W Brězni pola Kamjenca su wčera na Biskopičanskej dróze nowy dźěćacy dom poswjećili. W nim nasta dohromady 170 městnow w žłobiku, pěstowarni a horće. Dohromady inwestowachu nimale 4,5 milionow eurow. Pódla zachoda při puću při­pra­wichu tohorunja serbski napis „Dźěćacy dom Brěznja ,Při holanskej horje‘“. Foto: Feliks Haza

Při dźěłach Łužiskeje a srjedźoněmskeje towaršnosće hórnistwoweho zarjadnistwa (LMBV) na a při B 97 pola Sprjewineho Doła je so wčera zemja zesunyła. Poprawom chcychu dróhu z tak mjenowanymi wertikalnymi drainsami, kotrež tłóča hač do 15 metrow do zemje, zawěsćić. Nětko pak je so zemja pod njej zesunyła a na njej su fachow­cy za geotechniku škałoby 4 do 6 centimetrow našli. Kaž LMBV připowědźi, wostanje dróha porjedźenja dla znajmjeńša dalše tři měsacy zawrjena. Foto: LMBV

Krótkopowěsće (28.08.20)

pjatk, 28. awgusta 2020 spisane wot:

Nětko pjećo w běhu tydźenja

Budyšin. Z dalšej zwěsćenej infekciju dowoloweho nawrótnika je wčera ličba nowych koronapadow w Budyskim wo­krjesu w běhu minjenych sydom dnjow na pjeć rozrostła. 23 ludźi je w karan­tenje. W Zhorjelskim wokrjesu bě wčera 55 postajenych karantenow. Nowe na­tyknjenja tamniši strowotniski zarjad wozjewił njeje.

Filmowy festiwal digitalnje

Choćebuz. Składnostnje lětušeho 30. jubilejneho wudaća wobdari Choćebuski filmowy festiwal sebje samoho kaž tež cyłu republiku. Podawk, na kotrymž steji wuchodoeuropski film w srjedźišću, budźe dualny a rosće do digitalneho. Filmy móžeš sej w festiwalnym tydźenju wot 3. do 8. nowembra w Choćebuzu, Eisenhüttenstadće, Berlinje, Zhorjelcu, Zgorzelecu a Zielonej Górje w kinje wobhladać, abo digitalnje we wobłuku online- poskitka.

Rozsuda dla přesłapjeny

Policija (27.08.20)

štwórtk, 27. awgusta 2020 spisane wot:

Wjele škody načinili

Komorow. Njeznaći su so w nocy na wutoru do towarstwoweho domu w Komorowje pola Rakec zadobyli. Kaž Zhorjelska policajska direkcija zdźěli, wobškodźichu wjacore wokna a skóncowachu pohiby registrowacu připrawu. Z małeje kasy pokradnychu skućićeljo 200 eurow. Porno tomu wučinja načinjena wěcna škoda na wšě 1 500 eurow. Kriminalna policija nětko pad přepytuje.

Weclich nětko nawjeduje

štwórtk, 27. awgusta 2020 spisane wot:
Kozarcy. Jedna žona a 22 muži je so předwčerawšim na škotowym turněrje serbskich seniorow w Kozarcach wobdźěliło. Dobył je Křesćan Weclich z Nukni­cy z 3 043 dypkami před Wolfgangom Kühnom z Delnjeho Wujězda (2 757) a Geratom Šmelingom ze Šunowa (2 294). Ze swojim dobyćom je so Křesćan Weclich na prěnje městno cyłkowneho hódnoćenja sunył, druhi je Gerat Šmeling a dotal nawjedowacy Manfred Rohark je nětko třeći. Přichodny škotowy turněr serbskich seniorow wotměje so 29. septembra w 14 hodź. w Sernjanach.

Na wjesnym swjedźenišću dźěłali

štwórtk, 27. awgusta 2020 spisane wot:
Wjesny klub, młodźinski klub a wohnjowa wobora w Němcach prošachu wobydlerjow minjenu sobotu na dobrowólne dźěło na wjesnu swjedźensku łuku. Dokelž lětsa koro­napandemije dla wšitke zarjadowanja wupadnychu, so tež předwidźane dźěła na łuce dlijachu. Nětko pak bě na času to nachwatać. Mnozy mužojo, wosebje młodostni, namołwje sćěhowachu. Firmy kaž Němčanski twarski service a Grofic blidarnja z techniku, małym bagrom, traktorom a awtom ćežke dźěło podpěrachu. Tak poło­žichu wodowód za hydrant a natwarichu městno za woheń. Dale ponowichu rejwansku płoninu a wuměnichu saki, kotrež bule wotpopadnu. Hačrunjež dyrbjachu dešćika dla někotre přestawki zapołožić, wšitko dočinichu. Foto: Achim Nowak

