Krótkopowěsće (02.11.20)

póndźela, 02. nowembera 2020 spisane wot:

120 nowych infekcijow

Budyšin. W Budyskim wokrjesu bu wčera 120 nowych infekcijow z koronawirusom zwěsćenych. Z tym je ličba w sydom dnjach poćahowana na ličbu wobydlerstwa 781. W karantenje je 2 415 ludźi. 41 dalšich pacientow je wuhojenych. Tuchwilu je we wokrjesu 1 166 ludźi­ inficěrowanych. 32 z nich so w klinikach hoja. Mjeztym je dalši pacient zemrěł.

Myto Büchnera Elce Erb

Darmstadt. Autorka Elke Erb je sobotu w Darmstadtskim Statnym dźiwadle Myto­ Georga Büchnera přijała. Korony dla bě tam lědma publikuma. Z mytom bu 82lětna lyrikarka a basnica za swoje „njezaměnliwe“ literarne žiwjenske tworjenje wuznamjenjena. Myto we wyso­kosći 50 000 eurow Němskeje akademije za rěč a basnjenje je najwažniše wuznamjenjenje na polu literatury w Němskej.

Filmowy festiwal přesunjeny

Choćebuz. Organizatorojo 30. filmoweho festiwala Choćebuz (FFC) su po­dawk na 8. do 13. decembra 2020 přesunyli. Dualny festiwal wotměwa so w tych dnjach z předstajenjom filmow w kinach delnjołužiskeho města kaž tež na internetnej stronje festiwala. Kartki za předstajenje filmow w kinach wot 3. do 8. nowembra dale płaća.

Policija (30.10.20)

pjatk, 30. oktobera 2020 spisane wot:

Wjacorych ludźi zranił

Budyšin. Při rozestajenjach je předwčerawšim 43lětny muž w Budyšinje wja­core wosoby zranił. Najprjedy da so Libyčan na Žitnych wikach do 28lětneho a jeho zrani. Policija zwěsći pola wobeju wjace hač promil­ alkohola w kreji. Pozdźišo bě 43lětny na rozkorje na Wonkownej Lawskej wobdźěleny a tam dweju 16lětneju a 20lětneho zrani. Swědk za­zwoni policiju a zranjenym pomhaše. Jednoho z nich dowjezechu do chorownje.

Rejuja „W stwičce“

pjatk, 30. oktobera 2020 spisane wot:
Budyšin. Baletny wječor „W stwičce“ po­ka­zaja rejwarki a rejwarjo Serbskeho ludoweho ansambla pod nawodom baletneje mišterki Mije Facchinelli jutře w 19.30 hodź. w Budyskim Dźi­wa­dle na hrodźe. Kruch jedna wo wu­wědomjenju zrani­to­sće a wo njesměrnej mocy rejwanja, wo moralce, rozumje a začuću, čas zhubić. Wosom choreografijow a wosom hlada­nišćow su kreatiwny wuslědk njedobrowólneje jewišćoweje přestawki. Choreografije nastachu w swójskich rjadach SLA k hudźbje Detlefa Kobjele, Jana Rawpa, Hynca Roja, Berlinskeje drohi a dalšich.

Woda jězora snadnje stupała

pjatk, 30. oktobera 2020 spisane wot:

Kwětanecy (SN/MWj). Dokelž je Kwětanečanski (Quitzdorf) spjaty jězor w Zhorjelskim wokrjesu wysokosć 157,8 metrow nad mórskej hładźinu docpěł, su tam zakaz přistupa zběhnyli. Po wob­šěrnych spadkach zašłych tydźenjow je woda na wjace hač 158 metrow stupała. Z tym je najwjetši dźěl spjateho jězora zaso­ pod wodu, zdźěli Sakski krajny zarjad rěčnych zawěrow.

Kwětanečanski spjaty jězor běchu w juniju 2019 reparaturow dla hač na jednu třećinu wotpušćili. Wot oktobra 2019 tam hižo nichtó na pobrjóh stupić njesmědźeše, dokelž hrožeše strach zo móhł něchtó w błóće třacy wostać abo so na připławjenych wěcach zranić.

W decembru 2019 započachu zaso wodu­ spjeć. Cyłkowneje suchoty dla pak to dołho traje. Hdy budźe doskónčny staw docpěty, wotwisuje wot spadkow přichodnych měsacow. Aktualny staw wody namakaja zajimcy internetnje pod www.ltv.sachsen.de/tmz. Wudźenje je nětko zaso móžne, ale jenož z płaćiwej wudowej kartu. Tuchwilu pruwuja, hač je přichodnje wjetše saněrowanje Kwě­tanečanskeho jězora móžne. Najnowše wobnowjenje wobmjezowaše so na te městno, hdźež woda wotběži.

Zarjadnistwo budźe dróše

pjatk, 30. oktobera 2020 spisane wot:

Gmejny dyrbja wjace wotedawka płaćić, nic pak jenož personala dla

Slepo (CK/SN). 191 eurow na wobydlerja płaći w lěće 2021 zarjadnistwo w gmejnach Slepo, Dźěwin a Trjebin. Jednohłósnje je zhromadny wuběrk, zestajany ze zastupjerjow třoch komunow, na zašłym posedźenju wotedawk wobzamknył.

