Rjemjeslniske wiki z nowosćemi
Čorna Pumpa (JoS/SN). Połny wuspěch běchu sobotu a njedźelu rjemjeslniske wiki při tak mjenowanych kolijach 19 w Čornej Pumpje. Nalětnje wjedro a wulka paleta rjemjeslnikow najwšelakorišich směrow stej wjele ludźi přiwabiłoj. Mnozy rjemjeslnicy přichadźeja kóžde lěto znowa a poskićeja mjez druhim wšo, štož zahrodkar w nalěću trjeba.
Prěni raz pódla bě zhotowjerka šokolady a pralinow Cindy Welz z braniborskeho Veltena. Hakle w oktobru je wona swoje předewzaće załožiła. Dźensa zhotowja wona w ručnym dźěle 30 družin šokolady a pralinow. Te so jej po wšěm zdaću tak derje radźa, zo bu lětsa z mytom „German Chocolate Award“ wuznamjenjena.
Hotowy krimi je so zašłe dny při Worklečanskim kupowym haće ...
Wo energijowej změnje so wobhoniła
Krótkopowěsće (09.04.24)
Spočatk abiturneho pruwowanja Drježdźany. Za 10 674 šulerjow a šulerkow w Sakskej zahaja so dźensa abiturne pruwowanja z předmjetomaj ewangelska a katolska nabožina. Ertne pruwowanja wotměwaja so wot 26. meje. Konkretne terminy šule same postajeja. 2 718 maturantkow a maturantow powołanskich gymnazijow nastupi 16. apryla do pruwowanskeho časa.
70 próstwow dóšło
Budyšin. Za projektowe spěchowanje lětsa w druhim połlěće předleži Załožbje za serbski lud po kóncu požadanskeje doby 31. měrca 70 próstwow. Spěchowanski wolumen wučinja nimale 332 000 eurow, załožba wčera informowaše. Załožbowy zarjad próstwy pruwuje, fachowa přirada 16. meje wo přizwolenju předewzaćow rozsudźi. Na to zapodawarjo zhonja, hač budźe jich projekt spěchowany abo nic.
Zastaranje z wodu zaručić
Informacije kritisce přepruwować
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (42).
„Při rizikach a pódlanskich wuskutkach wobroćće so na swoju lěkarku, swojeho lěkarja abo na lěkarnika“, so we wabjenju nastajnosći prěduje. Tola dźensa je to hustohdy hakle druha opcija. Wjele spěšnišo docpějomny je mjenujcy fachowc, kiž so woprawdźe we wšěch wobłukach wuznawa: dr. Google. Dr. Google je nam dźeń wote dnja wot ranja hač do wječora k dispoziciji. Wšojedne što maš, dr. Google móžne diagnozy a ewentuelnje samo terapije wuplunje. Na jednym boku je to dosć wužitne: chori informuja so najprjedy jónu sami a zamóža tak wotwažować, hač so wopyt pola lěkarja abo w apotece scyła wudani. Hdyž tam potom tola du, su přihotowani. Na tamnym boku pak zamóže dr. Google tež nadměru znjeměrnjeć. Štóž nima nazhonjenjow z medicinskimi rešeršemi, toho dr. Google rady na wopačnu šćežku wjedźe. Ewentuelnje samo njewoprawnjene strachi wulce nješkódneje choroby dla wudyrja.
Wužrawanje jejkow wuspytali
Poradźuje darmotnje
Budyšin. Prawiznik a wokrjesny radźićel Lěwicy Hajko Kozel poskići srjedu, 10. apryla, wot 15 do 17 hodź. dalši raz darmotne socialne poradźowanje. Wone hodźi so tohorunja w serbskej, ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja so pod telefonowym čisłom 035932 363727.
„Jězba z wobrazami“
Kamjenc. Muzej zapadneje Łuzicy w Kamjencu přeproša wutoru, 9. apryla, na přednošk „Greifvögel Deutschlands – Eine Reise in Bildern“. Přirodoškitar a fotograf Torsten Pröhl chce zajimcam „swět pazorakow z fascinowacymi wobrazami“ zbližić. Połdrahodźinske zarjadowanje wotměje so we wobłuku aktualneje wosebiteje wustajeńcy „Deutschlands wilde Greife“ a započnje so w 19 hodź., zastup płaći 3,50 eurow resp. potuńšeny 2 euraj.
Policija (08.04.24)
Jehnjo z pastwy pokradnyli
Kulow. Móhłrjec pojutrownu rubiznu su sej njeznaći w Kulowje wupytali. Tam je so w nocy na pjatk młody boran z pastwy na Koćinskim puću zhubił. Jehnjo z čornej hłowu měješe po informacijach policije hódnotu něhdźe 150 eurow. Kriminalna słužba pad přepytuje.
Wostanje magnet za kulturu
Łužisku halu za 20 milionow eurow energetisce saněruja
Wojerecy (KD/SN). Skónčnje je dołhe čakanje za Wojerowsku Łužisku halu a za Měšćanske hospodarske zawody Wojerecy (SWH), kotrež ju wobhospodarjeja, nimo. Próstwa wo spěchowanje za wobšěrne energetiske saněrowanje před 40 lětami jako Dom hórnikow a energijownikow natwarjeneho kulturneho templa je nětko přizwolena. Pjenjezy přinošuja, zo Łužiska hala dale jónkrótny magnet za naročne wuměłstwo, wysoku kulturu a wulke kongresy w regionje wostanje, praji Wojerowski wyši měšćanosta Torsten Ruban-Zeh (SPD) pjatk při přepodaću spěchowanja. „Ludźo jenož sem přićahnu, hdyž namakaja tu dobre dźěło a žiwjenja hódnu wokolinu“, wón rjekny.
Pěstowarnja gmejnu dale zaběra
Njeswačidło (UM/SN). Lěto 2024 steji w Njeswačanskej gmejnje runje tak kaž zašłe lěta cyle w znamjenju twara noweje pěstowarnje. Hinak pak hač wočakowane njeje so regionalny přewodźenski wuběrk za strukturnu změnu na swojim minjenym posedźenju w nowembru 2023 z tymle projektom zaběrał. „Dyrbjachmy podłožki dale kwalifikować a dalše přidźěła zapodać“, rozłoži Njeswačanski wjesnjanosta Gerd Schuster (CDU).
Paralelnje k tomu wjedźechu planowanje hač k fazy 3, potajkim hač k planowanju naćiska dale, štož su mjeztym zakónčili. „Z tym mamy nětko dokładne ličby wo financowanju projekta“, wjesnjanosta wobkrući. Po dorěčenju z planowanskim běrowom a nawodnistwom pěstowarnje chcedźa swój projekt nětko w meji 2024 regionalnemu přewodźenskemu wuběrkej zapodać a lětsa nazymu prezentować. Po słowach Gerda Schustera je gmejna mjeztym wjace hač 300 000 eurow do planowanja inwestowała.
