Wo měrliwej rewoluciji 1989 a wo znowazjednoćenju Němskeje před 30 lětami swědči nětko w Kulowje wosebita wopomnjenska tafla. Při zachodźe do ewangelskeje cyrkwje su ju sobotu wotkryli.
Kulow (AK/SN). Na póndźelnych demonstracijach w Kulowje 1989 je tamniši pozawnowy chór stajnje Lutherowy kěrluš „Jed’n twjerdy hród je naš Bóh sam“ hudźił. Jeho prěnjej lince stejitej na wopomnjenskej tafli, kotruž staj měšćanosta Markus Posch (CDU) a předsyda měšćanskeho zwjazka CDU Mathias Kockert sobotu při zachodźe do Kulowskeje ewangelskeje cyrkwje wotkryłoj. Tajke pomniki pohnuwaja k dopominanju a budźitej pokojnosć a dźakownosć, rjekny farar Gabriš Nawka. Lutherowe linki su wuraz dźakownosće a našeje dowěry, z kotrejž optimistisce do přichoda hladamy, zwurazni Mathias Kockert.
Žana wučba hač do prózdnin
Budyšin. Po tym zo je Budyski wokrjes minjeny pjatk wo zwěsćenych 14 nowych infekcijach z koronawirusom informował, je ličba sobotu wo dalše dźewjeć na 638 rozrostła, kaž z aktualneho přehlada Roberta Kochoweho instituta wuchadźa. W Budyskej Curiejowej zakładnej šuli korony dla hač do nazymskich prózdnin tuž wučba wupadnje. Tež 11. lětnik Wojerowskeho powołanskošulskeho centruma dyrbi doma wostać.
Nowe postajenje płaćiwe
Podstupim. Nowe braniborske serbske postajenje wo narunanju kóštow wotnětka płaći. Wo tym je přisłušne ministerstwo za wědomosć, slědźenje a kulturu dźensa w Podstupimje informowało. Z njej susodny zwjazkowy kraj kulturu a rěčnu mnohotnosć we Łužicy skrući, zdobom pak wuswobodźi komuny z kóštow nastupajo nałožowanje serbšćiny. Serbska rada je postajenju přihłosowała.
97 próstwow dóšło
Šofer-započatkar alkohol pił
Budyšin. Při wobchadnej kontroli předwčerawšim wječor na Nowosólskej dróze w Budyšinje je policija mjez druhim VW zadźeržała. 18lětny wodźer duješe 0,64 promilow do testoweho nastroja. Za započatkarjow w probowym času resp. hač do zakónčenja 21. žiwjenskeho lěta płaći pak striktny zakaz alkohola při wodźenju jězdźidła. Na młodeho muža čaka nětko jednanje přeńdźenja přećiwo porjadej dla. Nimo toho drje so jeho probowy čas jězbneje dowolnosće podlěši, a wón změje so na natwarjacym seminarje wobdźělić.
Pančicy-Kukow. Po něhdźe dwěmaj lětomaj přestawki wot jutřišeho zaso hosći do Klóšterskeje stwički w Pančicach-Kukowje witaja. Kaž nowa wotnajerka Milena Vettrainowa zdźěli, budźe hosćenc wot 11 hodź. wočinjeny a zajimcy budu tam po karće wobjedować móc. Dokelž wjedrarjo rjane wjedro wěšća, budźe tež piwowa zahroda wočinjena a tam hosći wočakuje.
Na rybarski swjedźeń
Radwor. Kupowe towarstwo w Radworju zarjaduje na jutřišim swjatym dnju zaso swój tradicionalny rybarski swjedźeń při kupowym haće. Wot 10 hač do 13 hodź. maja wopytowarjo składnosć, sej runje popadnjene karpy kupić. Nimo toho poskićuja sušenu rybu. Štóž chcył na kupje wobjedować, móže tole tohorunja činić. Čłonojo kupoweho towarstwa poskićuja praženu rybu, hrochowu poliwku a rybičkowe całty.
Njebjelčicy (JK/SN). Na Njebjelčanskich gmejnskich radźićelow njetrjebaš žarliwy być. Wčerawše posedźenje traješe daloko do nocy, při čimž su dwaj wažnej dypkaj dnjoweho porjada samo na přichodne posedźenje přesunyli.
Wujasnjenske wustawki za Njebjelčicy a Miłoćicy a rozjimanja gmejnskeho planowarja Julesa Buitela k zapodatym stejišćam wobydlerjow trjebachu swój čas. W Njebjelčicach běchu wobsedźerjo štyrjoch ležownosćow swoje stejišćo zapodali, w Miłoćicach samo dźewjećo. Buitel hódnoćeše zapřijeće wobydlerjow jako wuraz demokratije Zdobom wón wuzběhny, zo nimaja wujasnjenske wustawki žadyn wliw na přichodne twarske wotpohlady wobydlerjow, ale jeničce tuchwilnu situaciju na wsach wujasnjeja. Ke kóždemu jednotliwemu stejišću bě wobzamknjenje gmejnskeje rady trěbne, prjedy hač su cyłkowne wujasnjenske wustawki za wobě wsy z wjetšinu hłosow radźićelow wobzamknyli.
Přirodoškitarjam drje budu přichodne měsacy we Wojerecach włosy na hłowje stawać, hdyž tam widźa, zo so wulke mnóstwo lisćowcow zhubi. To pak je wjetšeho twarskeho projekta dla trjeba. A zdźěla su tónle zasah do přirody tež hižo wurunali.
Wojerecy (SN/MWj). Podłu Čornicy a Čorneho Halštrowa we Wojerecach su wčera započeli we wulkim stilu štomy pušćeć. Kaž krajne zarjadnistwo rěčnych zawěrow, město Wojerecy a tamniše zastaranske zawody VBH w zhromadnym wozjewjenju pisaja, podrězaja hač do kónca nowembra na nasypje a na pódlanskim škitnym pasmje nimale 200 lisćowcow. W zhromadnym projekće třoch mjenowanych zarjadow budźe nasyp klětu wobšěrnje saněrowany. Štomy pušća zdźěla Wojerowska wodowa mištrownja, kaž priwatna firma informuje.
Potrjechene su štomy podłu Wojerowskej Čornicy a při mosće Čorneho Halštrowa južnje železniskeje čary Hórka–Roßlau. Dalše štomy zhubja so na trasy wodowoda, kotryž chcedźa z nasypa přepołožić.
Budyšin (SN/MWj). Hdyž so z nazymu ćmowy počas započina, so ludźo w normalnych časach hižo poněčim na adwent a z nim zwisowacymi adwentne wiki wjesela. Lětsa pak ničo normalne njeje a hladajo na mjeztym njeličomne wotprajene zarjadowanja so mnozy hižo dawno prašeja, što drje z hodownymi wikami budźe. W Połčnicy na přikład dźě su poprjancowe wiki hižo wotprajene. Nětko je město Budyšin zdźěliło, zo so tudyše 637. Wjacławske wiki, pječa najstarše cyłeje Němskeje, na kóždy pad wotměja. Ale ze změnami.