Wotpisanja načinjeja starosće

srjeda, 03. junija 2015 spisane wot:

Inwestuja lětsa do wopłóčkow, do hłubokotwara a zakładneje šule

Łaz (AK/SN). Dohromady 3,5 milionow eurow chce Łazowska gmejna lětsa do wšelakich naprawow inwestować. Ćežišća su centralne přizamknjenje k wopłóčkam w Běłym Chołmcu, Koblicach a Wulkich Ždźarach, dalše saněrowanje Wulkoždźarowskeje zakładneje šule kaž tež naprawy na pućach a při jězorach. Tole wuchadźa z hospodarskeho plana, kotryž su gmejnscy radźićeljo nětko wobzamknyli.

Runja druhim komunam načinjeja žadane wotpisanja tež we Łazu wulke starosće. Pod smužku hospodarskeho plana steji deficit 277 000 eurow. Po słowach komornicy Mandy Liepert tež přichodne lěta žadyn wurunany etat njezměja. Stanje-li so to dwójce za sobu a su-li wšitke zalutowanske a dochodowe móžnosće wučerpane, ma gmejna hospodarski strukturny koncept zdźěłać, kaž komornica rozłoži.

Sudnistwo jedna rubježnistwa dla

srjeda, 03. junija 2015 spisane wot:
Budyšin (SN). Wulka chłostanska komora Budyskeje wotnožki Zhorjelskeho krajneho sudnistwa zaběra so wot přichodneje póndźele z rubježnym nadpadom, kotryž sta so loni 26. septembra we Wojerecach. Dźensa 23lětny wobskorženy je tehdy dweju młodostneju, kotrajž běštaj z diskoteki ducy domoj, nadpadnył. Hrožo­ jimaj z nožom chcyše wot njeju hódnotne wěcy měć, na čož jemu jedyn z woporow swój handy da. Hrožo z dalšej namocu dźěše wobskorženy sobu do bydlenja jednoho wopora. W nim hrabny wón namakane elektroniske nastroje, mjez druhim kompjuter, a so z nimi zminy. Wobskorženeho su 10. oktobra 2014 zajeli. Wot toho časa sedźi wón w přepytowanskej jatbje.

Spěwarka a spisowaćelka zahoriła

srjeda, 03. junija 2015 spisane wot:

Budyšin (CS/SN). Za wustup w Budyskej měšćanskej bibliotece je wuměnjenje, zo sy swójsku knihu pisał. Angelika Mann jako žona połna energije je to činiła. Informac­ija, zo přijědźe znata spěwarka a nětko tež přiběrajcy dźiwadźelenju so wěnowaca Berlinjanka do Budyšina, postara so tuž wo kopatu połnu přednošowansku žurlu biblioteki.

Šoferojo za tele dźěło dźakowni

srjeda, 03. junija 2015 spisane wot:
Podłu puća wot Koslowa do Njeswačidła je gmejnski dźěłaćer wčera trawu sykł. Štož zda so wšo druhe hač spektakularne być, pak njeje samozrozumliwe. Často pobrachuja komunam personal a pjenjezy, zo móhli tele dźěło wukonjeć. Zwjetša činja to tuž jenož dwójce wob lěto. Šoferojo pak su ćim dźakowniši, hdyž je trawa zaso wotsyčena, přetož tak maja lěpši přehlad wo wobchadźe. Zarosćene kromy puća dobry wid tuchwilu na mnohich městnach zaraćeja. Foto: SN/Maćij Bulank

Krótkopowěsće (03.06.15)

srjeda, 03. junija 2015 spisane wot:

Nowe towarstwo załožili

Budyšin. „Willkommen in Bautzen“ rěka towarstwo, kotrež su wčera w Budyskim Kamjentnym domje załožili. Iniciatorojo su čłonojo zwjazkarstwa „Budyšin wostanje pisany“. Za předsydu wuzwo­lichu Svena Scheidemantela. W Fisch­bachu bydlacy je sobustaw Budyskeho wokrjesneho sejmika za frakciju Lěwica.

Biskop Koch woteńdźe

Berlin/Drježdźany. Katolski biskop Drježdźansko-Mišnjanskeje diecezy dr. Heiner Koch ma so po informacijach powě­sćernje dpa z nowym Berlinskim arcybiskopom stać. 59lětny nastupi naslědnistwo Rainera Marije Woelkeho, kiž bě loni w septembru do Kölna wotešoł. Heiner Koch je wot lěta 2013 biskop w Drjež­dźanach a je sej tam mjeztym wjele připóznaća zdobył.

Čěska česći Jana Husa

Praha/Husinec. W zwisku z bližacej so 600. róčnicu spalenja nabožinskeho reformatora Jana Husa wotměwaja so w Čěskej republice wjacore zarjadowanja na jeho česć. Čěska telewizija wusyłaše minjene dny nowy třidźělny hrajny film wo idealach a tehdyšej dobje Husa. W jeho ródnym měsće Husinecu su wopomnišćo ponowili.

