Wulki wuběr socialnych poskitkow
Lessingowe město je nětko wo socialne zarjadnišćo bohatše. Štóž pyta poradu w najwšelakorišich socialnych a wosobinskich prašenjach, tomu móža tam z wobšěrnym poskitkom pomhać.
Kamjenc (BG/SN). Swój nowy dom je předwčerawšim Hornjołužiski zwjazk Carity na Zapadnej w Kamjencu wotewrěł. W bywšej nakupowanskej pasaži „Pastwina hora“ wosrjedź stareho města nasta po wobšěrnym přetwarje nowe srjedźišćo za ludźi, kotřiž dyrbja wšědny dźeń najwšelakoriše ćeže zmištrować. Za nich maja tam dźewjeć wšelakich pomocnych poskitkow. „Naš dźeń wotewrjenych duri na nowym městnje je jasne wuznaće k socialnemu dźěłu w Kamjencu“, zwurazni srjedu jednaćel hornjołužiskeje Carity Andreas Ošika.
Serbšćinarjo 9. lětnika Kulowskeje Wyšeje šule „Korla Awgust ...
Město je hotspot
Krótkopowěsće (16.10.20)
Zarjadnistwo naprawy přihotuje Budyšin. 172 wosobow bě wčera koronawirusa dla w Budyskim wokrjesu schorjenych, kaž krajnoradny zarjad zdźěli. Ze 103 nowoinfekcijemi w zašłych sydom dnjach steji wokrjes krótko do předwarnowanskeho schodźenka 105 wosobow. Za tajki pad trěbne dalše škitne naprawy zarjadnistwo nětko přihotuje. Na Ralbičanskej zakładnej šuli kaž tež w pěstowarnjomaj w delnich Sulšecach a Hodźiju njejsu mjeztym žane dalše natyknjenja zwěsćili.
Tankowu granatu rozbuchnyli
Terpje. Na firmowym arealu w Terpjom su wčera 8,8-centimetersku tankowu granatu z Druheje swětoweje wójny našli. Hnydom přiwołana słužba za wotstronjowanje bojowych srědkow Braniborskeje je rozbuchnjenje na městnje postajiła. K wěstotnym naprawam słušeše zawrjene pasmo 300 metrow. Po wuspěšnym rozbuchnjenju su wěstotne naprawy w 16.15 hodź. zaso zběhnyli.
Češa z koronu do Němskeje?
Zarjadnistwo zjednoćić abo dźělić
Njeswačenjo dale w napjatym hospodarskim połoženju
Njeswačidło (JK/SN). Kak dale ze zarjadniskim zjednoćenstwom Njeswačanskeje a Bóščanskeje gmejny rěkaše předwčerawšim prašenje na posedźenju Njeswačanskeje gmejnskeje rady. Tam předstaji komornica Liane Wetzko staw lětušeho hospodarskeho plana. Po jeje słowach je połoženje gmejny dale jara napjate. Budyski krajnoradny zarjad je namjetował etat blokować. To pak komuna nochce, dokelž by to po měnjenju komornicy wopačny signal wobydlerjam był. Gmejna Njeswačidło je po jeje słowach dale kmana komunalne nadawki spjelnjeć.
Policija (15.10.20)
Při njezbožu zemrěł
Kinspork. Tragiski wukónc měješe we wčerawšich rańšich hodźinach jězba 41lětneho muža z Kamjenca do směra na Kinspork. Z dotal njeznateje přičiny je wodźer VW Passata tam krótko do 1.30 hodź. na lěwy bok jězdnje zajěł a něhdźe 300 metrow před Kinsporkom do štoma zrazył. Wuchowanske mocy zatłusnjeneho z jězdźidła wuswobodźichu a spytachu jeho wožiwić, bohužel bjez wuspěcha. 41lětny hišće na městnje njezboža wudycha. Jeho wosobowe awto so dospołnje skóncowa.
Zaručeja pitnu wodu
Łaz (AK/SN). Hłowny wodowód při bywšej Šibojskej brunicowej jamje podłu wokrjesneje dróhi K 9218 chce gmejna Łaz přepołožić dać. To je předwčerawšim tamniša gmejnska rada wobzamknyła a wotpowědny nadawk twarskej firmje přepodała. Hižo njetrěbnej klumpowej domčkaj při dźensnišim jězoru za to spotorhaja. K tomu słušacy wodowód wobsteji z asbestoweho cementa a móhł so při torhanju domčkow skóncować. Zo pak bychu zastaranje Łazowskeje gmejny z pitnej wodu dale zaručili, chcedźa do toho wodowód přepołožić a jón z nowym narunać.
Kisykał dźěłać kaž něhdy
Tři Žony. Kaž za čas swojich dźědow a wowkow móža zajimcy sobotu, 17. oktobra, w Třižonjanskej kulturnej bróžni kisykał dźěłać. Na to přeprosy tamniše towarstwo Lebensart zajutřišim w času wot 10 do 14 hodź. Štóž chce so tam wobdźělić, njech so pod telefonowym čisłom 035724/ 50 915 přizjewi. Wobdźělnicy měli sej wotpowědne hlinjane sudobjo za kał sobu přinjesć.
Do kónca nowembra zawrjena
Wotrězk wažneje dróhi sporjedźeja, dołhodobnje dyrbja ju saněrować
Wojerecy (AK/SN). Zwjazkowa dróha B 97 mjez Wojerecami a Čornej Pumpu ma hač do kónca nowembra tak sporjedźana być, zo móža ju jězdźidła zaso wužiwać. To zdźěli techniski nawoda Łužiskeje a srjedźoněmskeje towaršnosće hórnistwoweho zarjadnistwa (LMBV) Bernd Sablotny zhromadnje z krajnym zarjadom za dróhotwar a wobchad (LASuV) na informaciskim zarjadowanju z komunami, kotrež su wobjězdki dla wot zawrjenja potrjechene. Wot 6. julija bě dróha połojčnje zawrjena, wot 27. julija je to nětko dospołnje.
Hižo dlěši čas předewšěm starši ludźo porokuja, zo so jim po ...
Móhli wjace za dwurěčnosć činić
Budyska měšćanska rada je na swojim wčerawšim posedźenju personelnu změnu wobzamknyła. Ta wuskutkuje so tež na zestawu přirady za serbske naležnosće.
Budyšin (CS/SN). Dokelž dotalna Budyska měšćanska radźićelka Annalena Schmidt (Zeleni) hižo w sprjewinym měsće njebydli, wona tež měšćanskemu parlamentej přisłušeć njemóže. Jeje městno zaběra nětko student Jonas Lešawa. Dokelž je Annalena Schmidt tež dźěłowemu kruhej za serbske naležnosće města přisłušała, ju Jonas Lešawa tež w tym gremiju naruna. Tomu su měšćanscy radźićeljo wčera přihłosowali.
Jonas Lešawa bě před lětomaj na Schillerowym gymnaziju maturował a studuje w Drježdźanach politiske wědomosće. Wot lońšeho twori wón w Budyšinje takrjec čoło klimoweho hibanja „Fridays for future“. Wot lońšeho je młody muž tež w Budyskim wokrjesnym sejmiku za Zelenych aktiwny. Na swój nowy nadawk so wón wjeseli, kaž wčera rjekny.
