Njepowalna tradicija

pjatk, 02. oktobera 2020 spisane wot:
Kriza žada sej kreatiwitu, a kaž rady bychmy wšitcy skónčnje „normalitu“ znowa witali, měli kritiku kabaretista Andreasa Rebersa chutnje brać: Prašenje njeje, kak po koronje, ale z njej postupujemy. Po cyłej Němskej wo tym rozmysluja, kak hodźeli so lětsa adwentne wiki zarjadować. Je wotprajić po wšěm zdaću žana alternatiwa njeje, štož tež rěka, zo je kołbaska mjez lunkami horceho wina wosrjedź kobołkoweho dyma za system njeparujomna. Hač w adwenće potom woprawdźe alkohol porjedźa abo hač mamy so – kaž to na přikład w Bayerskej planuja – z punšom spokojić, znajmjeńša w sprjewinym měsće Budyšinje tuchwilu hišće jasne njeje. Wěste pak je: Wjacławske wiki budu, hdyž tež nic w starym měsće, ale na mjeztym 30 lět zaso pacifistisce „Třělnišćo“ mjenowanym bywšim Naměsće měra. Kak derje, zo su so wikowarjo a gastronomojo Bohateje hasy ponowjenju milinowoda runje dohodowneho spektakla dla wuspěšnje wobarali. Bosćan Nawka

Krótkopowěsće (02.10.20)

pjatk, 02. oktobera 2020 spisane wot:

Ličba natyknjenjow přiběra

Budyšin. W Budyskim wokrjesu zwěsćichu wčera sydom dalšich z koronawirusom natyknjenych wosobow. Dohromady je jich po wčerawšim stawje 615. Ličba schorjenych je wo pjeć na 43 při­běrała. W postajenej karantenje bě 162 wobydlerjow (+25). Srjedu su 25 testow přewjedli. Strašnosće koronapandemije dla wažne mnóstwo nowonatyknjenjow w minjenych sydom dnjach je 35 na cyłkowne wokrjesne wobydlerstwo.

Chcedźa Zahrodku wozrodźić

Wojerecy. W Delnim Wujězdźe planuja klětu składnostnje jeho 100. róčnicy wobstaća towarstwo Zahrodka wozrodźić. To potwjerdźi Sonja Hrjehorjowa, regionalna rěčnica Domowiny za teritorij župy „Handrij Zejler“, wčera na wuradźowanju regionalnych rěčnicow we Wojerecach. Tež z rěčnym kursom a wustajeńcu wo serbskich stawiznach chcedźa serbskosć we wsy zaso wožiwić.

Wobčušlenje wobmjezowane

Wuprawa župy a skupiny ze samsnym zaměrom

štwórtk, 01. oktobera 2020 spisane wot:

Na swoju kóždolětnu kubłansku wuprawu podachu so čłonojo Budyskeje župy „Jan Arnošt Smoler“ minjeny kónc tydźenja. Dohromady 37 čłonow z dźewjeć Domowinskich skupin a towarstwow dojědźe sej najprjedy z Budyšina do Hrodźišća. Tam wopytachu row serbskeho ludoweho wuměłca Měrćina Nowaka a počesćichu jeho z basnju a spěwom w spominanju na 30. posmjertniny lětsa w juliju. Po tym wjedźeše hrabja Beat von Zenker skupinu hosći po swojim Hrodźišćanskim hrodźe. Po wobjedźe we Wichowje dowjeze nas bus do Radworja, hdźež dožiwichmy w hosćencu „Meja“ serbski program z Moniku a Bjarnatom Cyžec. Mjez druhim předstajištaj wonaj z pomocu klankow serbsku katolsku drastu ­a rozłožowaštaj zajimawostki wo nałožkach a serbskich swjedźenjach. Při tym dachmy sej kofej a tykanc słodźeć.

