W nocy wokoło so třěleli
Pančicy-Kukow. Kedźbliwy swědk bě w nocy na póndźelu w Pančicach-Kukowje słyšał, zo něchtó třěla, a je tuž policiju alarmował. Zastojnicy zwěsćichu tam krótko do połnocy štyri wosoby w starobje 16 do 32 lět. Tři z nich běchu chětro alkoholizowane. Pola nich naměrichu mjez jednym a 2,40 promilemi alkohola. W bliskim kerku namakachu policisća dwě trašawce a powětrowku, kotrež běchu lepjeni tam spěšnje schowali. Jako podhladneju identifikowachu młodeju muži w starobje 19 a 32 lět. Žanu dowolnosć, někajku bróń wobsedźeć směć, wonaj předpołožić njemóžeštaj. Tak je policisća sćazachu. Kriminalna policija so z padom nětko zaběra a přepytuje přeńdźenja přećiwo zakonjej wo brónjach dla. 16lětneho młodostneho přepodachu zastojnicy hišće w samsnej nocy jeho staršimaj.
Chrósćicy (SN/MWj). Tójšto ćopłeho dešća našło je so takrjec wčera w Chrósćicach. Wězo nic w formje kapkow, kotrež sej wjesnjenjo runja druhim přeja, ale za to šwarneje sumy pjenjez. Tajku stej Chróšćanska gmejna a Hórčanske wjesne towarstwo „Při skale“ we wobłuku sakskeho wubědźowanja „simul+“ dobyłoj. A wopismje přinjesł je sakski minister za regionalne wuwiće Thomas Schmidt, kiž je na přeprošenje zapósłanca krajneho sejma Alojsa Mikławška (wobaj CDU) w jeho wólbnym wokrjesu přebywał.
Hórčenjo móža sej nětko za 5 000 eurow grilowansku hětu jako zetkanišćo wosrjedź wsy natwarić. Nastać ma wona pódla tamnišeho hrajkanišća při gratowni wohnjoweje wobory, rozłoži čłonka předsydstwa towarstwa „Při skale“ Katharina Jurkowa.
Brětnja-Michałki. Srjedź awgusta planowane lětuše 43. němsko-serbske swjedźenske hry w Brětni-Michałkach w tym času njebudu. Hinak hač druhdźe, hdźež su podobne podawki lětsa dospołnje wotprajili, pak wjesna rada wo tym rozmysluje swjedźeń přestorčić. Móžny termin móhł być kónc tydźenja srjedź abo kónc septembra, praji wjesny předstejićer Lothar Kujasch. Na kóždy pad pak dyrbja program přikrótšić. Kujasch móhł sej předstajić, zo zahaja swjedźeń sobotu wječor z korčmowym kwisom, štož je na lońšej premjerje dobry wothłós žnjało. Njedźelu móhli Božu słužbu w bróžni swjećić a program serbskeje rejwanskeje a drastoweje skupiny pokazać.
Wobdźěla so na swjatku hudźby
Wojerecy. We wobłuku staroměšćanskeho bulwara wobdźěli so město Wojerecy přichodnu njedźelu na Fête de la musique. Kaž stajnje na najdlěšim dnju lěta wotměja so po wšěm swěće nadróžne hudźbne akcije, kotrež je francoski kulturny minister Jack Lang 1981 do žiwjenja zwołał. We Wojerecach chcedźa 21. junija w času wot 16 do 21 hodź. pod hołym njebjom hudźić.
Twarske dźěła pozdźišo
Porjad a wěstotu we wšědnym žiwjenju zaručić je prěnjorjadny nadawk policije. Tež sakska wěstotna straža w tym wobłuku wažnu funkciju wukonja. Za nju pytaja nětko zesylnjenje.
Budyšin (SN/MWj). Za rewěry Budyšin, Kamjenc, Wojerecy, Zhorjelc, Žitawa-Horni kraj a Běła Woda pyta Zhorjelska policajska direkcija zajimowane žony a zajimowanych muži w starobje 18 do 60 lět, kotřiž chcyli so jako čłonojo sakskeje wěstotneje straže čestnohamtsce wo zaručenje zjawneje wěstoty a porjada sobu starać.
