Dar płuwanskemu towarstwu

wutora, 08. septembera 2020 spisane wot:

Budyšin. Frakcija AfD Budyskeho wo­krjesneho sejmika je Wuchodosakskemu płuwanskemu towarstwu 1 700 eurow přewostajiła. Pjenježny dar zezběrali su z posedźenskich popłatkow čłonow frakcije w zwisku z wurjadnym posedźenjom sejmika nowotwara Kamjenskeje płuwarnje dla.

Předstaji pišćelowu knihu

Budyšin. Přichodny Kofej w třoch w Budyskim Serbskim muzeju budźe srjedu, 9. septembra, w 15 hodź. Tónraz steji rukopisna pišćelowa kniha „Spěwawa ­Jězußowa Wincza“ z pjera Michała Jana Wałdy (1721–1794) w srjedźišću. Referent budźe Alexander Pólk. Zajimcy njech ­přizjewja so pod telefonowym čisłom 03591/270 870 0.

Policija (08.09.20)

wutora, 08. septembera 2020 spisane wot:

35 eurow dla do jastwa

Rakecy. Dokelž swoju pokutu dotal zapłaćił njeje, dyrbješe 48lětny muž z Rakec předwčerawšim do jastwa. Při tym drje jednaše so jenož wo 35 eurow, tež te pak wón njeměješe, jako policisća pola njeho klinkachu. Wo kelko dnjow jastwa so jedna, bohužel znate njeje.

Za zhromadnosću so žedźili

wutora, 08. septembera 2020 spisane wot:

Bórk (JoS/SN). Pjaty Bórkowski wjesny swjedźeń po wožiwjenju tradicije w lěće 2016 bě dołhi čas njewěsty. Hakle w juniju je so wjesny klub Mała Sprjewja jako wuhotowar rozsudźił, hladajo na tehdyše wolóženja korony dla móžnosć swjedźenja pruwować a koncept hygieny zestajeć. „Při planowanju chcychmy kóždežkuli riziko wuzamknyć. Tohodla njejsmy žane zrěčenja z diskotekami a dalšimi zabawjerjemi wotzamknyli. Swój wjesny swjedźeń chcychmy na kóždy pad přewjesć, ale pod tuchwilnymi wuměnjenjemi w mjeńšej formje“, praji čłonka wjesneho kluba Silvana Syckor.

Hižo pjatk wječor minjeny kónc tydźenja zetka so Bórkowska młodźina z młodostnymi z wokolnych wsow, a to w stanje kaž tež wonka. Wšako je sportnišćo wulke dosć. Sobotu běchu starši a młódši na kofej a tykanc přeprošeni. Za to běchu ludźo dźakowni, po tym zo dyrbjachu tajku zhromadnosć wjacore měsacy parować. Nětko móžachu zaso raz z tymi pobachtać, kotrychž hižo dlěši čas zetkali njejsu. Wo tykancowy bazar běchu so wjesne hospozy ze 14 tykancami a tortami starali.

Wětrnik zjawnosći dale pokazuja

wutora, 08. septembera 2020 spisane wot:

Nimo wulkich nadregionalnych a w medijach prezentnych serbskich­ towarstwow mamy w dwurěčnej kónčinje njeličomne mjeńše a małe towarstwa, kotrež runje tak pilne­ dźěło wukonjeja, wo nich pak přewjele njezhoniš. W swojej lětnjej seriji­ lětsa tajke aktiwne cyłki před­stajamy, dźensa Němčanske wětrnikowe towarstwo (19).

Jedyn z mało wětrnikow na kózłach, kotrež dźensa hišće eksistuja, steji w Němcach. Zo bychu jón zachowali a zjawnosći dale pokazowali, załožichu 1996 Wětrnikowe towarstwo. Jedyn z jeho iniciatorow bě Achim Nowak, bywši wučer ­a dźensa agilny čłon towarstwa. Za předsydu wuzwolichu tehdyšeho zastupowaceho Němčanskeho wjesnjanostu Lotara Šefera. Před dwanaće lětami wón funkciju złoži, a wot toho časa zastojnik policije Martin Crüger towarstwo nawjeduje.

Přećiwo hidźe namołwjał

wutora, 08. septembera 2020 spisane wot:

Z kadišom na wosud židowskeje wosady dopominali

Budyšin (CK/SN). Kaž kóždu prěnju njedźelu w septembru su so na Budyskim židowskim pohrjebnišću předwčerawšim zaso kadiš modlili. Z jednym z najwažnišich paćerjow židowstwa dopominachu při rowach Budyskich židow znowa na wosud tych, kotrychž bě nacionalsocialistiski režim zamordował. „Wospjet napominamy stražliwi wostać a so dopominać, kruće stać přećiwo wšitkim pospytam, kotrež chcedźa wotstronić lětdźesatki wupruwowanu němsku demokratiju, a prócować so wo měrliwy kraj a wo wujednanje.“ To rjekny hłowny organizator zarjadowanja Hans-Eberhard Kaulfürst. Po jeho słowach by lochkomyslne zakomdźenje było, drje hidu islamistisko-teroristiskeho swětonahlada wotpokazać, ale so njewobarać łžam, hidźe, hłuposći a ignorancy nacionalistisce myslacych a jednacych ludźi, kotrychž „alternatiwne wěrnosće“ w Němskej a w Europje přiběrajcy wothłós žněja.

