Spar jemu zahuba był

Wojerecy. Chětro mučny drje dyrbješe paduch być, kiž bě so w nocy na póndźelu w Ćisku do bydlenskeho mobila, kólnje a twarskeho woza zadobył. Wšako njeje daloko přišoł a je sej na susodnej zahrodźe na stólcu wusnył. Wobydler tam spjaceho nańdźe a zawoła policiju. Jej znaty 22lětny pakostnik spyta hišće ćeknyć, ale bjez šansy. Tež rubiznu w hódnoće něhdźe tysac eurow zastojnicy za wottransport spřihotowanu namakachu. Nimo płonowobrazoweho telewizora běchu to mjez druhim DVD-player, kašćik ­piwa a powětrowa klumpa za koleso.

Wojerecy. Pinguiny su prawdźepodobnje žortne a jara zajimawe zwěrjatka. Tuž su wone w zwěrjencach a coologiskich zahrodach wopytowarjam wulka atrakcija. Jutře, štwórtk, w 11 hodź. wotewru we Wojerowskim zwěrjencu znowawuho­towanu připrawu za skupinu dźesać ­pinguinow družiny Humboldt. Zajimcy móža jednaćelej Wojerowskeje towaršnosće za coo, kulturu a kubłanje Arthurej Kusberej, nawodźe zwěrjenca Eugène Bruinsej a techniskemu nawodźe Christianej Trunschej prašenja stajić.

Po Zelenych salonach chodźić

Rogeńc. Wot přichodneje njedźele chcetaj wjerchowka Lucie (Anne Schierack) a wjerch Pückler (Hans Anacker) wopytowarjow po „zelenych salonach“ Rogeńskeho parka wodźić. Tak zhonja woni wo ekscentriskim žiwjenju wjercha a jeho mandźelskeje, kotrež njewotbłyšćuje so jeničce na hrodźe, ale tež na parku. Hodźinske wodźenja budu 5., 12., 19. a 26. julija kaž tež 2., 16. a 30. awgusta, stajnje w 11.30 hodź. Zetkanišćo je kasa do hrodu. Zastup a wodźenje płaćitej 14 eurow na wosobu. Zajimcy njech so pod tel. čo. 0355/ 75 150 abo z mejlku pod service @pueckler-museum.de přizjewja.

Kaž je to poprawom stajnje w 4. lětniku z wašnjom, měješe tež tón Handrija ­Zejlerjoweje šule we Wojerecach za kónc zakładnošulskeho časa rjadownisku jězbu planowany. Koronapandemije dla pak njeje ju přewjesć móhł.

Wojerecy (jab/SN). Rjadowniska wučerka rjadownje 4 a Silwija Wjeńcyna bě připadnje wo akciji Serbskeho Sokoła a spěchowanskeho towarstwa Worklečanskeje wyšeje šule „Michał Hórnik“ zhoniła. Zhromadnje chcedźa tam pjenjezy zběrać, zo móhła na rědki genowy defekt schorjena holca wot noweho šulskeho lěta we Worklecach do šule chodźić. Za to je trjeba wutworić wšelke wuměnjenja, a tak nětko pjenjezy zběraja.

Silwija Wjeńcyna je swojich šulerjow na zaměr předewzaća skedźbniła. Spěšnje zwuraznichu woni za to zajim a informowachu so we wučbje wo chorosći xeroderma pigmentosum. Wažne za po­trjechenych je so wotpowědnje před słónčnymi pruhami škitać. Zdobom je wučerka dźěćom zbližiła, kak ćežko sej pacienća maja wšědny dźeń zmištrować.

Při Bjerwałdskim jězorje móža dowolnicy bórze cyłe lěto přebywać

Hamor (CK/SN). Bjerwałdski jězor čaka z dalšej atrakciju na lětušich dowolnikow. Hišće tule sezonu móža zajimcy w płuwacych domach na jězorje swój dowol přežiwić. Tuchwilu domy hišće wu­twarjeja. Před tydźenjomaj běchu fachowcy štyri po pjatnaće tonach ćežke kabiny na pontony stajili, za čož trjebachu wulki kran. Zo bychu domy kruće zakótwjene byli, zwjazuje je 90 metrow dołha šćežka z pobrjohom.

Nimale dwě lěće je FHG floating house tzwr Berlin na tónle wokomik čakała a za njón dźěłała. Projektowy manager David Heinrich so hišće derje na to dopomina, kak bě so wón w oktobrje 2018 prěni kroć z mištrom přistawa a zastupjerjom gmejny Hamor při jězorje zetkał. Loni w meji bu mustrowy dom w Klětnjanskej marinje wotewrjeny. Wot lětušeho junija hižo dožiwjeja dowolnicy přijomne dny w prěnim płuwacym domje na Bjerwałdskim jězorje.