Ministerka Giffey wotstupiła
Berlin. Po diskusijach wo móžnym wotpóznaću doktorskeho titula je zwjazkowa swójbna ministerka Franziska Giffey dźensa wotstupiła. Kaž jeje ministerstwo zdźěli, bě Giffey zwjazkowu kanclerku Angelu Merkel (CDU) prosyła, ju ze zastojnstwa pušćić. Giffey je wot lěta 2018 swójbna ministerka a wot lońšeho předsydka Berlinskeje SPD. Wona kandiduje za wyšu měšćanostku stolicy.
Wot jutřišeho click & meet
Budyšin. Podkročeneje ekstremneje hódnoty koronainfekcijow dla smědźa w Budyskim wokrjesu wot jutřišeho štwórtka dotal zawrjene wobchody zaso za kupcow z terminom a dnjowoaktualnym negatiwnym testom (click & meet) wotewrěć. We wokrjesu zličichu hač do wčerawšeho jědnaće natyknjenjow a jedyn smjertny pad. Incidenca po RKI je dźensa 58,0. Wokrjes Zhorjelc rozprawješe wčera wo 88 infekcijach a štyrjoch zemrětych, incidenca tam je dźensa 102,1.
Nowy blog Domowiny
Slepo (JoS/SN). Hnydom dwě wustajeńcy w Slepjanskim Serbskim kulturnym centrumje (SKC) tuchwilu na wopytowarjow čakatej. Přehladku Uty Stastny ze Slepoho, kotruž běchu 1. nowembra 2020 wotewrěli, je jenož horstka zajimcow widźała, dokelž dyrbjachu SKC 2. nowembra zaso zawrěć. Mjeztym wisaja wobrazy Uty Stastny w nowowuhotowanej galerijowej chódbje, hdźež wone hač k znowawotewrjenju SKC wostanu. Galerijowu chódbu zwoprawdźichu dźakowano spěchowanskim srědkam z programa „Nowostart kultura“.
Tež jutrowna wosebita wustajeńca Carole Stauber a Rainera Grosy takrjec wotpočuje. Wobaj pokazujetaj na wšelakore wašnje debjene jutrowne jejka. „Tale pokazka wostanje dale we witrinach, a to tak dołho, doniž tule zaso normalne žiwjenje njeknježi. Jutrowne jejka dźě móžeš sej kóždy čas wobhladać, nic jenož jutry“, praji nawodnica SKC Sylwija Panošina.
Z policajskim čisłom jězdźił
Oberlichtenau. Při kontroli mopeda předwčerawšim w Oberlichtenauwje so policisća njemało dźiwachu. Na jězdźidle bě wopačne čisło přičinjene, mjenujcy tajke, kotrehož kombinacija pismikow „DD-Q“ je zasadnje za policajske jězdźidła w Swobodnym staće Sakskej rezerwowana. Dokelž bě moped nimo toho tak přetwarjeny, zo by trochu spěšniši był, jón zastojnicy sćazachu. 17lětny wodźer změje so nětko mjez druhim falšowanja wopismow a přeńdźenja přećiwo zakonjej wo winowatostnym zawěsćenju dla zamołwić. Zwotkel wón policajske čisło měješe, njeje znate.
Wulka Dubrawa (CS/SN). Z móžnym rozšěrjenjom terena biosferoweho rezerwata Hornjołužiska hola a haty su so čłonojo Wulkodubrawskeje gmejnskeje rady na swojim zašłym posedźenju zaběrali. Teritorij, 1997 w jeho dźensnišej formje wutworjeny, dyrbja mjeztym nowelěrować, rozłoži dr. Jan Peper ze zarjadnistwa biosferoweho rezerwata. Z dohromady 59 wsow přisłuša škitanej kónčinje tež dźesać z gmejny Wulka Dubrawa. W jeje radźe, kotrejž wšitcy wjesnjanosća přisłušeja, su wo rozšěrjenju hižo rěčeli. Jako wosebje škitanja hódne wobhladuja tři na dźensniše hranicy rezerwata mjezowace kónčiny. Jónu je to sprjewina nižina wokoło Delnjeje Hórki, kotraž saha hač do Załhowa (Salga) a Klukša a je tuž teritorij Wulkodubrawskeje gmejny. Płonina je něhdźe 260 hektarow wulka. Dalša kónčina, kotraž by wot rozšěrjenja potrjechena była, je 100 hektarow wulki teritorij wokoło wětrnikoweje hory pola Brěmjenja. Tón wopřijima jako wosebitosć orchidejowu łuku. Třeća kónčina stej tak mjenowany motorowy hat a pěskowa hora pola Chrósta (Crosta) z cyłkownej płoninu je 19 hektarow.
15. meje je so lětuša kupanska sezona při Bjerwałdskim jězoru zahajiła. Tež tam maja ludźo škitne postajenja korony dla dodźeržeć. To samo kontroluja, kaž bě nětko słyšeć.
Hamor (CK/SN). Při temperaturje dwanaće stopnjow drje tuchwilu jenož ći najzmužićiši do Bjerwałdskeho jězora du. Dowolene pak je to wšitkim. Wšako je so kupanska sezona po koronowych předpisach 15. meje zahajiła. Z profesionelnym rjedźenjom su minjeny tydźeń 7,5 hektarow wulke pobrjóžne wotrězki za tekstilne kupanje, FKK a psy pola Hamora, Delnjeho Wujězda a Klětnoho přihotowali. Hač do hłubokosće 20 centimetrow su wšón pěsk přesali a tak zbytki cigaretow, wěka piwowych blešow a dalši drobny njerjad wufiltrowali. Gmejna Hamor płaći za to štyricyfrowu sumu pjenjez.
W běhu sezony sobudźěłaćerjo komunalneho twarskeho zawoda wšědnje na pobrjoze papjeru, bleše a wotpadki zběraja. Dokładne rjedźenje wotměwa so kóždej dwě lěće. Tak wobstajnje to při tamnych wodźiznach łužiskeje jězoriny hišće njepřewjeduja.
Chwaćicy (ES/SN). Na Chwačanskej cyrkwi K dobremu pastyrjej dyrbjachu hižo před dlěšim časom zwěsćić, zo so wot wobkromy fasady wěže dźěle wobmjetka pušćachu a dele padachu. Zo bychu strachej za wopytowarjow Božeho domu a kěrchowa wotwobarali, dyrbjachu jednać. W nowembru 2019 zapoda wosada twarsku próstwu, zo móhli fasadu wěže saněrować dać. Před lětom, w juniju 2020, dóstachu wotpowědnu dowolnosć a runočasnje pjenježnu přiražku Ewangelsko-lutherskeje krajneje cyrkwje Sakskeje.
Minjeny tydźeń započachu při cyrkwinej wěži róšty twarić, kotrež sahaja hač k wotkapej (Traufe). Dźěła wukonja na to specializowana firma z Goldbacha pola Biskopic. Za ponowjenje wěže dyrbja w Chwaćicach dohromady 129 000 eurow wudać. Z toho dóstanu něhdźe 96 000 eurow z programa Leader w kónčinje Hornjołužiskeje hole a hatow spěchowane. Zbytk dyrbi wosada ze swójskich srědkow zwjesć.
Wot štwórtka wolóženja
Budyšin. Incidenca po Roberta Kochowym instituće je dźensa w Budyskim wokrjesu ze 97,1 sedmy dźeń za sobu pod 165. Tak smědźa wot štwórtka dźěćace dnjowe přebywarnje z krutymi skupinami a wosobami zaso wotewrěć a šule prezencnu wučbu poskićeć. Hač do wčerawšeho zwěsćichu tu 14 natyknjenjow z koronu a dwaj smjertnej padaj. Zhorjelski wokrjes rozprawješe wo pjeć nowoinfekcijach a wo třoch smjertnych padach. Incidenca po RKI je tam dźensa 91,4.
Pytaneho dwójnika popadnyli
Drježdźany/Berlin. Nimale połdra lěta po spektakularnym padustwje juwelow ze Zeleneho wjelba w Drježdźanach su nětko wšitkich njeskutka podhladnych popadnyli. Na raciji je policija wčera wječor pytaneho dwójnika ze znateho clana arabskeho pochada w bydlenju w Berlinje-Neukölnje zajała. 22lětny je mjeztym w Drježdźanach, hdźež měješe sudnik dźensa wo jatbje rozsudźić.
Rěčny docent dźěło nastupił