Policija (03.06.15)

srjeda, 03. junija 2015 spisane wot:

Jitro. Ćežkozranjeny a wulka wěcna škoda staj wuslědk wobchadneho nje­zboža wčera popołdnju na statnej dróze S 95 mjez Jitrom (Milstrich) a Křidołom (Schiedel). Tam dyrbještaj 62lětny wodźer Forda a 36lětny wodźer Audija čakać, dokelž běštej sej do toho transporteraj tak blisko přišłoj, zo so z lěwymaj špihelomaj dótknyštej. 80lětny šofer Mercedesa pak to po wšěm zdaću přepozdźe spózna a zrazy bjez spinanja do Audija, kotryž bu při tym do před nim čakaceho Forda stłóčeny, a tón do připowěšaka jednoho z transporterow. Na nim stejace awto so tohorunja wobškodźi. Mjeztym zo so wodźer Audija jeno snadnje zrani, dyrbjachu šofera Mercedesa z ćežkimi zranjenjemi do chorownje dowjezć. Škoda wučinja 60 000 eurow.

Dypkownje k wčerawšemu dnjej dźěsća přepodachu Němčanskej pěstowarni „Pumpot“, kotraž je w nošerstwje Serbskeho šulskeho towarstwa, powjetšene hrajkanišćo. Po tym zo bě tam před lětami hižo Pumpotowe hrajkanišćo nastało, maja nětko dźakowano­ spěchowanskim srědkam tež wosebity wobłuk za žłobikowe dźěći. K tomu słušeja pěskowy kašćik, kombinacija ke krosnow­anju a suwanju kaž tež čumpjel. Bjez dźiwa, zo chcychu holcy a hólcy hnydom wšitko wuspytać. Foto: Ulrike Herzger

Lodowa kofejownja w parku wabi

wutora, 02. junija 2015 spisane wot:

Njeswačidło (ML/SN). Swójba Marko z Łuha wobhospodarja wot 1. meje lodowu kofejownju „Oranžerija“ w bywšim kuchinskim pawiljonje Njeswačanskeho parka, kotruž bě něhdyša wotnajerka lon­i zawrěła. Hižo prěni dźeń kaž tež minjene­ kóncy tydźenja, na Bože spěće a swjatki­ knježeše wulki nawal hosći zbliska a zdaloka. Wosebje Drježdźa­njenjo rady po kolesowanju po krajinje hole a hatow kaž tež druzy wulětnikarjo po wuchodźowanju po Njeswačanskim parku w baroknym a jendźelskim krajnym stilu, po wopyće Stareho hrodu z lěta 1723 z małej galeriju abo po wob­hladanju wjesneho muzeja do kofejownje załožeja.

W pawiljonje napřećo přirodoškitnej staciji je nimo rumnosćow stawnistwa a turistiskeje informacije znowa wuhotowana lodowa kofejownja. Při přijomnym wjedrje wšak hosćo tež rady za blidami před njej a pod štomami parka sedźa. W nadawku wójwody Friedricha Ludwiga Württembergskeje twarjeny pawiljon bu něhdy z keramiskimi kachlemi tepjeny, a eksotiske rostliny w nim přezymowachu. Tohodla je najenk Steffen Marko kofejownju­ „Oranžerija“ pomjenował.

Młodostni porjeńšeja wsy

wutora, 02. junija 2015 spisane wot:

Za 48hodźinsku akciju w Chrósćicach samo myto dóstanu

Budyšin (CK/SN). Přirodźe bliska zahroda ma zapřichodny kónc tydźenja při Chróšćanskej pěstowarni nastać. Dźěći, starši a młodostni ze wsy chcedźa zeleninowe hrjadki zapołožić, stan z witkow, płót, ławku a insektowy hotel natwarić. Za 48hodźinsku akciju wot 12. do 14. junija su sej šulerjo Worklečanskeje wyšeje šule „Michał Hórnik“ nalětnje rjedźenje wokoło swojeho kubłanišća předewzali, Łupjanska młodźinska wohnjowa wobora ponowi kubłansku rumnosć, a Ra­dworski młodźinski klub porjeńši swoje rumnosće. Smječkečanski młodźinski klub wobarbi hrajkanske nastroje a ławki před wjesnym klubom, młodźinska wo­hnjowa wobora Lejno pola Wojerec pomha serbski domizniski dźeń přihotować a runje hakle załožena młodźinska wobora w Minakale twari insektowy hotel.

Kulow (AK/SN). Swoje wohnjowe wobory chce město Kulow solidnje wuhotować. Tole předwidźi dalewjedźenje wohnjowoborneho plana města, kotryž je tamniša měšćanska rada na swojim zašłym posedźenju schwaliła. Prěni tajki plan běchu 2009 wobzamknyli. Kóžde pjeć lět ma so wón dale wjesć a aktualizować.

Wot lěta 2013 je wohnjowa wobora cyłu wodowódnu syć komuny analyzowała. Tak nětko wědźa, kelko hašenskeje wody je na kotrym dypku k dispoziciji. „Wulke ćežišćo je meblowy zawod Maja. Do wohnjowoborneho plana smy nětko dokładnje zapisali, zwotkel móžemy tam wodu brać, a wěmy, hdźe maja w zawodźe awtomatiske hašenske systemy, nasćěnowe hydranty a dalše připrawy“, rozłožuje nawoda Kulowskich wobornikow Jurij Brösan. W nuzowym padźe móža tuž spěšnje zakročić. W měsće a na wokolnych wsach su tež tajke sensibelne dypki zwěsćili, hdźež je často wjele ludźi. K tomu słušeja wobě šuli, pěstowarnje, starownje a hladarnje, Sulšečanski młyn a tamniša pjekarnja. Na teritoriju města maja dale zwjazkowu dróhu, dwě statnej a štyri wokrjesne dróhi. Tež wone płaća jako potencielnje strašne dypki.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND