Parkowanišćo a permakultura

póndźela, 18. meje 2020 spisane wot:
Na Halštrowskej dróze, při Krabatowym kamjenju, na kromje Miłočanskeje skały, maja nětko parkowanske městna za wosobowe awta. Njebjelčanske towarstwo ­Kamjenjak je ideju w kooperaciji z gmejnu krótkodobnje zwoprawdźiło. Při tym su wobkedźbowali, zo wutworja parkowanišćo po principje permakultury. Tak zwo­zychu tam sobudźěłaćerjo socialneho projekta, kotrehož nošer je Mjezynarodny zwjazk w Frankfurće nad Wódru z wotnožku w Kamjencu, přirodne materialije kaž zdónki a hałzy, zo móhli na nich wšelake rostliny rosć a zwěrjata so zasydlić. Foto: Feliks Haza

Budyšin (SN). Klaus Kanzler z Hodźija je „čestnohamtski měsaca meje“ we wo­krjesu Budyšin, kaž tudyši krajnoradny zarjad informuje. Krajny rada Michael Harig (CDU) je minjenu srjedu zhromadnje ze społnomócnjenej wokrjesa za čestne zastojnstwa Dunju Reichelt Hodźijčana za wurjadny angažement za domiznu Hodźij wuznamjenił.

„Klaus Kanzler ma wulku wutrobu za swoju domiznu Hodźij, a tak njezadźiwa, zo hižo dołho w předsydstwje Hodźijskeho domizniskeho towarstwa sobu skutkuje“, rěka w zdźělence wokrjesa. Kanzler zasadźa so za to, skutkowne stawizny gmejny zwobraznić, tradicije hajić a towarstwowe žiwjenje aktiwnje wuhotować. Mandźelska jeho při tym sylnje podpěruje. „Z tójšto entuziazmom a wulkim zasadźenjom nastachu pod jeho nawodnistwom na přikład wustajeńca we wobłuku swjedźenja k tysaclětnemu wobstaću Hodźija w meji 2006, pokazka k 450lětnemu wobstaću Hodźijskeje šule 2009 a wustajeńca k 25lětnemu wobstaću domizniskeho towarstwa lětsa w februarje“, rěka we wobkrućenju wokrjesa. Dźakowano Klausej Kanzlerej su ke kóždemu projektej tež DVD zdźěłali.

Bóščanski „kofej to go“

póndźela, 18. meje 2020 spisane wot:

Bóšicy (SN/MiR). Tykanc a nopašk kofeja do ruki, to rěka kofej „to go“ – model restawranta „Kubło Bóšicy“ bě witana alternatiwa za čas korony a přikazaneho za­wrjenja hosćencow. „Dowolnosć gastro­nomam, ludźom něšto na puć sobu dać, njebě optimalny poskitk, mój pak chcychmoj swój hosćenc wotewrjeny wostajić wšěm tym, kotřiž rady sem přijědu“, rozłožuje mějićelka restawranta a přirjadowaneje pensije Kathleen Klümpel. Wot ­jutrow je sej stajnje sobotu a njedźelu wulka ličba zajimcow do Bóšic dojěła, zo bychu sej tam čerstwje pječeny tykanc popřeli. Tak staj hosćencarjej Kathleen a Reiner Klümpel na te wašnje wopytowarjow překwapiłoj. Zdobom wužiwachu woni składnosć, sej z wulkeho wuběra wobchoda na kuble twory wubrać. Jako wosebje woblubowany je so oliwowy wolij z Grjekskeje wopokazał. Tež rubiška z Indiskeje su sej ludźo rady jako dar sobu brali. Witali su poskitk tež dźěłaćerjo z Pólskeje, kotřiž tuchwilu w Budyskim wokrjesu kable za spěšny internet kładu. Woni su w pensiji přenocowali a sej hdys a hdys słódny přikusk lubić dali.

Zaso wotewrjene

póndźela, 18. meje 2020 spisane wot:

Stróža. Wot jutřišeje wutory, 19. meje, je Stróžanski Dom tysac hatow biosferoweho rezerwata Hornjołužiska hola a haty zaso přistupny. Wo tym informuje nawodnistwo rezerwata w medijowej zdźělence. Tuchwilneje koronapandemije dla pak dyrbja wopytowarjo trěbne a płaćiwe škitne naprawy dodźeržeć. „Mjez druhim je tuž najprjedy jenož stajna wustajeńca wopytowarjam přistupna“, piše sobudźěłaćerka rezerwata Christina Schmidt. „Wjeselimy so, zo směmy zaso na prašenja dokoławokoło rezerwata wotmołwjeć. Dźiwać pak maja naši hosćo na trěbny mjezsobny wotstawk znajmjeńša połdra metra, zo noša škit za hubu a nós a sej ruce desinfikuja“, rozłožuje nawoda zarjada biosferoweho rezerwata Torsten Roch. Nimo toho smě stajnje jeno dźesać wosobow naraz do domu. Najlěpje tuž je, zo so zajimcy do wopyta w zarjadni­stwje pod telefonowym čisłom 035932/ 36 560 abo z mejlku na Tausendteichehaus. přizjewja a sej termin dojednaja. Stróžanski Dom tysac hatow je wot wutory do njedźele w času wot 9 do 17 hodź. wotewrjeny.

Wobchad budźe haćeny

Zhorjelc (AK/SN). Wot wuchodneje Pólskeje na zapad rozpřestrěwacu so afrisku swinjacu mrětwu chcedźa na kóždy pad zadźeržeć. Za to planuje Zhorjelski wo­krjes najwšelakoriše naprawy. „Najnowše pady mrětwy mějachmy jenož hišće dźesać kilometrow před braniborskej krajnej mjezu a dwanaće kilometrow před Sakskej. Rěčimy tu wo mrětwje mjez dźiwimi swinjemi, kotraž so poněčim bliži“, praji dr. Ralph Schönfelder, hamtski skótny lěkar a nawoda zarjada za dohladowanje žiwidłow/weterinarneho zarjada, na nowinarskej rozmołwje.

Krótkopowěsće (18.05.20)

póndźela, 18. meje 2020 spisane wot:

Hladanska słužba potrjechena

Budyšin/Zhorjelc. Ličba z koronawirusom natyknjenych je přez kónc tydźenja w Budyskim wokrjesu wo dźewjeć na 457 přiběrała. W ambulantnej hladanskej słužbje w Kinsporku kaž tež w Halštrowskej hladarni su infekciju zwěsćili a dalšich ludźi testowali. Dalša wosoba je zemrěła. Wokrjes Budyšin registruje dotal 14 smjertnych padow w zwisku z pandemiju. W Zhorjelskim wo­krjesu je dale 268 infekcijow. Tam je dotal 22 wosobow wirusa dla zemrěło.

Na prašenja wotmołwjał

Budyšin. Sakski ministerski prezident Michael Kretschmer (CDU) je minjeny pjatk w Budyskim hosćencu „Alter Bierhof“ na prašenja hosćencarjow sprjewineho města wotmołwić spytał. Zarjadowanje bě tež přez internetnu syć Facebook sćěhujomny. Wosebje připosłucharjo su składnosć wužiwali a ministerskemu prezidentej kritiske prašenja stajeli.

Normalizuja bliskowobchad

Za zmylkami pytać

pjatk, 15. meje 2020 spisane wot:
Wětošow. Měšćanosta Wětošowa Bengt Kanzler wobydlerjow napomina na taflach ze serbskimi napisami sobu za zmylkami pytać. Kaž Kanzler piše, přisłuša Wětošow serbskemu sydlenskemu rumej, a tak su tafle dwurěčnje popisane. Wjacore pak maja zmylki. Zajimcy njech zdźěla njedostatki a zmylki na taflach měšćanskemu zarjadnistwu. Štóž najwjace namaka, dóstanje „serbske myto“.

Policija (15.05.20)

pjatk, 15. meje 2020 spisane wot:

Proša wobydlerjow wo pomoc

Kamjenc. Hnydom 26 pakćikow parfima je njeznaty z wobchoda na Kamjenskim torhošću spakosćił. Kupča bě wobkedźbowała, kak sej paduch twory w cyłkownej hódnoće 900 eurow do zakow tyka. Byrnjež awtomatiski alarm wobchoda zaskočił, móžeše něhdźe 1,80 metrow wulki muž ćeknyć. Policija nětko wobydlerjow wo pomoc prosy. Štóž je něšto widźał abo ma informacije k padej, njech to Kamjenskej policiji zdźěli.

Gmejna ma inkluziski nadawk

pjatk, 15. meje 2020 spisane wot:

W tučasnej koronapandemiji prawu městnosć za posedźenja gmejnskeje rady namakać njeje lochko, tež za Worklečanskeho wjesnjanostu Franca Bruska (CDU) nic.

Worklecy (JK/SN). Jědźernja Worklečanskeje šule je jenička móžnosć, kotraž žadanjam wotpowěduje. Tam wšak wjesnjanosta poprawom mikrofon z wótře­rěčakom trjeba, zo bychu jeho wšitcy słyšeli. Najebać to su posedźenja wunošne.

Poprawom su wobzamknjenja wo twarskich próstwach wobydlerjow rutina a spěšnje schwalene. Wčera pak su radźićeljo wo twarskej próstwje w Smječkecach trochu dlěje wuradźowali. Wobydler chce něhdyše znate a woblubowane zetkawanišćo „Schil so“ na bydlenski dom přetwarić. Najprjedy pak chce je zwottorhać. ­Někotři radźićeljo mějachu wobmyslenja, zo so potom twarjenje zhubi, kotrež je z mnohimi stawiznami a anekdotami zwjazane. To pak je wjesny chronist wobkedźbował, a zhromadnje z twarskim knjezom budźetaj wšitko dokumentować.

Budyske nalěćo wirtuelnje

pjatk, 15. meje 2020 spisane wot:

Budyšin (CS/SN). Tučny swjedźenski paket bě wjelelětny organizator Budyskich měšćanskich swjedźenjow Andreas Hennig tež za lětuše Budyske nalěćo spřihotował. Měješe to takrjec jeho rozžohnowanski dar być, wšako so na wuměnk poda. Mjeztym pak je jeho program jenož hišće makulatura. Koronakrizy dla dźě so swjatk kaž zwučene njewotměje.

Hennig a jeho sobuwojowarjo pak nochcedźa swjatkowny kónc tydźenja bjez kultury w sprjewinym měsće wostać. A tak přińdźechu na tele dny w mnohich wobłukach wupruwowanu formu livestreaminga. Byrnjež drje kóždy lóšt njeměł poskićenja jeno před kompjuterom sćěhować, je to přiwšěm móžnosć, wuměłcow a přihladowarjow hromadu wjesć. Zdobom je to hudźbnikam znajmjeńša mała přiležnosć, swoje straty dochodow trochu wurunać.

Serbska debata

nowostki LND