Na program přidružichu so nam čłonojo Domowinskeje skupiny z delnjołužiskeho Turjeja. Woni běchu samsny dźeń na wuprawje w Hornjej Łužicy a wopytachu mjez druhim Muzej Měrćina Nowaka w Njechornju. Róža Pinkawina wodźeše jich po domje a powědaše jim ze žiwjenja Njechorńskeho.

Ludźom zamołwitosć přicpěwać

štwórtk, 01. oktobera 2020 spisane wot:

Podijowa diskusija wo wjelkach znate problemy wujewiła

Kamjenc (BG/SN). Prašenje podijoweje diskusije „Kelko wjelkow znjese Sakska?“ je předwčerawšim něhdźe 40 zajimcow do Kamjenskeho měšćanskeho dźiwadła přiwabiło. Mjez nimi běchu wjacori Serbja, kotřiž so hižo tójšto lět z temu zaběraja. Zarjadowanje wotmě so w rjedźe „Kontrowersnje na městnje“, kotryž sakska centrala za politiske kubłanje a ludowa uniwersita zhromadnje wuhotujetej. Diskutowałoj staj Volker Kurz ze zwjazka BUND a Matthias Rau z krajneho zarjada za wobswět, geologiju a ratarstwo. Jimaj napřećo sedźeše Wernher Gerhards z wobydlerskeje iniciatiwy za wobmjezowanje wjelčeho wobstatka.

Po hudźbnym swěće Serbow

štwórtk, 01. oktobera 2020 spisane wot:
Budyšin. Koncert wosebiteho razu wotměje so njedźelu, 4. oktobra, w 19.30 hodź. w Budyskim Serbskim muzeju. Martin Flade z Berlina (wiola) a Malte Hübner z Rostocka (wiolina) přednjesetaj twórby serbskeje wuměłskeje hudźby a podataj so tak na pućowanje po serbskich hudźbnych stawiznach. Zaklinča twórby klasikarjow Korle Awgusta Kocora a Bjarnata Krawca, dalšich generacijow, zastupjenych přez Jana Rawpa a Detlefa Kobjele, kaž tež najwažnišeju reprezentantow načasneje hudźby Jura Mětška a Jana Cyža. Při Krawcowej twórbje „Serbow jandźel“ Lisa Čornakowa jako rěčnica sobu skutkuje. Dokelž zaklinči tohorunja Rawpowe „Pjeć klawěrnych kruchow za dźěći“ we wobdźěłanju za wiolinu a wiolu, hodźi so koncert tež za serbskich hudźbnych šulerjow.

Policija (01.10.20)

štwórtk, 01. oktobera 2020 spisane wot:

Koleso namakali a paduchow zajeli

Budyšin. Dźakowano pokiwej swědka je policija w nocy na srjedu pokradnjene koleso na Budyskej Schäfferowej namakała. Te bě něchtó srjedź septembra na Cyhelskej pokradnył. Podhladnaj staj mužej w starobje 24 a 32 lět. Jeju zastojnicy lepichu, jako nětko podarmo za pokradnjenym kolesom pytaštaj. Wobeju nachwilnje zajachu. Při kontroli młódšeho namakachu policisća wšelki grat za zadobywanja.

W młynje budźe bórze chlěb pječeny

štwórtk, 01. oktobera 2020 spisane wot:

Nimo jězorow drje je Krabatowy młyn w Čornym Chołmcu sobu najzajimawša turistiska parlička Wojerowskeho regiona. Přichodnje drje budźe wona hišće přiwabliwiša.

Čorny Chołmc (SN/MWj). Krabatowy młyn w Čornym Chołmcu budźe bórze wo dalšu atrakciju bohatši. Wot lětušeho nalěća nastawa tam pjekarnja z pjecu, ze składom a sanitarnymi rumnosćemi. Za dwaceći króć sydom metrow wulke twarjenje su wčera zběhanku swjećili. Jednaćel Krabatoweho młyna Tobias Čižik měješe sobu nadawk, posledni hózdź do třěšneje hrjady bić.

