Młodźi wobornicy so dale kubłaja

pjatk, 24. julija 2015 spisane wot:

Mjez 128 młodymi wohnjowymi wobornikami­ Sakskeje, kotřiž wobdźěleja so hač do jutřišeho na dalekubłanju Nar­ćanskeje wohnjowoborneje šule za katastrofowy­ škit, su tež někotři z Kamjenca, Róžanta, Němcow a Brětnje.­

Narć (UH/SN). Poprawom su na sakskej krajnej wohnjowobornej šuli za katastrofowy škit w Narću tuchwilu prózdniny. Najebać to knježi tam čiłe žiwjenje. 15- do 18lětni absolwuja w dźewjeć wobornikow wopřijacych mustwach přidatny wukubłanski program a maja zdobom přiležnosć, so prócować wo wukonowu spinku. To je najwyše wukonowe znamješko, kotrež móže čłon młodźinskeje wohnjoweje wobory docpěć.

Cyłkownje 92 wobdźělnikow so w Nar­ću nětko wo wukonowu spinku wubědźuje. Pruwowanja wotměwaja so w kulostorku, ha­šenju, spěšnosći, w staflowym běhu na 1 500 metrow a w po­wšitkownej wědźe. W běhu minjeneho tydźenja stejachu tež wulěty kaž eks­kur­sija do Wjelčanskeje wuhloweje jamy, dźěłarnički, mjez druhim z policiju, kaž tež karao­kowy wječor na programje.

Gmejnje derje kooperujetej

pjatk, 24. julija 2015 spisane wot:

Malešecy chcedźa so Wulkej Dubrawje a Radworjej přidružić

Wulka Dubrawa/Radwor (CK/SN). Wot toho časa, zo dyrbja komuny z přestajenjom na doppik wotpisanja same nahospodarić, dyrbja wone hišće bóle lutować. Kóštoweho ćišća a woteběraceje ličby wobydlerjow dla je za kóždu jednotliwu gmejnu dźeń a ćešo, posłužby za najwšelakoriše nadawki zmištrować. Wulka Dubrawa a Radwor tohodla wot lěta 2009 w tak mjenowanym zakładnocentralnym gmejnskim zwjazku hromadźe dźěłatej. Kooperacija je so jako dobra wopokazała, byrnjež so mnozy wobydlerjo spočatnje bojeli, zo je to předstopjeń gmejnskeje fuzije. Tajku mjenujcy běchu woni do toho we wobydlerskim rozsudźe wotpo­kazali. „Z fuziju nima tónle gmejnski zwjazk ničo činić“, zwurazni Jörg Weichler z regionalneho planowanskeho bě­ro­wa Hornja Łužica/Delnja Šleska wčera na posedźenju Wulkodubrawskeje gmejn­skeje rady.

Na openair White night

pjatk, 24. julija 2015 spisane wot:
Smječkecy (SN). W Smječkecach wotměje so 8. awgusta wot 20 hodź. openair pod hesłom White­ night. Loni přewjedźechu tele zarjadowanje w Haslowje. Wjeselić móža so fanojo na dalši wustup serb­skeje skupiny JANKAHANKA, kotraž chce w Smječkecach prěni króć swój nowy spěw „Rozsudy“ zahrać. Jako dalšu band dožiwiće tam Paisley z Drježdźan. Hižo nětko móžeće sej lisćiki w předpředani za šěsć eurow w Róžeńčanskim Hrje­horjec wobchodźe, pola Chróšćanskeho časnikarja Njeka a w Radworskim Šmitec wozydłownistwje kupić.

Krótkopowěsće (24.07.15)

pjatk, 24. julija 2015 spisane wot:

Stanowe lěhwo za ćěkancow

Drježdźany. Prowizoriske stanowe lěhwo­ za 1 100 ćěkancow twarja nětko w Drježdźanach-Friedrichstadće. Paralelnje kładu wodowody a twarja sanitarne připrawy, kaž rěčnik krajneje direkcije Holm Felber informowaše. Sakska bě krótkodobnje zhoniła, zo ćěkancy přijědu. Tuž běchu so wčera wječor rozsudźili, stanowe lěhwo natwarić.

Kurs čěšćiny zahajeny

Praha. Mjeztym hižo 59. lětni kurs čěšćin­y su dźensa na Praskej Karlowej uniwersiće zahajili. Něhdźe 80 zajimcow ze wšeho swěta so na nim wobdźěla, mjez druhim štyrjo Serbja. Jich přebytk na kursu spěchuje čěske knježerstwo. Inten­siwny kurs traje štyri tydźenje. Dalši kurs čěšćiny budźe w awgusće w Českich Budějovicach­.

Nowa hospoda migrantam

Policija (24.07.15)

pjatk, 24. julija 2015 spisane wot:

Wóslink. W Pisanym Dole (Scheckthal) pola Wóslinka je srjedu popołdnju 17lětny mopedist njezbožo zawinił. Mło­dost­ny, kiž bě ze swojim S 50 po puću, zrazy w křiwicy dolěwa do napřećo přijěduceho Audija. Wón padny a so zrani. Wěcna škoda wučinja­ něhdźe 3 200 eurow.

