Budyšin (CS/SN). Nowy móst za pěškow nad Sprjewju bě jedna z temow njedawneho posedźenja Budyskeje měšćanskeje rady. Kaž wyši měšćanosta Alexander Ahrens (SPD) radźićelam zdźěli, chcedźa na přichodnym posedźenju parlamenta 17. julija w njezjawnym dźělu aktualny staw planowanja předstajić. Po tym přewjedu nowinarsku konferencu, zo bychu tež zjawnosć informowali.
Wyši měšćanosta so nadźija, zo prawje wjele wobydlerjow swoje měnjenje w socialnych syćach abo na internetnej stronje města wozjewi. Ludźo, kotřiž maja wobmyslenja, měli je prošu wozjewić. Jeli so hižo w tejle fazy wobdźělenja wobydlerjow wukopa, zo wjetšina nowotwarej mosta přihłosuje, móhli so ewentuelnje wobydlerskeho rozsuda wzdać. Z próstwu frakcije AfD wo wobydlerskim rozsudźe chcedźa so na posedźenju měšćanskeje rady w septembru zaběrać.
Komuny sej tuchwilu zawěrno lochko nimaja. Dokelž wotpadnje wulki dźěl dochodow z přemysłoweho dawka, maja wone mjenje w kasy hač minjene lěta. Přiwšěm spytaja to abo tamne inwestować.
Rakecy (JK/SN). Loni su so w Rakečanskej gmejnje z twarskimi a ponowjenskimi naprawami a dalšimi inwesticijemi chětro wróćo dźerželi. Su sej wšitko derje přihotowali, a lětsa so nětko z połnej paru do dźěła dadźa.
Helga Schubert wuznamjenjena
Celovec. Myto Ingeborg Bachmann dósta wčera w Berlinje rodźena spisowaćelka Helga Schubert. 80lětna je so z tekstom wo ćežkim poćahu mjez maćerju a dźowku přećiwo 13 dalšim kandidatam přesadźiła. Hižo 1980 bě Schubert přeprošena na čitanje we wobłuku z 25 000 eurami dotěrowaneho wuznamjenjenja, kotrež płaći jako jedne z najwažnišich němskorěčneje literatury. Tehdy pak njesmědźeše wona z Němskeje demokratiskeje republiki do wukraja jěć.
Serbska rada w livestreamje
Podstupim. Dohromady 72 zajimcow je minjeny pjatk na internetnej stronje Krajneho sejma Braniborskeje posedźenje Rady za naležnosće Serbow prěni raz přez livestream sćěhowało. Hačrunjež činjachu to wobmjezowanja koronakrizy dla – wopytowarjam je tuchwilu zakazane w twarjenju krajneho sejma přebywać –, su nětko techniske wuměnjenja date tež dalše posedźenja rady live wusyłać.
Ćahi zaso normalnje jězdźa
15lětnu křiwdźili
Wojerecy. Pasanća běchu srjedu nawječor swědcy, kak so mužej w starobje 26 a 32 lět a 29lětna žona na přibrjoze Šibojskeho jězora 15lětneje přimaja a ju křiwdźa. To wobkedźbujo přihladowacy hnydom policiju zawołachu. Při kontroli zastojnicy zwěsćichu, zo běchu njeskutka podhladni z pokradnjenymaj kolesomaj po puću, a jich nachwilnje zajachu.
Ralbicy (JK/SN). Nimale štyri hodźiny traješe wčerawše posedźenje gmejnskeje rady Ralbicy-Róžant w sydarni Ralbičanskeje šule. Započinali běchu z njezjawnym dźělom a po hodźinje pokročowachu ze zjawnym posedźenjom. Wulki dźěl toho zabra přednošk dr. Andreasa Stowassera z planowanskeho běrowa w Radebeulu, kiž radźićelam rozłoži, kak maja při nastajenju plana k hladanju a wobhospodarjenju wodźiznow 2. rjadu postupować. Wšako ma tež gmejna Ralbicy-Róžant nadawk, so wo tajke wodźizny starać a je přirodnje a wobswětej přiměrjenje wobhospodarjeć. Za to dóstawa wot lońšeho wot swobodneho stat Sakskeje na kóždy kilometer 500 eurow. W gmejnje maja 30 kilometrow wodźiznow 2. rjadu, a z pomocu planowaneho postupowanja chcedźa z tym zwjazane naroki a žadanja spjelnić.
