Brězowka (AK/SN). Wobě komunalnej dźěćacej dnjowej přebywanišći w gmejnje Dźěwin (Groß Düben) – „Baćonjace hnězdo“ w Brězowce a „Wroblace hnězdo“ w Dźěwinje – po zawrjenju w decembru korony dla nětko zaso dźěłatej. To potwjerdźi wjesnjanosta Helmut Krautz (SPD) na wčerawšim posedźenju gmejnskeje rady. „Wot spočatka lěta wšitke kubłarki zaso dźěłaja. Chcemy wotewrjenske časy ručež móžno rozšěrić, zo móhli starši lěpje planować.“ Tuchwilu maja tam jenož nuzowe zastaranje, kotrež płaći za staršich w powołanjach, za system relewantnych. Zastaranje dźěći z jědźu je zawěsćene. W dalokej měrje stabilne su staršiske popłatki. „Wostanjemy dale pod popłatkami, kotrež w Slepom zběraja“, Krautz wčera podšmórny.
Poslednje dny stareho a prěnje dny noweho lěta su na mnohich městnach składnosć, na dźěło minjenych dwanaće měsacow zhladować. Serbske Nowiny rozhladuja so po dwurěčnych komunach, što su tam wšo zdokonjeli.
Njebjelčicy (JK/SN). Zo je Njebjelčanska gmejna jara aktiwna, dźe-li wo to, wožiwić wjesne žiwjenje abo wjeski gmejny na žiwjenjahódne městnosće wukmanić, je daloko a šěroko znate. Tež loni su w tym nastupanju najebać wobmjezowanja koronapandemije dla aktiwni byli. Hižo nalěto stej zaběžałoj iniciatiwa za kubłanje na wsy kaž tež akcija politiskeho kubłanja pod hesłom „Rozmołwa na městnje – Talk vor Ort“, kotruž zhromadnje z Budyskej ludowej uniwersitu a Sakskej krajnej centralu za politiske kubłanje organizuja. Dobre a wjele lubjace zazběhi wobeju naprawow pak njemóžachu pandemije dla dale wjesć. Kaž wjesnjanosta Tomaš Čornak (CDU) wobkrući, chcedźa, ručež zaso normalita do towaršnostneho žiwjenja zaćehnje, z akcijomaj pokročować.
Towarstwo Witajće do Budyšina je loni po swójskim podaću dosć derje na dobro migrantow a „za integraciju, kulturnu wuměnu a wotewrjenu towaršnosć“ skutkowało. Hač móže lětsa runje tak wuspěšnje dźěłać, pak tuchwilu jasne njeje.
Budyšin (SN/bn). „Dźakujemy so wšěm, kotřiž su nas loni financielnje, materielnje a ideelnje podpěrali. Lěto 2020 bě wobćežny čas z tójšto wužadanjemi a njewočakowanymi wuwićemi. Přiwšěm je so nam poradźiło, integraciju ćěkancow we wokrjesu Budyšin pohonjeć“, rěja w zdźělence předsydstwa.
K loni wuspěšnje wukonjanym nadawkam towarstwa Witajće do Budyšina słuša na přikład serwis tak mjenowanych rěčnych srědnikow. Z nim podpěruja migrantow při tym, „jich naležnosće a zajimy zrozumliwje zwuraznić, mjez druhim w zwisku ze zarjadami, w šulskim wobłuku abo pola lěkarja“.
Dale wjele natyknjenjow
Budyšin. We wokrjesu Budyšin su wčera 300 dalšich koronainfekcijow zwěsćili, šěsć pacientow w starobje 79 do 94 lět je zemrěło. Aktualnje je 2 741 natyknjenych (+233), mjez nimi 163 (+25) w chorowni. Indicenca na 100 000 wobydlerjow wučinja tu 433,3. W Zhorjelskim wokrjesu registrowachu samsny dźeń 231 natyknjenjow, wosom smjertnych padow a indicencu 390,54.
Zetkanje FDP lětsa hinaše
Budyšin. Tradicionalne zetkanje FDP na Třoch kralow w Budyšinje budźe lětsa koronakrizy dla hinaše hač hewak. Dokelž nochcedźa zarjadowanje wupadnyć dać, wotměja lětuše 15. hornjołužiske zetkanje na Třoch kralow zajutřišim, njedźelu, wot 10 do 11.30 hodź. na facebookowej stronje sakskeje FDP, kaž Budyski wokrjesny zwjazk strony informuje.
Južna Čěska swójsce postupuje
Dźěwin (AK/SN). Z informaciskimi taflemi w formje přirodoweje wučbneje šćežki su loni teren wokoło Dźěwinskeho lěsneho jězora polěpšili a jemu wjetšu kwalitu dali. Na to skedźbnja Slepjanske wudźerske towarstwo w swojim zhladowanju na lěto 2020. Natwarili su tafle wo domjacych reptilijach a amfibijach, wo štomach, wo domjacych spěwatych ptačkach, wo zwěrinje na wodźe a při njej kaž tež wo domjacych brukach a mjetelach. Spěchowany bu projekt ze srědkami załožby Doma w Slepom.