Stajnje nowe ideje

štwórtk, 01. oktobera 2020 spisane wot:
Před wjele lětami rozprawjach hromadźe z fotografom wo zběhance za čeladny dom Čornochołmčanskeho Krabatoweho młyna. Bě to tehdy jedne z prěnich twarjenjow, kotrež su tam z pomocu wandrowskich rjemjeslnikow nastali. Tehdy tróšku dwělowach, hač drje to woprawdźe raz něšto budźe z tym Krabatowym młynom. A sym sej nimale wěsty, zo njeběch jenički z tajkej mysličku. Wot toho časa wuwiće młyna wobstajnje wobkedźbuju. Nimale kóždy raz, hdyž sej tam dojědu, wuhladam něšto noweho a dźiwam so, kelko idejow zamołwići maja. Nětko potajkim nowu pjekarnju twarja. Derje, projekty, zaběrace so z procesom wot žita hač ke chlěbej na wjacorych městnach poskićeja. Ale lědma něhdźe druhdźe móža jón tak awtentisce předstajić kaž w Čornym Chołmcu. Wšako tam tež dožiwiš, kak ze zorna najprjedy raz muka nastawa. Nětko sym wězo wćipny, kotre ideje zamołwići Krabatoweho młyna přichodnje wupjeku. Marian Wjeńka

Pomoc Korzymskej termje

štwórtk, 01. oktobera 2020 spisane wot:

Kupjel Korzymsku terma chcedźa nanajpozdźišo 1. nowembra zaso wočinić. To wuchadźa ze zakładneho wobzamknjenja Budyskeho wokrjesneho sejmika. Zapisane su w nim konkretne kroki wokrjesa za wuchowanje zarjadnišća, kotrež přisłušny zaměrowy zwjazk sam rjadować njemóže.

Budyšin/Korzym (SN/at). Budyski wo­krjes je wulce zajimowany, zo Korzymska terma dale wobsteji a so wuwije. Jeje nošerstwo pak njepřewozmje, z čimž pró­stwje přisłušneho zaměroweho zwjazka z 29. junija njewotpowěduje. To zhonichu wokrjesni radźićeljo na posedźenju sejmika minjenu póndźelu. Wuměnjenje podpěry ze stron wokrjesa pak je, zo zamě­rowy zwjazk kupjel hač do 1. nowembra zaso wotewrje a wobhospodarja, doniž­ doskónčne rozrisanje nastupajo nošerstwo njepředleži. To je prěni krok, za jeho­ přihoty přewostaji wokrjes 200 000 eurow. Suma je na zakładźe wobzamknjenja wokrjesneho sejmika z lěta 2018 wo podpěrje zaměroweho zwjazka w lětušim budgeće předwidźana.

Krótkopowěsće (01.10.20)

štwórtk, 01. oktobera 2020 spisane wot:

Třoch stacionarnje lěkuja

Budyšin. Z dalšimi pjeć zwěsćenymi padami je ličba z koronawirusom inficěrowanych w Budyskim wokrjesu wčera na 608 rozrostła. Schorjenych je 38 wosobow (+ 3), z kotrychž tři (+ 1) stacionarnje lěkuja. Nastupajo natyknjenu šulerku Budyskeho powołanskošulskeho centruma (BSZ) ze Zhorjelskeho wokrjesa kon­takt­ne wosoby dale zwěsćeja, zdźěli krajnoradny zarjad. Strach, zo dyrbja BSZ zawrěć, tuchwilu njehrozy.

Filmy festiwala online hladać

Choćebuz. Wot 3. do 8. nowembra njewot­měje so 30. Choćebuski filmowy festiwal jenož w kinach, ale tež online. Zajimcy móža so za 30 eurow z internetnym formularom akreditować, zo bychu sej nimale 200 filmow online wobhladać móhli, a to hač do 25. oktobra. Jednot­liwe filmy su w Němskej bydlacym tež přez poskitk Pay-per-view bjez akreditacije přistupne.

Nowy staršiski list wušoł

Serbska debata

nowostki LND