Samo do studnje zalězli

štwórtk, 27. awgusta 2020 spisane wot:

Na dźěćacych bibliskich dnjach so z historiskej namakanku zaběrali

Slepo (CK/SN). Jerome, Lennox a Andreas rjedźa kamjenje. Hólcy su cyle zahoriće při wěcy, „dokelž je to cool“, kaž Lennox praji. Hdyž su kamjenje suche, woni je pomoluja. Slepjanska fararka Jadwi­ga Malinkowa mjenuje je „žiwe kamjenje“. W jeje wosadźe wotměchu so wot předwčerawšeho hač do dźensnišeho dźěćace bibliske dny.

„Tři zajimawe dny kołowokoło bibliskeje łódźe“ přewjedu hižo štwórty raz. Stajnje w lětnich abo nazymskich prózdninach dožiwja dźěći zhromadny čas a zaběraja so z wěcami, kotrež w šuli lědma rólu hraja. Přihotowanska skupina do toho temy wupyta. „Wjele wužórli so z toho, štož so we wsy stawa. Tak sej dźěći­ swoju domiznu wotkryja a sej ju bóle waža“, praji Jadwiga Malinkowa. Jónu­ zaběrachu so z pódu, druhi raz na­po­dobnichu z lego-kamjenjemi bibliske stawizny. Loni stejachu bibliske podawki z łódźemi w srjedźišću, při čimž hraješe runje natwarjena archa Noacha na farskej zahrodźe wosebitu rólu.

Zhromadnje zahrodku wožiwili

štwórtk, 27. awgusta 2020 spisane wot:

Nimo wulkich nadregionalnych serbskich­ towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne­ dźěło wukonjeja, wo nich pak přewjele njezhoniš. W swojej lětnjej seriji­ lětsa tajke aktiwne cyłki před­sta­jamy, dźensa Škit Budyšin (16).

Abiturienća lětnika 2000 Budyskeho Serbskeho gymnazija chcychu so najpozdźišo zaso na schadźowance samsneho lěta zetkać. Tomu su w tym lěće a w dalšich swěrni wostali. Na 134. schadźowance, před 12 lětami, mějachu sej znowa wjele powědać. Mjez druhim rozmyslowachu wo tym, kak móhli zhromadnje za byće a traće serbstwa zamołwitosć přewzać. Jako spřećeleny kruh na to wjacore akcije přewjedźechu a na přichodnej schadźowance z wudaćom serbskeho tole­rja na so skedźbnichu. Tež w programach wjacorych schadźowankow sobu skutkowachu.

Dźeń a časćišo wuhladaš na wsach a w městach elektroniske tafle, kotrež ći pokazaja, kak spěšnje runje jědźeš. Nimo toho ći so smějace abo zrudne wobličo „praji“, hač předpisanu spěšnosć dodźeržiš abo nic. Tajku taflu maja tež na Ralbičanskej nawsy, hdźež je 30 km/h dowolenych. Te pak mały Alojs Wjesela ze swojim rolerom docpěł njeje. Foto: Feliks Haza

Derje funguje

štwórtk, 27. awgusta 2020 spisane wot:
Pozdatnje małe wěcy móža druhdy wjele wuskutkować. K tomu słušeja na kóždy pad spěšnosć pokazowace tafle, kaž je mjeztym na mnohich městnach wuhla­­damy. Zwjetša šoferojo spytaja, předpisanu spěšnosć dodźeržeć a zaborzdźa, hdyž su přespěšni a so jim zrudne wobličo pokaza. Mi je to mjeztym kaž mała rańša moti­wa­cija, hdyž po puću na dźěło na Budyskej Tzschirnerowej nimo tajkeje tafle jědu. Kóžde ranje so wjeselu, hdyž so elektro­niska tafla na mnje zasměje, dokelž njejsym wjace hač 30 km/h spěšny był. Tajka tafla bě dlěši čas tež w Prěčecach připrawjena, hdźež najprjedy do jednoho, pozdźišo do napřećiwneho směra spěšnosć měrješe a pokazowaše. Mjeztym pak su ju najskerje na druhe městno Hodźij­skeje gmejny přenjesli. Rjaneho dnja mjenujcy so w Prěčecach hižo nichtó na mnje smjał njeje, znajmjeńša žana elektroniska tafla. A to sym samo tróšku wobžarował. Marian Wjeńka

Serbska debata

nowostki LND