Slepjanske zarjadniske zjednoćenstwo wobsteji wot 1. januara 1999. Wone wopři­ja tři gmejny Slepjanskeje wosady, wobstejace ze sydom wsow. Wot čestnohamtskeju wjesnjanostow wjedźenej gmejnje Trjebin a Dźěwin wot toho časa žane swójske zarjadnistwo nimatej. Twarske planowanje, koordinowanje dźěćaceho hladanja, posedźenska słužba k podpěrje gmejnskich radow a dalše na­daw­ki wobstaraja za wšitkich w Slepjanskim zarjadnistwje. Wudawki za to noša tři gmejny we formje wotedawka. A tón wobliča po ličbje wobydlerjow.

Najlěpje takle hišće raz

pjatk, 30. oktobera 2020 spisane wot:
To drje by sej něchtóžkuli rady přał, zo změjemy přichodne dny podobnje rjanu nazymu,­ kaž smědźachmy ju minjeny kónc tydźenja dožiwić, mjenujcy z miłymi tem­pera­turami z tójšto słóncom. Z tajkim motiwom, kaž je jón naš čitar na po­slednjej oktoberskej njedźeli při Kamjentnym haće mjez Smječkecami a Róžantom zapopadnył, pak nas swj. Pětr lědma zapleńći. Skerje dyrbimy so na dešć nastajić, słónco lědma wuhladamy, přezyma pak njebudźe. Foto: Beno Wałda

Wjac transparency by derje było

pjatk, 30. oktobera 2020 spisane wot:

Ralbicy (JK/SN). Pod krutymi hygieniskimi naprawami wotmě so wčera pose­dźenje gmejnskeje rady Ralbicy-Róžant w Ralbičanskej sportowni. Nawjedował je je zastupowacy wjesnjanosta Michał Šołta­ (Swobodne wolerske zjednoćenstwo „Delany“). Dnjowy porjad hodźał so w přiměrjenym času wotdźěłać, by-li někotrežkuli wobzamknjenje lěpje spřihotowane było. Michał Šołta přińdźe tak na někotrych městnach do wuskosćow, dokelž njeměješe chwile, so do zakładow a pozadkow wobzamknjenjow zadźěłać.

W najmjeńšej wsy Sakskeje so zaso wulce twari. Tele dny su w Libonju dalšu bróžnju štyristronskeho statoka přetwarić započeli a najprjedy třěchu dospołnje wotnjesli. Tule ma wosom dowolowych bydlenjow kaž tež rumnosć za kubłanja a zarjadowanja nastać. W dotalnych bydlenjach statoka ma něhdźe 20 dorosćenych a dźěći swoje doma. Foto: Feliks Haza

Koło zadźeržeć

pjatk, 30. oktobera 2020 spisane wot:
Sće hižo raz dožiwili, zo dóstanjeće něšto za mjenje pjenjez hač na přikład před lětom?­ Derje, w kupnicy maja druhdy wose­bity poskitk, kiž je woprawdźe tuńši. Ale powšitkownje bywa stajnje wšitko dróše. Za to w priwatnej domjacnosći druhdy tež mzda stupa, móhł něchtóžkuli znapřećiwić. Kajke pak je połoženje porno tomu w komunach? Tam dochody lědma přiběraja, skerje je nawopak. Ale wudawki wostanu a w najhóršim padźe samo přibě­raja, kaž wot klětušeho w Slepjanskim zarjadniskim zjednoćenstwje, dokelž hłownje personalne kóšty stupaja. Potom dyrbja tři wobdźělene komuny zaso raz trochu hłubšo do swojeje kasy přimnyć a chcyjo nochcyjo za swoje zarjadnistwo wjace wudać. Gmejnam potom zaso pjenje­zy na druhim městnje pobrachuja, chiba zo zwyša na přikład ležownostny dawk. Tón zaso wobydlerjo ze swojeje móšnje zapłaća. Tak so koło stajnje dale wjerći. Hač drje změje raz něchtó kmanu ideju, je zadźeržeć? Marian Wjeńka

Krótkopowěsće (30.10.20)

pjatk, 30. oktobera 2020 spisane wot:

Dalše infekcije zwěsćili

Budyšin/Zhorjelc. W Budyskim wo­krjesu su wčera 141 dalšich nowonatyknjenych z koronawirusom zwěsćili. Tuchwilu je tu dohromady 793 wosobow inficěrowanych, dwanaće z nich w chorowni lěkuja. Budysku pěstowarnju „Friedrich Schiller“ su jednoho koronoweho pada dla zawrěli. W Zhorjelskim wokrjesu je so 40 ludźi znowa natyknyło, dohromady maja tam 716 inficěrowanych, z kotrychž je 28 w chorowni.

Serbska rada wuradźowała

Budyšin. Digitalnje zetkachu so wče­ra čło­nojo Rady za serbske naležnosće Sak­ske­je. Radźićeljo zaběrachu so mjez druhim z wot statneho knježerstwa před­połoženym naćiskom zakonja k skru­ćenju zažneho a šulskeho kubłanja. ­W lisće Sakskej statnej kencliji kritizuja w jeje nadaw­ku wudaty wosebity zešiwk „Mosaika“, w kotrymž serbska rěč a kultura ze žanym słowom njenaspomnjenej njejstej­.

Žadna cyrkej so wotpaliła

Serbska debata

nowostki LND