Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. W serialu Serbske Nowiny tule rjad drobnych a małych projektow předstajeja.
Prochnawe a roztłate drjewo je. Barba na dubowych deskach so pušća. Motiw „Braška a njewjesta“ – w lěće 2004 bě ju Běłochołmčanka Maren Behrens molowała a wot Łazowskeje gmejny na prědnim Drěwčaskim křižowanišću při wohnjowobornym domje nastajić dała – chcedźa nětko wobnowić. Domizniske towarstwo Drěwcy 99 z. t. dósta za to z fondsa „Čiń sobu“ něhdźe 900 eurow. „Nam dźe wo wjetše hódnoćenje wjesneho srjedźišća a turizma. To sej wobydlerjo přeja“, měnitaj iniciatoraj Frank Linge a Werner Bunk, wobaj wot lěta 1993 čłonaj Drěwčanskeje wjesneje rady. Werner Bunk běše dlěje hač lětdźesatkaj nawoda tamnišeje wohnjoweje wobory. Frank Linge skutkuje wot lěta 2017 jako wjesny předstejićel za Drěwcy a Lipiny.
Hižo žane infekcije
Budyšin. Połoženje nastupajo infekciju z koronawirusom je w Budyskim wokrjesu dale stabilne. Nichtó njeje tuchwilu schorjeny a w minjenych sydom dnjach njejsu ani jeničku infekciju zwěsćili. Posledni test bě póndźelu. Dwacećo su hišće w karantenje. Dohromady je Budyski wokrjes dotal 503 infekcije zwěsćił, 483 ludźi je so wustrowiło.
Testować so dać
Drježdźany. Wot 1. awgusta chce Sakska na woběmaj lětanišćomaj Lipsk/Halle a Drježdźany dobrowólne a bjezpłatne testy na koronawirus zmóžnić. Testować dać móža so ludźo, kiž so z jězby wróća a kotřiž w Sakskej bydla. Testy poskićeja wosebje tym, kotřiž so z rizikoweje kónčiny nawróćeja a dyrbja do karanteny. Hač do 72 hodźin po nawróće móžeš so tež na lokalnym strowotniskim zarjedźe darmotnje testować dać.
Tež iniciatiwa namołwja
Wopiteho lepili
Kamjenc. Na pózdnim njedźelnym popołdnju je wodźer awta při tankowni na Macherowej w Kamjencu do wabjenskeje tafle zajěł, ale so wo nastatu škodu njestarał. Swědcy tuž za nim jědźechu a informowachu policiju. Zastojnicy 62lětneho krótko na to lepichu a pytnychu, zo bě wón alkohol pił. Při kontroli naměrichu pola njeho 1,66 promilow. Jězbnu dowolnosć a awtowy klučik dyrbješe šofer wotedać a změje so nětko wohroženja nadróžneho wobchada dla zamołwić.
Njebjelčicy. Přichodne posedźenje gmejnskeje rady Njebjelčic wotměje so zajutřišim, štwórtk, w 19.30 hodź. w sydarni tamnišeho gmejnskeho zarjada. Wot zastupowaceho wjesnjanosty Tomaša Klara podpisany dnjowy porjad předwidźi, zo dyrbja sydom wobzamknjenjow ze 16. apryla cofnyć a znowa wobzamknyć. Při tym jedna so wo najwšelakoriše twarske naležnosće, kotrež chcedźa wobydlerjo na swojich ležownosćach zwoprawdźić. Nimo toho chcedźa architektowe zrěčenje za twarski plan noweje bydlenskeje štwórće w Serbskich Pazlicach wotzamknyć.
Z busom do Krupki
Radwor. Hišće hač do pjatka tohole tydźenja móža so zajimcy přizjewić, kotřiž chcedźa srjedu, 12. awgusta, z busom na putnisku Božu mšu do Krupki sobu jěć. Přizjewjenja přijimuje Šmitec wozydłownistwo w Radworju pod telefonowym čisłom 03 59 35 / 28 60.
Wojerecy (SiR/SN). Staroměšćanski bulwar we Wojerecach tež lětsa žiwjenje w měsće wulkotnje wobohaća. To měni mějićelka kofejownje „Rosali“ na Cyrkwinskej hasy Sylvia Hübner. Wona wobkedźbuje, zo wobydlerjo, hosćo a dowolnicy poskitki jara rady přijimaja, byrnjež wobmjezowanja koronapandemije dla trěbne byli. „Wězo je bulwar lětsa hinaši. Wulke swjedźenje pobrachuja, ale tež to je w porjadku. Naša žiwjenska situacija je hinaša, a dyrbimy ju tajku přiwzać. Přiwšěm wuhladam w měsće wjele wjace turistow, dowolnikow a kolesowarjow“, rozprawja Sylvia Hübner.
Runja lońšemu staroměšćanskemu bulwarej změja tež lětsa modowu přehladku, kotruž Sylvia Hübner hromadźe z dalšimi angažowanymi pomocnikami organizuje. Holcy a žony, kotrež pisanu modu Grodkowskeje butiki „For Women“ prezentuja, pochadźeja z kruha swójbnych a přećelow.
Rakecy (JK/SN). Na swojim poslednim posedźenju do lětnjeje přestawki zaběraše so Rakečanska gmejnska rada mjez druhim z temu digitalizacija w tamnišej zakładnej šuli. We wobłuku digitalneho pakta Zwjazka a krajow měješe gmejna hromadźe ze zakładnej šulu nastajić kalkulaciju kaž tež wotpowědny medijowy koncept. Přizwolenu podpěru 63 480 eurow je komuna hižo dóstała. Kak maja pjenjezy nałožić, předstaji nawodnica financneho zarjada Franziska Pfeiffer. Zo ma so to po směrnicach sakskeho statneho ministerstwa za kultus stać, wona wosebje jasnje wuzběhny. Wažne je, zo nošerjo šulow rozumja, što je spěchujomne. Z pjenježnej podpěru hodźa so jeno zakłady za digitalne wužadanje přichodneho šulskeho wukubłanja zwoprawdźić. W konkretnym padźe Rakečanskeje šule to rěka, natwarić a wudospołnić digitalnu syć mjez twarjenjemi a rumnosćemi šule. Jenož to hižo wulki dźěl pjenjez přetrjeba, runje tak kaž trěbny nowy serwer, kotryž budźe přichodnje wutroba digitalneho wobtoka šule.
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Towarstwo swjateje Filomeny. (7)