Pančicy-Kukow. W nowym šulskim lěće poskići Rěčny centrum WITAJ znowa zakładny kurs serbšćiny za staršich serbšćinu wuknjacych dźěći a dalšich zajimowanych dorosćenych. Kurs wotměje so wot 7. septembra 2020 hač do 18. januara 2021, stajnje póndźelu wot 19 hač do 20.30 hodź. w Šuli Ćišinskeho w Pančicach-Kukowje. Přizjewjenja přijimuje RCW e-mailnje pod abo pod telefonowym čisłom 03591/ 550 400.
Wabjenski film zestajeli
Zhorjelc. Wokrjesna hudźbna šula Třikrajowy róžk je imageowy film zestajała. Hudźbnicy, spěwarjo, dalši wuměłcy a ludźo z Łužicy a za jeje mjezami, kotřiž so ze swojej domiznu zwjazani čuja, su so na projekće „Tak dźe Sakska“ wobdźělili. Wabjenski film na woblubowany spěw wo Hornjej Łužicy bu krótkodobnje zwoprawdźeny a je na internetnej stronje hudźbneje šule třikrajoweho róžka widźeć. Zajimcy móža sej jón pod https://kreismusikschule-dreilaendereck.de/oberlausitzlied wobhladać.
Wosebity program k jubilejej
Za dwurěčne wuswědčenja
Podstupim. Šulerska rada wokrjesa Sprjewja-Nysa je iniciatiwu za dwurěčne němsko-serbske wuswědčenja nastorčiła. Jeje předsyda Justin Pigol je ju dźensa na posedźenju Rady za naležnosće Serbow w Podstupimje předstajił. Šulerska rada bě zwěsćiła, zo jenož w Delnjoserbskim gymnaziju Choćebuz a w Bórkowskej šuli „Mina Witkojc“ braniborske zarjadniske postajenje nastupajo dwurěčne wuswědčenja na kubłanišćach ze serbskej wučbu dodźerža.
Dalšu infekciju zwěsćili
Budyšin. Mjez 46 testami su w Budyskim wokrjesu wčera dalšu infekciju z koronawirusom zwěsćili. Cyłkowna ličba natyknjenych je wot wčerawšeho dale 501. Po dźensnišim stawje su tři wosoby schorjene. Aktualnje je 45 wosobow w karantenje.
Rekordne wobydlerstwo
Wiesbaden. Zwjazkowy statistiski zarjad je rekordnu ličbu wobydlerjow Němskeje zwěsćił. Loni zličichu dohromady 83,2 milionaj ludźi, štož je něhdźe 15 000 wjace hač lěto do toho. Najwjetši bě rozrost w Berlinje, porno tomu je so ličba wobydlerstwa w Durinskej, Saksko-Anhaltskej a Posaarskej najbóle pomjeńšiła.
Składnosć znjewužiwali
Kamjenc. Njeznaći su předwčerawšim w Kamjencu njekedźbliwosć wobsedźerja wosoboweho awta, kiž bě wokno na prawym boku jězdźidła jeno přizačinjene wostajił, šamale znjewužiwali. Skućićeljo sahnychu přez wokno a wotamknychu durje. Na to spakosćichu ručnu tobołku, w kotrejž běchu 60 eurow, wupokaz a dalše wosobinske wěcy wobsedźerja. W tym zwisku policija na to skedźbnja, zo je minjeny čas wjacekróć k tajkim deliktam dóšło. Šoferojo a sobujěducy měli na to kedźbować, zo w awće žane hódnotne wěcy widźomnje ležo njewostaja.