Žadanje za strukturnej změnu wotdeleka, wot ludnosće, je w Sakskej a Braniborskej dźeń a razniše. W Grodku, hdźež je Christine Herntier měšćanostka a zdobom rěčnica Łužiskeje iniciatiwy, su so tuž z wobydlerjemi zaměrnje rozmołwjeli. Wuslědki zjimachu na zakónčacej konferency.
Grodk (JoS/SN). Prjedy hač je něhdźe 240 wobdźělnikow předwčerawšim w Čornej Pumpje zakónčacu konferencu wotměło, zajimowaše so čoło města Grodka na dźesać wobydlerskich zhromadźiznach za ideje ludźi. „Rozmołwny rjad zaběraše so wot lěća z naprawami, z kotrymiž móhło so město do přichoda jako hospodarske stejnišćo atraktiwniše stać“, rjekny Manuela Kohlbacher z kompetencneho centruma Baršć. Tón je hromadźe z Grodkowskej komunikaciskej agenturu Füller&Krüger a z Körberowej załožbu wobdźělenski proces ke kóncej wjedł. „Dźe-li wo swójsku žiwjensku wokolinu, ludźo najlěpje wědźa, što dyrbi so woprawdźe činić.“
Wobdźělnicy konferency mějachu 109 idejow a pokiwow, kotrež su sydom temowym wobłukam přirjadowali. Žana ideja njebu wotpokazana.
Dalšej nowoinfekciji
Budyšin. Po tym zo bě wčera dźeń bjez nowych natyknjenjow z koronawirusom, informuje krajnoradny zarjad dźensa wo zwěsćenymaj nowoinfekcijomaj w Budyskim wokrjesu. Potrjechenaj staj nawrótnik z dowola a kontaktna wosoba. 17 ludźi je schorjenych, 65 w postajenej karantenje. W běhu sydom dnjow bě dwanaće nowych infekcijow.
Budyski projekt nominowany
Budyšin. Z wjace hač 900 přizjewjenjow je Załožba nebenan.de 107 projektow za Němske susodske myto nominowała. Jedyn tajki projekt je „Bautzen is(s)t solidarisch“ (SN rozprawjachu). 22. septembra chcedźa dobyćerjow kraja wozjewić, z nich wuzwola třoch zwjazkowych lawreatow. Hnydom po tym móža ludźo zdobom online wo publikumowym myće „Coronahilfe“ wothłosować.
Chcedźa ćisy sadźeć
Dietmar Koark skutkuje mjeztym 30 lět jako wjesnjanosta. Wot lěta 1990 do 1995 nawjedowaše wón gmejnu Nowa Łuka-Hory (Neuwiese-Bergen). Wot 1995 je 57lětny prěni muž w gmejnje Halštrowska Hola z jeje wosom wjesnymi dźělemi a 3 400 wobydlerjemi. Wo jeho wobstajnej motiwaciji, wo ćežišćach dźěła kaž tež wo jeho serbskich korjenjach je so z Dietmarom Koarkom Andreas Kirschke rozmołwjał.
Knježe Koarko, dopominaće so hišće na swój prěni dźěłowy dźeń jako wjesnjanosta?
Drěwcy (AK/SN). Jako prěnja wjes we Łazowskej gmejnje maja Drěwcy nětko němsko-serbski system pućnikow za kolesowanske šćežki. Čłonojo wjesneje rady a domizniskeho towarstwa su je tele dny na štyrjoch městnach připrawili. „Smy wjacore lěta wo to wojowali. Stajnje pak pobrachowachu pjenjezy kaž tež wola, a nichtó so zamołwity nječuješe“, měni čłon wjesneje rady Werner Bunk, kiž so tohorunja w domizniskim towarstwje angažuje.
Slepo (AK/SN). Přesydlenska městnosć Nowy Miłoraz sewjernje Slepoho mjez Lěskowskim a Dźěwinskim pućom je w dalokej měrje wotkryta. To zdźěli nawoda twarskeho wotrjada Slepjanskeho zarjadniskeho zjednoćenstwa Steffen Seidlich gmejnskim radźićelam na jich wčerawšim posedźenju. Twarska firma z Krušwicy ma jenož hišće mjeńše dźěła wukonjeć, kotrež běchu při wotewzaću napadnyli. 11. septembra chcedźa płoninu přepodać. Tak móža so potrjecheni wobydlerjo Miłoraza přesydleć započeć.
Za přichodny wjesny towarstwowy dom w Nowym Miłorazu přewjedźechu w juliju idejowe wubědźowanje. Tři planowanske běrowy so na nim wobdźělichu. Po wuhódnoćenju idejow ma nětko Drježdźanski architekturny běrow Horst Schubert projekt planować.
Nimale dozhotowjeny je tež kěrchow za nowe sydlišćo, a to bjezposrědnje pódla Slepjanskeho. Jednohłósnje rozsudźichu so radźićeljo wčera za mjeno „Pohrjebnišćo Miłoraz“. Wot smjertneje njedźele 22. nowembra maja tam chowanja móžne być.
W Nowym Miłorazu maja tři puće, kotrež rěkaja nětko Při nasypje, Při hońtwjerskim hrodźe a Nawjes.
Pos zhubjenu žonu namakał
Hodźij. Tójšto zastojnikow hromadźe ze staflu policajskich psow je předwčerawšim w Chanecach (Cannewitz) pola Hodźija za 63lětnej žonu pytało. Přiwuzny bě zdźělił, zo je wona zhubjena. Wšelakich schorjenjow žony dla hrožeše strach, zo so jej něšto stanje. Tež helikopter nad potrjechenej kónčinu lětaše, najprjedy wšak podarmo. Skónčnje tak mjenowany mantrailer, na pytanje za čłowjekami wukubłany pos, prawy slěd namaka a policistow k žonje wjedźeše. Trochu wochłódnjenu dowjezechu ju do chorownje.