Wot dźensnišeho płaća krućiše škitne naprawy
Wokrjes Zhorjelc bě hižo póndźelu připowědźił, zo płaća dale wulkeje ličby zwěsćenych nowonatyknjenjow z koronawirusom dla wot dźensnišeho štwórtka krućiše škitne naprawy. Dokelž chcetej hornjołužiskej wokrjesaj jednotnje postupować, je Budyski wokrjes wčera wječor tež za swój teritorij razniše postajenja wozjewił.
Budyšin (SN/at). Z 357 zwěsćenymi nowoinfekcijemi docpě koronapandemija w Budyskim wokrjesu wčera swój dotalny wjeršk. Paralelnje su w krajnoradnym zarjedźe wot dźensnišeho płaćiwy powšitkowny wukaz dopřihotowali. Wšako bě hódnota 200 nowoinfekcijow w času sydom dnjow na 100 000 wobydlerjow wot 1. nowembra wšědnje překročena, kaž zarjadnistwo pisa.
Krótkopowěsće (10.12.20)
Dźiwadźelnica prěnjeje hodźiny
Budyšin. Serbska dźiwadźelnica Ludmila Nawka je wutoru w starobje 91 lět w Budyšinje zemrěła. To wobkrući Němsko-Serbske ludowe dźiwadło. Nawka skutkowaše wot 1949 do 1958 w Serbskim ludowym dźiwadle pod intendantom Janom Krawcom. Jako jeho NDRska wyšnosć wotsadźi, so tež jeje karjera přetorhny. Po staciji w Zwickauwje bě wona sufleza Budyskeho NSLDź.
Hač do kónca februara zawrjene
Drježdźany. Sakske statne muzeje a dźiwadła wostanu hač do kónca februara 2021 koronapandemije dla zawrjene. Na to je so wčera sakska ministerka z kulturu a turizm Barbara Klepsch (CDU) ze zastupjerjemi institucijow dojednała, kotrež su w nošerstwje swobodneho stata. Srjedź januara chcedźa znowa jednać, hač je časowy plan dodźeržomny abo hač ma so dale přiměrić.
Nowa CD z pophudźbu
Pyramida znamjo nabožneho a narodneho zmyslenja
Salow (aha/SN). Byrnjež njedorěčane było, pěstuja Šunow, Sulšecy a Salow rjanu adwentnu zhromadnosć. W prěnjej wsy wuhladaš boži narodk, w druhej swěčkowy wobłuk a w Salowje pyramidu. Wobkuzłacy to napohlad před 1954 poswjećenej kapałku. Zo tam pyramida mjeztym 22 lět ludźi zahorja, je zasłužba Jurja Szczepanskeho, kiž je jako wučeny mašinowy zamkar po towaršnostnym přewróće za Kulowsku měšćansku piwarnju dźěłał. Jako wěcywustojny za wuhotowanje korčmow bě wón wjele po puću. W Petershainje njedaloko Kamjenca bě wot tamnišeje pyramidy tak fascinowany, zo namjetowaše tehdy jako wjesny předstejićel, podobnu tež w Salowje postajić.
Srjedź lěta 1998 rozmyslowachu wjacori wjesnjenjo wo wulkosći a wobsahu pyramidy, kotraž dyrbješe nabožne a narodne zmyslenje Salowčanow wobsahować. Dojednachu so na tři poschody. Na hornjej stej widźeć jandźelej, srjedźa hajnik, sorna a dźiwje swinjo a deleka boži narodk z Jězusom, swjatej Mariju a swjatym Józefom. Wšitke nimale dwaceći postawow je hač do 35 centimetrow wysokich. Wurězane su wone z 25 milimetrow tołsteho wodokruteho lěpjeneho drjewa.
Zymski spar w Nižej Wsy
Koło so wirtuelnje zetka
Budyšin. Krajne dźěłowe koło sakskeje SPD „Serbja“ přeprosy štwórtk, 10. decembra, we 18 hodź. na widejowu zhromadźiznu. Link k tomu nadeńdu zajimcy pod https://meet.jit.si/spd-bautzen. Na dnjowym porjedźe steja slědowace temy: staw zwoprawdźenja serbskich naležnosćow koaliciskeho zrěčenja sakskeho knježerstwa, staw konkretneho předewzaća připóznaća serbšćiny jako druheje cuzeje rěče, informacije wo rozmołwach ze serbskimaj kołomaj dalšeju koaliciskeju stronow w Sakskej (CDU a Zeleni), wuwiće medijow a wotpowědne serbske poskitki (staw a namjety do přichoda) kaž tež dalši nawod koła.