Kaž w nowinskim zdźělenju policajskeje direkcije rěka, zasadźa jich předewšěm popołdnju, po zažnych wječorach, kónc tydźenja a swjate dny. Přisłušnicy wěstotneje straže podpěruja policajski rewěr hłownje z patrulju na hrajkanišćach, w parkach, zahrodkownišćach a bydlenskich štwórćach. Woni smědźa w nuznych padach zakročić, woprašowanja přewjesć a při mylenjach tež identitu ludźi zwěsćić. Čestnohamtscy přisłušnicy sakskeje wěstotneje straže maja k swobodnemu statej zjawnoprawniski słužbny poměr, kaž w nowinskej zdźělence dale rěka.
Stróža (SN/MWj). Runja njeličomnym dalšim zarjadowanjam stanu so lětsa tež planowane 23. němsko-serbske přirodowe wiki, kotrež mějachu so 12. septembra w Stróži pola Hućiny wotměć, z woporom koronapandemije a wěstotnych postajenjow. To je zarjadnistwo biosferoweho rezerwata Hornjołužiska hola a haty zdźěliło.
„Rozsud, kotryž njebě za nas jednory, jara wobžarujemy. Ale při wočakowanej wulkej ličbje hosći a wobmjezowanym městnje na dworje zarjadnistwa so koncept hygieny z rjadowanjom wotstawka a dalšimi předpisami zwoprawdźić njehodźi. Nimo toho dyrbi za organizaciju wikow přirody ze zwučenym kulturnym a kubłanskim programom do toho planowanska wěstota knježić. Dokelž tule wěstotu lětsa nimamy, chcemy swoje ideje a dotalne plany na klětu přewzać. Tež alternatiwne zarjadowanja, wo kotrychž smy minjeny čas rozmyslowali, so bohužel zwoprawdźić njehodźa“, rozłožuje nawoda zarjadnistwa biosferoweho rezerwata Torsten Roch w nowinskej zdźělence.
Berlin (dpa/SN). Tak mjenowana korona-app je wot dźensnišeho darmotnje wužiwajomna. Kaž zwjazkowe knježerstwo wčera zdźěli, ma wona pomhać rozšěrjenju koronawirusa w Němskej zadźěwać, dokelž hodźa so z njej w nuzowym padźe kontakty inficěrowanych wosobow zwěsćić. Tuž je wažne, zo telko ludźi kaž móžno app za mobilne telefony wužiwa. Při tym njeńdźe wo to zwěsćić, hdźe je štó hdy był, ale wo to, ludźi, kotřiž su blisko natyknjeneje wosoby byli, warnować, zo su so snano sami z wirusom natyknyli.
Warnowanska app njemóže tomu zadźěwać, zo so sam z wirusom natyknješ. Wona njenaruna ani płaćiwe směrnicy nastupajo dodźerženje wotstawka ani prawidła hygieny. Wona ma dotalne naprawy přećiwo wirusej wudospołnić, z tym zo kontaktne rjećazy pozitiwnje testowanych wosobow přetorhnje.
Nikoho w Němskej njenuzuja korona-app na swojim mobilnym telefonje instalować. To je ryzy dobrowólny rozsud. Zasadnje pak płaći: Čim wjace ludźi app na swojim smartfonje instaluje, ćim wjace z nich móže tónle přidatny škit wužiwać a ćim dokładnišo a wobšěrnišo hodźa so kontakty wuslědźić.
Dalšu infekciju zwěsćili
Budyšin Mjez 59 testami, kotrež su w Budyskim wokrjesu přewjedli, zwěsćichu wčera dalši pad koronainfekcije. Ličba natyknjenych wučinja nětko dohromady 500. Aktualnje je dźesać schorjenych, pjatnaćo su w karantenje. 471 wosobow je so mjeztym wustrowiło, 19 pacientow je zemrěło.
Pomoc za sakske pomniki
Berlin/Drježdźany. Z 826 000 eurami spěchujetej Zwjazk a Sakska w zwisku z programom „Narodne hódne kulturne pomniki“ štyri sakske pomniki. Z pjenjezami chcedźa židźanu tapetu chinskeho kabineta na hrodźe Wildenfels a špundowanje w modlerni Ochranowskeje bratrowskeje wosady wobnowić. Dale maja so w Drježdźanach narowne pomniki na ewangelskim Janskim a Eliasowym kaž tež na bywšim kěrchowje cyrkwje Našeje knjenje zwuporjedźeć.
Šupy a nercy třěleć dowolene