Pjenjezy za nowotwar wěste
Hač dosrjedź lěta 2023 ma pěstowarnja „Milenka“ dotwarjena by
Slepo (AK/SN). W srjedźišću Rownoho ma hač dosrjedź lěta 2023 nowa Witaj-pěstowarnja „Milenka“ w nošerstwje Slepjanskeje gmejny nastać. Tamniši radźićeljo su wčera tři planowanske nadawki inženjerskim běrowam přepodali, a to za tepjenje a sanitarne, za elektroinstalaciju a za statiku. „Wjeselimy so, zo mamy za to kompetentnych partnerow, kotřiž su hižo za gmejnu dźěłali“, rjekny nowy wjesnjanosta Jörg Funda (CDU).
Mjeztym je tež financowanje nowotwara zaručene. Nowe dźěćace přebywanišćo płaći dohromady něhdźe dwaj milionaj eurow. Z toho zaruna Swobodny stat Sakska 1,66 milionow eurow. 22. decembra dósta gmejna pjenjezy přizwolene. Tamny dźěl płaćitej energijowy koncern LEAG (250 000 eurow) a Zhorjelski wokrjes (75 000 eurow). Gmejna Slepo ničo přidać njetrjeba.
Napohlad wsy so bytostnje změnił
Poslednje dny stareho a prěnje dny noweho lěta su na mnohich městnach składnosć, na dźěło minjenych dwanaće měsacow zhladować. Serbske Nowiny rozhladuja so po dwurěčnych komunach, što su tam wšo zdokonjeli.
Pančicy-Kukow (SN/MWj). To prěnje, štož Pančičansko-Kukowskemu wjesnjanosće Markusej Kreuzej (CDU) do mysli přińdźe, hdyž na lěto 2020 zhladuje, je, zo bě to přewšo spodźiwne lěto ze wšitkimi wobmjezowanjemi, kotrež běchu a su ludźom přeco hišće napołožene. „Přiwšěm smy něštožkuli docpěli, štož móžeš předewšěm wonkownje widźeć. Zdźěla je jara dołho trało, prjedy hač hodźeše so to zwoprawdźić“, praji Kreuz našemu wječornikej.
Wot dźensnišeho su w křesćanskich wosadach a swójbach bože ...
Krótkopowěsće (06.01.21)
Natyknjenja zaso přiběraja
Budyšin. Koronanatyknjenja w Budyskim wokrjesu zaso přiběraja. Wokrjesny strowotniski zarjad informowaše wčera wo dalšich 269 padach, nimale 4,5 króć telko kaž póndźelu. Sydom pacientow w starobje 80 do 99 lět je zemrěło. Incidenca bě wčera 418. 202 nowoinficěrowaneju, jědnaće smjertnych padow w zwisku z koronu a incidencu 372,34 mějachu w Zhorjelskim wokrjesu.
Platforma znowa njepřistupna
Drježdźany. „Techniske problemy“ su po informacijach sakskeho ministerstwa za kultus přičina mylenjow na kubłanskej platformje LernSax. Wčera njebě strona docyła přistupna a njehodźeše so hač do dźensnišeho připołdnja běžnje wužiwać. LernSax je wosebje tuchwilu wot doma wuknjacym wažna platforma, na a z kotrejž wšědnje přerěznje 80 000 šulerjow dźěła.
Wo Europje jako domiznje
Wotpadkowe sudobja so palili
W lěsu znjezbožiłoj
Wulka Chójnica. Ćežke lěsne njezbožo je so minjenu sobotu we Wulkej Chójnicy (Großkunitz) w Kubšiskej gmejnje stało. Při štomypušćenju bu tam 56lětny muž wot štoma zatłusnjeny. Wohnjowi wobornicy a wuchowanscy pomocnicy jeho wuswobodźichu. Z helikopterom dowjezechu jeho do chorownje, hdźež pozdźišo zemrě. Dalšu zranjenu wosobu móžachu na městnje lěkarsce zastarać.
Biblioteka zawrjena
Wojerecy. Aktualneho strowotniskeho połoženja dla wostanje Wojerowska biblioteka Brigitty Reimann po wšěm zdaću hač do 16. januara zawrjena. Swojich wužiwarjow skedźbnjeja na to, zo so tuchwilne wupožčenje medijow tak dołho podlěši, doniž biblioteka zaso njewočini. Přidatne wudawki z toho žane njenastanu. Štóž chce knihi a dalše medije wróćić, móže je do přihotowanych boksow połožić, kotrež su wot póndźele do pjatka stajnje wot 8 do 15 hodź. přistupne.