Nawodnica hłowneho zarjada Slepjanskeje gmejny Marion Mudrina je předewzaće skutkownje podpěrała. Wo techniske zwoprawdźenje staraše so Knut Olbrich z Běłowodźanskeje wabjenskeje firmy. Nastajili su tafle čłonojo wudźerskeho towarstwa. „Dźakować chcu so našemu wudźerskemu zwjazkej Połobski Florenc za grafiki rybjacych wobrazow a za wučbnu taflu wo wudźenju. Hdyžkuli mějachmy prašenja, su nam pomhali“, praji předsyda Slepjanskeho towarstwa André Krupper.
Sćěna pomórana była
Rakecy. Při bywšim nakupowanišću na Nowowjesnjanskej dróze w Rakecach su njeznaći sćěnu z barbu pomórali. Na pismo podobny wobraz ćehnješe so po dołhosći dwanaće metrow. Wobsadka policajskeho awta je wěcne wobškodźenje předwčerawšim připołdnju wuhladała. Dokelž barba hišće dospołnje sucha njebě, wuchadźeja zastojnicy z toho, zo běchu skućićeljo hakle krótko do toho tam „podźěłali“. Kelko škody woni ze swojim móranjom na prózdnym twarjenju načinichu, njehodźi so dotal wobličić.
Budyšin. W poslednje dny stareho lěta připósłanej wotpadkowej protyce Budyskeho wokrjesa su so zmylki zadobyli. Kaž krajnoradny zarjad zdźěli, potrjechi to nimo Biskopic tež gmejny Halštrowska Hola, Bukecy, Rakecy a Wóspork. Tak změnja so na přikład za Halštrowsku Holu terminy wotwožowanja čorneho wotpadkoweho sudobja, w Bukecach žołteho sudobja a w Rakecach módreho sudobja za staru papjeru. Aktualizowanu protyku w potrjechenych komunach žanu njedóstanu. Změny zdźěla přez hamtsku nowinu wokrjesa. Terminy we wotpadkowej app su prawe.
Pytaja wobrazy za kalender
Wojerecy. „Moje najlubše městno we łužiskej jězorinje“ rěka hesło fotoweho wubědźowanja tamnišeho Leaderoweho regiona, kotrež su tele dny zahjili. Wubědźowanje traje hač do awgusta. Zaměr je, zestajeć wobrazowu protyku wo łužiskej jězorinje za přichodne lěto. 13 najrjeńšich wobrazow mytuja. Zajimcy njech sćelu swój foto na adresu .
Trjebin (AK/SN). Přichodnje změje Trjebinska gmejna eksterneho społnomócnjeneho za datowy škit. To je wčera wjetšina jeje radźićelow rozsudźiła. Nadawk přewozmje Lipšćanska prawizniska towaršnosć KSMD, zastupjena přez prawiznika dr. Sebastiana Schmucka. Z nim su pawšalny měsačny honorar 190 eurow dojednali.
Po słowach wjesnjanosty Waldemara Locke (CDU) běchu dotal z datowym škitom salopnje wobchadźeli. Nastork bě jemu posedźenje radźićelow w decembru. Tehdy wón namjetowaše, zo měła gmejna Trjebin z Łužiskeho kruha wustupić, štož parlamentownicy na kóncu wotpokazachu. Do toho běchu woni list rěčnikow kruha dóstali z próstwu, přećiwo tomu hłosować. Locke pak wo tym ničo wědźał njeje. „Sposrědkować daty gmejnskich radźićelow bjez přihłosowanja kóždeho jednotliwca njeje dowolene a woznamjenja zranjenje wosobinskich prawow“, wjesnjanosta wčera argumentowaše. Tohodla wabješe wón za społnomócnjeneho za datowy škit.
Nukničanska jolka je kóžde lěto prěni wjeršk zabawnych serbskich swjedźenjow. Lětsa pak je tež wón wot pandemije potrjecheny, a wšitko budźe hinak. Tež njedawne wabjenje bě njezwučene.
Nuknica (mdź/SN). Lětsa su přihoty na jolku tróšku hinaše. Prawidłownje so organizaciski team online schadźuje – a to hižo někotre tydźenje. Zhromadne zetkanja dźě tuchwilu móžne njejsu, digitalny puć přihotow je tuž dobra alternatiwa. „Mamy tójšto dźěła“, praji sobuorganizator Jakub Brězan z Prawoćic. „Na njedawnym zetkanju smy wo tym rěčeli ludźom wuwědomić, zo so jolka-swjedźeń přiwšěm wotměje, jenož na hinaše wašnje. A zo dyrbimy za prěni wulki serbski podawk lěta wabić.“ Tak je mjez druhim ideja nastała, z wabjenskim Trabijom po Łužicy jězdźić, k tomu z připowěšakom, na kotrymž stej wulkej tafli z datumom a napisom „jolka“ čitać byłoj. Samo serbska chorhojčka z nabóčneho wokna hladaše. Na swojej silwesterskej jězbje bě Jakub Brězan 50 kilometrow po Serbach z „jolka-trabijom“ po puću.