Krótkopowěsće (23.12.20)
Dale na wysokim niwowje
Budyšin. Wysoki niwow nowonatyknjenjow z koronawisusom do hód njepopušći. W Budyskim wokrjesu zwěsćichu wčera 278 dalšich padow, dźesać pacientow w starobje 71 do 98 lět je zemrěło. Schorjenych je 2 796 (-51), z nich w klinice 154 (-4) lěkuja. Wokrjes Zhorjelc rozprawješe wčera wo 249 nowoinfekcijach a dalšich sydom smjertnych padach. Tamniša incidenca je 644,97, Budyska 658,3.
Hodowne hudźbne widejo
New York. „Christmas Time is Here“ je titul noweho hudźbneho wideja Caroliny Eyckec. Spěw z lěta 1965, kotryž staj Vince Guaraldi a Lee Mendelson za wosebite telewizijne wusyłanje „A Charlie Brown Christmas“ skomponowałoj, je serbska hudźbnica za teremin a hłós aranžowała. Přidatnje je tež karaoke-wersiju na swojim Youtube-kanalu wozjewiła.
Za wotewzaće njewotewrjeć
Budyšin. Wobchody njesmědźa wotewrjeć, zo bychu tam kupcy do toho online skazane twory wotewzali. Tomu přizwolić je Sakske wyše zarjadniske sudnistwo Budyšin wčera wotpokazało. W chwatnym jednanju sudnicy rozsudźichu, zo je jenož wobchodam a wikam wšědneje potrjeby a zakładneho zastaranja dowolene wotewrjeć.
Stróžu a Trupin přizamknu płunowej syći
Rakecy (JK/SN). Rakečanska gmejna je so w swojimaj wjesnymaj dźělomaj Stróži a Trupinje wobydlerjow naprašowała, hač chcedźa swoju domjacnosć płunowej syći přizamknyć dać. Přewažna wjetšina wobydlerjow móhła sej předstajić, wužiwać přichodnje zemski płun za tepjenje a tohorunja za warjenje. Za zastaranje z trěbnym płunom poskićatej so dwě předewzaći: ENSO a Kulowska EVSE (energijowe zastaranje Čorny Halštrow). Woprawdźe zaručić pak móže jenož EVSE stabilne přizamknjenje na syć a wobstajne zastaranje. Kaž ENSO napřećo gmejnje Rakecy zwurazni, leži jeje płunowa syć předaloko preč wot mjenowaneju wsow. Syć zastaraćela EVSE pak je poměrnje bliska, a tak njeby problem był wjesce syći přizamknyć.
Policija (22.12.20)
Wuchowanske awto znjezbožiło
Rakecy. Wobchadne njezbožo, na kotrymž bě wuchowanske awto wobdźělene, je so wčera popołdnju w Rakecach stało. Jězdźidło bě tam z Wojerec do směra na Budyšin po puću, jako na amplowym křižowanišću wotprawa VW na hłownu dróhu wujědźe. Wobaj šoferaj njemóžeštaj zražce hižo zadźěwać. Přiwołani dalši wuchowarjo, policisća a wobornicy zastarachu sobujěducu we wosobowym awće a dowjezechu ju do chorownje. Tuchwilu njeje jasne, hač je VW snano při čerwjenej ampli křižowanišćo přeprěčić chcył. Wuchowanske awto njebě w zasadźenju a tež žanoho pacienta njeměješe. Wone pak bu chětro wobškodźene a njeje najprjedy raz zasadźomne.
Spěšnje so testować dać
Wusměrja pěstowarnju na sport
Budyšin (CS/SN). Nawodnica noweje Budyskeje pěstowarnje na Třělnišću Nicole Laue so hižo na wotewrjenje kubłanišća wjeseli. Někotři čłonojo Budyskeje měšćanskeje rady porno tomu so z tym spřećelić njemóža, zo budźe zarjadnišćo wjele dróše hač spočatnje planowane. Na swojim zašłym posedźenju mějachu woni wo přidatnych wudawkach 100 000 eurow rozsudźić. Te su jako wěsta rezerwa myslene, zo móhli twar dokónčić.