Městno za nowe domy
Policija (05.01.21)
W nocy koleso pokradnył
Kulow. Hnydom prěnju njedźelu w nowym lěće je njeznaty w Kulowje wužił a tam koleso pokradnył. Kaž policija zdźěli, zadoby so wón předwčerawšim něhdźe w 3 hodź. na Wojerowskej dróze do wobchoda a spakosći z njeho mountainbike w hódnoće 2 500 eurow. Kedźbliwa swědka to pytny a alarmowaše policiju. Skućićelej so přiwšěm poradźi so z karbonowym kolesom typa Kellys zminyć. Policisća na městnje wšitko trěbne přepytachu a su pokradnjene koleso mjezynarodnje k pytanju wupisali. Přisłušna kriminalna słužba nětko za skućićelom a rubiznu slědźi.
Wopłóčki a šula ćežišći byłoj
Hospodarske połoženje Łazowskeje gmejny wostawa komplikowane
Łaz (AK/SN). Lěto 2020 bě za gmejnu Łaz w mnohim nastupanju ćežke, ale přiwšěm wuspěšne, kaž wjesnjanosta Thomas Leberecht (CDU) bilancuje. „Móžachmy wjacore projekty a naprawy dale wjesć, započeć abo dokónčić“, wón wróćo zhladujo rozłožuje. Jedne z ćežišćow bě wopłóčkowy koncept. We Wulkich Ždźarach přizamknychu domjacnosće na Rachlowskim puću, dalše w Nowej Bukojnje (Neubuchwalde) kaž tež w Koblicach na pódlanskich pućach. Dohromady inwestowachu nimale połdra miliona eurow. We Wulkich Ždźarach su zakładnu šulu dale saněrowali. Po wšěm zdaću hač do februara 2022 budu šulerjo hišće w kontejnerach wuknyć dyrbjeć. Tak dołho ma nutřkowny wutwar trać. Tuchwilu přewjeduja tam trěbne torhanske dźěła.
Wo čajach tež serbsce poradźujetaj
Kamjenc (SN/MWj). Štóž je sej za nowe lěto předewzał, swojemu ćěłu něšto dobre popřeć a přiwšěm kaž asket žiwy njebyć, za toho je snano Kamjenski čajowy kontor na Budyskej dróze prawa adresa. Tam mjenujcy Kralec mandźelskaj Petra a Joachim ze Smjerdźaceje mjeztym hižo wosom lět najwšelakoriše čaje z cyłeho swěta poskićataj a swojich kupcow tež serbsce poradźujetaj. Tehdy bě wjelelětna mějićelka na wuměnk šła, a Kralec mandźelskaj staj wobchod přewzałoj.
Dźensa drje poskićujetaj wonaj tež oliwowe wolije, palency, whisky, rum a słódčizny, čaj pak je hłowny wobstatk jeju předewzaća. Paleta je přewšo wobšěrna a hodźi so jeno ćežko zjimać. Něhdźe 200 družin čajow je w Kamjencu w poskitku. Wone pochadźeja z Nepala, Japanskeje a Chiny runje tak kaž z Afriki a Južneje Ameriki. Tež zelowe a płodowe čaje z Europy a zdźěla z Němskeje w jednotliwych tyzach na polcach wuhladaš.
Kubłanišćo najwjetše předewzaće
Poslednje dny stareho a prěnje dny noweho lěta su na mnohich městnach składnosć, na dźěło minjenych dwanaće měsacow zhladować. Serbske Nowiny rozhladuja so po dwurěčnych komunach, što su tam wšo zdokonjeli.
Kubšicy (CS/SN). Přewšo wulke wužadanje za Kubšisku gmejnu loni bě nowotwar Bošečanskeje zakładneje šule přihotować. Za to dyrbjachu na přikład transport šulerjow do nachwilneje šule na Lubijskej dróze w Budyšinje organizować a přewodnikow šulerjow namakać. Nimo toho mějachu kompjuterowy kabinet do nachwilneho kubłanišća přeměstnić. Runočasnje mějachu so plany za dźěła na starym městnje dale wjesć. Wot 21. septembra přihotowachu twarnišćo, tydźeń pozdźišo su dźěle šulskeho domu torhać započeli.