Čakarnju skóncowali
Žičeń. Njeznaći su so minjene dny w čakarni při železniskim zastanišću w Žičenju (Seitschen) w Hodźijskej gmejnje wucychnowali. Zadnju blachowu sćěnu woni zdźěla wotšrubowachu a zezhibowachu. Napadnyło je to wčera rano sobudźěłaćerjam železnicy, kotřiž na to policiju informowachu. Ta přepytuje nětko wobškodźenja wěcow dla.
Zarjadnistwo zawrjene
Policija (09.12.20)
W busach kontrolowali
Kulow. Na cyłoněmskim akciskim dnju za wužiwanje nahubnika w zjawnych wobchadnych srědkach běchu předwčerawšim tež zastojnicy Wojerowskeho policajskeho rewěra wobdźěleni. Woni kontrolowachu we wjacorych busach kaž tež na zastanišćach w Kulowje a Rakecach. Kaž w rozprawje Zhorjelskeje policajskeje direkcije rěka, su w busach wšitcy sobujěducy postajenje dodźerželi. Na zastanišćach někotre dźěći tónle předpis ignorowachu. Zastojnicy je napominachu.
Serbsce wuradźowali
Dźak a připóznaće za spontany rozsud předsydy zarjadniskeho zwjazka
Pančicy-Kukow (SN/MWj). Po wšěm zdaću spontanje je předsyda zarjadniskeho zwjazka Při Klóšterskej wodźe wčera rozsudźił, posedźenje zastupjerjow sobustawskich gmejnow w awli Šule Ćišinskeho w serbskej rěči přewjesć. Tak dožiwichu radźićeljo a wopytowarjo njewočakowanu premjeru. Hižo do toho při wobhladanju ponowjeneho běrowoweho twarjenja zarjadniskeho zwjazka běchu zwěsćili, zo hač na jedne wuwzaće wšitcy přitomni serbsce rěča. Zastupjerka Worklečanskeje gmejny pak w dalokej měrje serbsku rěč rozumi. Tuž su po tym tež zjawne wuradźowanje serbsce přewjedli, za čož zastupjer gmejny Ralbicy-Róžant Tomaš Bjeńš na kóncu „dźak a připóznaće“ wupraji.
Na městnje ćišćernje nastanu bydlenja
Budyšin (CS/SN). Něhdźe dwaj tydźenjej so nětko na terenje bywšeje serbskeje ćišćernje na Budyskej Hornčerskej zaso něšto hiba. Po tym zo bě w juniju twarska dowolnosć za nowotwar předležała, su konkretnje planować započeli a w nowembru wotzamknyli. Předewzaće „Wohnquartier LISA GmbH & Co. KG“ chce tam nětko bydlenja z wobstajnym hladanjom staršich ludźi twarić. Dohromady ma 88 bydlenskich jednotkow w dwěmaj twarjenjomaj nastać.
Za domaj w formje wile su srjedź nowembra blisko měšćanskeje murje twarsku jamu wuzběhnyli. Minjeny tydźeń nastajichu twarski kran, z kotrehož pomocu mjeztym hižo pincu twarja. W njej budźetej pozdźišo skład a technika zaměstnjenej. Dźěła mjeztym derje postupuja. Přetorhnyć chcedźa je jenož w tym padźe, jeli zymskeho wjedra dla dale dźěłać njemóža. Hłowne twarjenje bydlenskeho kwartěra nastanje dale prědku podłu Hornčerskeje hasy. W nim wutworja mjez druhim dnjowe hladanišćo. Hłowny dom chcedźa kónc prěnjeho kwartala 2021 twarić započeć. Planowane je, zo móža kónc lěta 2022 do cyłkowneho objekta zaćahnyć.
Při Klóšterskej wodźe su nětko poslednje štomy a kerki jako ...
Logo ma zwjazanosć němskeho a serbskeho symbolizować
Próca wo zachowanje njewšědneho objekta je Slepjanske towarstwa kruće hromadu skowała. Nětko maja koncept do přichoda – a samo logo.
Stary komunalny twarski zawod w Slepom ma so z towarstwowym domom a zetkanišćom stać. To je zaměr wosom towarstwow, kotrež objekt wobstajnje wužiwaja. Něhdźe sto ludźi so tam swojemu hobbyjej wěnuje.
Poprawom bě předwidźane, zo měješe w bywšim gmejnskim zarjadnistwje přesydlenc z Miłoraza swoje přemysło wjesć. Hač do toho smědźachu Slepjanske towarstwa twarjenje přechodnje wužiwać. Zajimc z Miłoraza so ženje namakał njeje. Tak chcychu imobiliju předać, předewšěm tohodla, dokelž bě w bywšej gmejnskej radźe rěč wo tym, zo saněrowanje twarjenja pječa milion eurow płaći. Telko pjenjez njeby Slepjanska gmejna nihdy nanihdy zwjesć móhła. To pak, kaž je so mjeztym wukopało, tež scyła trjeba njeje.