Krótkopowěsće (08.09.20)

wutora, 08. septembera 2020 spisane wot:

Dźensa štyrjo, wčera dwaj

Budyšin. Ličba z koronawirusom natyknjenych w Budyskim wokrjesu snadnje přiběra. Dźensa informowaše strowotniski zarjad wo dalšich štyrjoch inficěrowanych, wčera běštaj dwaj. Tak powjetši so cyłkowna ličba na 532 ludźi, 25 je aktualnje schorjenych. 87 wosobow je w postajenej karantenje. Zhorjelski wo­krjes je dźensa jednu nowu infekciju přizjewił, tam maja 46 karantenow.

Młodźinski klub přiwzaty

Chrósćicy. Předsydstwo župy „Michał Hórnik“ Kamjenc přiwza wčera w Chrósćicach młodźinski klub Konjecy/Šunow ze 60 čłonami do swojich rjadow. Tak je štwórty młodźinski klub župje přistupił. Županka Zala Cyžowa a regionalna rěč­nica Katharina Jurkowa matej „to za znamjo wobstajneho womłodźenja Domowiny w regionje a za wuraz dobreho zhromadneho dźěła wšěch generacijow“.

Wjeći so China?

Policija (07.09.20)

póndźela, 07. septembera 2020 spisane wot:

Swědkaj paducha zadźeržałoj

Budyšin. Darmotnje alkohol a žiwidła w hódnoće 23 eurow sobu wzać chcyše młody muž sobotu wječor w kupnicy ­na Budyskej Kamjentnej hasy. 24lětneho běchu při kradnjenju lepili, na čož chcyše wón ćeknyć. Tomu pak zmužitaj swědkaj zadźěwaštaj. Wonaj jeho před kupnicu tak dołho zadźeržeštaj, doniž policija ­njepřijědźe. Přećiwo zajeću so muž chětro wobaraše. Nimo toho bě wón alkoholizowany.

Pěstowarnju dyrbja hišće raz kalkulować

póndźela, 07. septembera 2020 spisane wot:

Tuchwilu najwažniše předewzaće gmejny­ Ralbicy-Róžant so dliji. Krajnoradny zarjad měni, zo twar noweje Ralbi­čanskeje pěstowarnje přewjele płaći. Nětko pytaja za wupućom.

Ralbicy (JK/SN). Horcu, ale přiwšěm konstruktiwnu diskusiju wuwabi na minjenym posedźenju gmejnskeje rady Ralbicy-Róžant informacija wjesnjanosty Hubertusa Ryćerja (CDU) k stawej přihotow nowotwara Ralbičanskeje pěstowarnje. Na wuradźowanju srjedź awgusta w Budyskim krajnoradnym zarjedźe běchu delanskej gmejnje zdźělili, zo su wokrjesej planowane wudawki za nowotwar pěstowarnje we wobjimje 4,7 milionow eurow přewysoke. Tež ličba a zaměry planowanych rumnosćow so zarjadam tak prawje njespodobaja.

Chcedźa deponiju dale powjetšić

póndźela, 07. septembera 2020 spisane wot:

Wurunanske naprawy tež w gmejnomaj Njeswačidło a Bóšicy trěbne

Bóšicy (SN/MiR). Deponiju za wotpadki, kotraž wupřestrěwa so hižo nětko po honach Njeswačanskeje a Bóščanskeje gmejny, chcedźa perspektiwisce powjetšić. Nowu jamu, „hłowne polo“ připrawja mjez ležownosćemi, kotrež hižo nětko deponiju wučinjeja. W běhu přichodnych 55 lět nastanje tam hora, kotraž potom jednotliwe jamy zwjaza. Wo tym zhonichu gmejnscy radźićeljo Bóščanskeje gmejny minjenu srjedu na swojim prěnim posedźenju po lětnjej přestawce.

Wuchodne polo deponije je hižo dlěje napjelnjene a zakryte. To rěka, zo je wjace njewužiwaja. Nětko dźe wo to, płoninu rekultiwować. Kotre rostliny maja ju přichodnje pokrywać, wo tym tuchwilu dis­kutuja. Póda ma z połdrametrowskeje woršty wobstać, tak zo móža tam potom předewšěm kerki a mjeńše štomy rosć.

Najwažniša inwesticija do přichoda

póndźela, 07. septembera 2020 spisane wot:

Wojerecy (KD/SN). Po wjacorych lětach planowanja a twarskeho časa su minjeny pjatk Wojerowsku nowu centralnu wyšu šulu oficialnje přepodali. Hižo prěni dźeń noweho šulskeho lěta, póndźelu, běchu do njeje zaćahnyli, pjatk slědo­waše oficialna swjatočnosć. Na njej wobdźěli so sakski ministerski prezident ­Michael Kretschmer (CDU), kiž bě „wulce zahorjeny wo tym, štož je tule nastało“. Wón chce samo Lipšćanskim studentam pedagogiki poručić, sej kubłanišćo z jeho za Saksku jónkrótnymi móžnosćemi wuknjenja wobhladać.

Předchadne twarjenje noweho kubłanišća běchu wot lěta 1959 jako šulu wužiwali. Hač do 2002 bě tu Zusowy gymnazij zaměstnjeny. Po tym bě dom prózdny. 2016 bě měšćanska rada wobzamknyła, pod pomnikoškitom stejace twarjenje jako nowu wyšu šulu wožiwić. „Přetwar a saněrowanje domu je najwjetša a najwažniša inwesticija do přichoda našeho města, přetož kubłanje je centralna tema w zwisku ze strukturnej změnu“, rjekny Wojerowski wyši měšćanosta Stefan Skora (CDU). Projekt płaćeše dohromady 13 milionow eurow.

Serbska debata

nowostki LND