Hrodźišća z čaru zwjazaja
Na kromje Wotrowa nowe dwurěčne tafle připrawili
Wotrow (SN/MWj). Kamjenski Muzej zapadneje Łužicy je wčera swój projekt „Archeologiska hrodźišćowa čara Hornjeje Łužicy“ zwoprawdźeć započał. Při 16 hrodźišćach Budyskeho wokrjesa nastajeja nětko wobšěrne informaciske tafle w němskej a serbskej rěči. Start bě wčera při Wotrowskim hrodźišću. Tam je minjene tydźenje Měrko Pohonč dotalne informaciske tafle při hornim a delnim zachodźe hrodźišća wotšrubował, stajadła wurjedźił a pomolował. Nimo toho su wón a čłonojo bywšeje wjesneje rady a Wotrowska młodźina schód na hrodźišćo ponowili a ławki nastajeli. Bě to projekt we wobłuku sakskeho fondsa „Čiń sobu!“, kotryž bě Wotrowčan loni zapodał a přizwoleny dóstał, zo móhł stare tafle ponowić. Hakle pozdźišo so wukopa, zo planowaše Kamjenski Muzej zapadneje Łužicy hrodźišćowu čaru a tohorunja nowe tafle. Tak hodźeše so za Wotrow woboje zwjazać.
W radnicy hodowny dar dóstałoj
Kedźbliwe wóčko měć
Plan šulskeje syće wobzamknjeny
Zhorjelc. Njedostatkej wučerkow a wučerjow wotpomhać wostanje wažne ćežišćo dźěła Zhorjelskeho wokrjesa. To wuchadźa z njedawno wobzamknjeneho wokrjesneho plana šulskeje syće. Wokrjes Zhorjelc wuznawa so kruće k tomu, serbsku rěč spěchować a sylnić. „K tomu zdobom słuša, šule přesahowacy koncept 2plus na Slepjanskej zakładnej a wyšej šuli dale wjesć. Ze šulskimaj direktoromaj kaž tež z Domowinu wusko hromadźe dźěłamy. Cil wostanje: Wšitke dźěći w Němsko-serbskim šulskim centrumje Slepo měli na kubłanišću aktiwnu serbsko-němsku dwurěčnosć docpěć, a to najebać zakładny rěčny niwow“, podšmórny nawodnica šulskeho a sportoweho zarjada Zhorjelskeho wokrjesa Marlies Wiedmer-Hüchelheim na wuradźowanju wokrjesneho sejmika. Tón je na to jednohłósnje „dźělny plan šulskeje syće za powšitkowne šule wokrjesa Zhorjelc“ wobzamknył. Krajny rada Bernd Lange (CDU) rěčeše wo jasnym wotumje. Tak je wokrjes jednanjakmany.
Krótkopowěsće (22.12.20)
Incidenca dale nad 600
Budyšin. Po kóncu tydźenja zwěsćichu w Budyskim wokrjesu wčera 90 dalšich koronainfekcijow, šěsć pacientow je wumrěło. Aktualnje schorjenych je 2 847 (-237), w klinikach lěkuja 158 (+5). Wo dźewjeć nowonatyknjenjach a 19 dalšich smjertnych padach informowaše póndźelu Zhorjelski wokrjes. Incidenca wučinja tam 634,68, w Budyskim wokrjesu 664.
Přiwozmu wopomnišćo w Swóńcy
Drježdźany. Załožba sakskich wopomnišćow prócuje so wo nošerstwo wopomnišća na česć woporow eutanazije w Swóńcy (Großschweidnitz), kaž je to jeje załožbowa rada minjeny pjatk wobzamknyła. Sakske knježerstwo ma krokej hišće přihłosować. Hromadźe z wopomnišćom Pirna-Sonnenstein nasta tak w mjenowanej załožbje fachowy zwjazk za přeslědźenje nacionalsocialistiskeje eutanazije a k wopominanju jeje woporow.
Akt přećiwo serbskej kulturje