Rakecy. W nocy na srjedu su so njeznaći w Rakecach přez wočinjene wokno do sportoweho domu zadobyli. Z kasety pokradnychu znajmjeńša tysac eurow.

Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych­ katolskich a ewangelskich wosadach rozhladujemy a někotre fary předstajamy – dźensa Klukšansku.

Jako poslednja cyrkwinska wosada bu Klukšanska nimale sto lět po reformaciji 1614 ewangelska. Z archiwnych podłožkow wuwidźiš, zo steješe tam wot lěta 1692 farski dom. Wot 1731 bě Christoph Friedrich Faber 17 lět farar w Klukšu. Wón załoži tam swój čas najstarši wučerski wustaw Łužicy, kotryž bu pozdźišo do Delnjeho Wujězda přepołoženy. Šuler wustawa bě tež přełožowar a narodny prócowar Jan Bjenada, kiž wot 1770 tři lětdźesatki w Klukšu fararješe. Za jeho čas so farski dom wotpali. Po nowona­twarje bu wón za čas Napoleonskeje wójny­ 1813 zničeny. Znowa so pilni Klukšanscy rjemjeslnicy a pomocnicy dźěła njebojachu a natwarichu na samsnym městnje, hdźež nańdźemy nětčišu faru, nowu dźěłarnju a bydlenje za amtěro­waceho fararja. Bohužel sta so wona wo­spjet z woporom wulkowohenja, a to 1830.

Mjez mnohimi hosćimi dźensnišeho swójbneho dnja na Wojerowskej dźěćacej a młodźinskej farmje Křesćansko-socialneho kubłanskeho­ skutka běchu wjacore prózdninske skupiny. Rafaela Wićazowa (na wobrazu) z Pančičanskeho zeloweho a zežiwjenskeho centruma je jim rozkładowała, kak móžeš wšelake zela za warjenje a praženje wužiwać. Foto: Ulrike Herzger

Horcoty dla wjace pacientow

štwórtk, 23. julija 2015 spisane wot:

Předewšěm starši ludźo maja ćeže z wutrobu a wobtokom kreje

Budyšin/Wojerecy (SN/mwe). Byrnjež so po ćežkim njewjedrje dźensa w nocy tež w Hornjej Łužicy tróšku wochłódniło, ma so lěćo dale ze swojeje najlěpšeje strony a z temperaturami hač do 30 stopnjow celsija pokazać. Wosebje tužnota mnohim ćeže načinja. Tak stej nuzowej přijimarni w Budyskej a Biskopičanskej chorowni minjene horce dny wšědnje pjeć do šěsć pacientow registrowałoj. Kónc tydźenja ličba pacientow zwjetša hišće přiběra.

Krótkopowěsće (23.07.15)

štwórtk, 23. julija 2015 spisane wot:

Wo Mari Kubašec čitała

Połčnica. Trudla Malinkowa je wčera swoju knihu „Marja Kubašec – Maria Kubasch. Ein Lebensbild“ w klinice HELIOS na Połčničanskim hrodźe předstajiła. Marja­­ Kubašec bě jako wučerka tež w Połč­nicy skutkowała. Mjez 20 zajimcami wčera běchu tež jeje bywši šulerjo. Čitanje bě zhromadne zarjadowanje LND a Ernsta Rietscheloweho kulturneho kruha.

Žane kartki hižo na předań

Budyšin. Prěni raz w stawiznach Budyskeho lětnjeho dźiwadła njeje hač do kónca předstajenjow žadyn zastupny lisćik wjace na předań. Mnohe kartki pak su rezerwowane. „Wudani so tuž při wječornej kasy za njewotewzatej kartku so prašeć“, rjekny medijowa rěčnica NSLDź Gabriele Suschke. Hišće jědnaće króć předstaja hač do 2. awgusta musical „My Fair Lady“.

Bosbach zastojnstwo złožił

Policija (23.07.15)

štwórtk, 23. julija 2015 spisane wot:

Budyšin. Wutoru popołdnju su wuchodźowarjo w Budyšinje njedaloko skały při Nadźanečanskej dróze mortweho muža namakali. Jedna so wo 57lětneho Budyšana, kotrehož bě policija wot za­šłeho tydźenja pytała.

Budyšin. Zastojnicy Zhorjelskeje policajskeje direkcije su zawčerawšim mjez Mužakowom­ a Žitawu šěsć paduchow lepili­ a jich nachwilnje zajeli. We Woje­recach a Bretnigu-Hauswaldźe běchu to skućićeljo, kotrychž hižo z wukazom zajeća­ pytaja. Woni běchu w Biele­feldźe a druhdźe awta kradnyli.

nawěšk

nowostki LND