W bydlenju křesło zapalił
Budyšin. W swojim bydlenju na Budyskej Jordanowej je 46lětny muž w nocy na njedźelu křesło zapalił a bydlenje na to wopušćił. Pytnywši kur alarmowachu druzy wobydlerjo domu wohnjowu woboru, kotraž woheń zhaša. Zranił so nichtó njeje. 46lětneho policija w bliskosći lepi a zaja.
Njebjelčicy (JK/SN). To měješe hórki přisłód, štož so na posedźenju Njebjelčanskeje gmejnskeje rady minjeny štwórtk wotmě. Pytnyć bě, zo su fronty mjez wjesnjanostu Tomašom Čornakom (CDU) a radźićelemi stwjerdnjene. To samo hosćom napadny. Planowar Andreas Stowasser wupraji swoje zadźiwanje wo wašnju mjezsobneho wobchadźenja w gmejnskej radźe. Sam je gmejnu w lěće 2019 cyle hinak, mjenujcy wotewrjenu a z towaršliwej naladu zeznał.
Husto su so Budyske demonstracije přećiwo naprawam korony do nadregionalnych medijow dóstali a tam skerje negatiwny wobraz sprjewineho města zawostajili. Iniciatiwa „Budyšin w zhromadnosći“ je ćichej wjetšinje wobydlerstwa hłós dała a znamjo za solidarnu zhromadnosć za čas pandemije sadźiła. Peticija ma mjeztym wjace hač 47 000 podpismow a na ćichim rjećazu swěčkow po sprjewinym měsće je so minjeny pjatk něhdźe 850 ludźi wobdźěliło. Je to wulki wuspěch. Jako so před tachantskej cyrkwju hromadźachmy mi znaty powědaše, zo jeho kuzenk w Freibergu telko zboža nima. Tež tute z Budyšinom přirunajomne město bě akciju „Zusammenstehen. #Deutschland gemeinsam“ přewjedło. Tam pak je so na podobnej demonstraciji jenož 50 ludźi wobdźěliło a tež peticiju je jenož něhdźe 5 000 ludźi podpisało. To je wězo zrudne. Ćim bóle mje změruje, zo w Budyšinje ciwilna towaršnosć hišće funguje.
Cordula Ratajczakowa
Ličba natyknjenjow dale přiběra
Budyšin. Incidenca po Roberta Kochowym instituće je dźensa w Budyskim wokrjesu na 533,9 a w Zhorjelskim na 676,1 stupiła. Minjeny pjatk rozprawješe wokrjes Budyšin wo 219 natyknjenjach z koronawirusom a štyrjoch w tymle zwisku zemrětych pacientach. We wokrjesu Zhorjelc bě to 323 infekcijow a runje tak štyri smjertnych padow.
Lěwica žada sej konsekwency
Budyšin. Frakcija Lěwicy w Budyskim wokrjesnym sejmiku ma wuprajenja 1. přirjadnika krajneho rady Uda Wićaza (CDU) składnostnje demonstracije přećiwnikow šćěpjenja minjenu póndźelu „za jasnu namołwu prawo łamać“. Frakcija krajneho radu Michaela Hariga a krajnu direkciju namołwi na to reagować. Wot CDU w Budyskim wokrjesu wočakuje jasne stejišćo wopačneho jednanja jeje móžneho kandidata za wólby krajneho rady dla.
Zdarma na njewšědnych městnach
Chrósćicy. Serbski filmowy wječor wo dóńće Jurja Rjenča za čas stalinizma dožiwja zajimcy jutře, sobotu, w 19.45 hodź. w Chróšćanskej putniskej hospodźe. Filmowy pask „Stalin, Tito a mój nan“ spyta wujasnić, čehodla bu serbski prawiznik Jurij Rjenč 1950 wot němskeje kriminalneje policije zajaty a za čo bu wot sowjetskeho wójnskeho tribunala w Drježdźanach k 25 lětam jastwa zasudźeny. Cyły čas swojeho zajeća a po tym je spytał wotmołwu na prašenje namakać: „Štó je mje přeradźił a za čo sym dyrbjał do jastwa?“ Hakle po politiskim přewróće w NDR dósta wón wotmołwu, po tym zo bě Benedikt Cyž w Moskowskim archiwje tajneje ruskeje słužby „Ljubljance“ slědźił. Benedikt Cyž přinjese film sobu a rady tež wo pozadkach diskutuje. Wšitcy su wutrobnje witani. Prawidła 2G a zapisanja kontaktnych datow dla njech trochu prjedy přińdu.
Rejwanje za dźěći
Smě nětko tři měsacy nóžkować
Zhorjelc. Wjace hač dwójce tak spěšne kaž dowolene bě předwčerawšim awto typa Mercedes, kotrež lepichu při měrjenju spěšnosće na awtodróze A 4 pola Zhorjelca. Wot kontrolowanych 1 800 jězdźidłow bě 154 přespěšnje po puću. 36 z nich dóstanu warnowanje, 118 pak pokutu. Rekord docpě wodźer čěskeho Mercedesa. Jeho błysknychu při dowolenych 80 km/h ze 165 km/h. Muž dyrbi nětko pokutu 800 eurow płaćić, dóstanje dwaj dypkaj w Flensburgu a dyrbi tři měsacy nóžkować.
Chrósćicy (SN/MWj). Wobšěrnje je Chróšćanska gmejnska rada wčera wo přichodnym statusu swojeho wjesnjanosty diskutowała. Runja tamnym komunam zarjadniskeho zwjazka Při Klóšterskej wodźe dyrbja rozsudźić, hač měł gmejnski šef přichodnje dale čestnohamtsce abo hłownohamtsce skutkować.
Wuraznje wjesnjanosta Marko Kliman prošeše, njezwjazać diskusiju z jeho wosobu. Přiwšěm widźi wón we hłownohamtskosći lěpšiny. Na přikład móhł so wjesnjanosta wo wjace spěchowanja starać, a dźěło w gremijach by jednoriše było. Tež swójba by z toho profitowała. Najwjetši zadźěwk je, zo by komuna wob lěto něhdźe 70 000 eurow wjace trjebała. A te njebychu wot nikoho přidatnje dóstali, ale dyrbjeli je sami zwjesć. Bjez dźiwa, zo Kliman pod tuchwilnymi wuměnjenjemi žanu nadźiju na hłownohamtskeho wjesnjanostu njewidźi.
Němcy (AK/SN). Wjesne srjedźišćo Němcow lětsa znowa wuhotuja, kaž je Wojerowska měšćanska rada na swojim wutornym posedźenju jednohłósnje wobzamknyła. Projekt płaći nimale poł miliona eurow. Štwórćinu płaći město, 75 procentow su spěchowanske srědki z programa za wjesne wuwiće Sakskeje.
Plan předwidźi staru wohnjowobornu gratownju spotorhać. Někotre ležownosće Při Halštrowskim dole dóstanu nowy přijězd. Puć k wjesnemu zarjadnistwu tak pomjeńša, zo nastanu tři parkowanske městna. W južnym dźělu při swjatym křižu je městno z ławku předwidźane, hdźež budu na přikład kolesowarjo pozastać móc. Wulke wrota maja na typiske serbske statoki dopominać. Před wjesnym zarjadnistwom chcedźa swjedźensku městnosć wutworić. Nimo toho dóstanje twarjenje zarjadnistwa nowy přistup, kotryž budu tež ludźo z handicapom wužiwać móc. Wot chódnika při busowym zastanišću powjedźe nowa šćežka, hdźež so křižerjo hromadźa.