Dźěłarnička budźe
Miłoćicy. Kónc meje, to rěka swjatki njedźelu, wotběži čas za zajimcow, za lětušu wuměłsku dźěłarničku w Miłočanskej skale Při Krabatowym kamjenju so požadać. Kaž městopředsyda wuměłstwoweho a kubłanskeho towarstwa Kamjenjak, kotrež dźěłarničku organizuje a wuhotuje, Hubert Lange zdźěli, su hižo wjacore próstwy wo wobdźělenje dóšli, a to wot wuměłcow ze wšelkich krajow swěta. Aktualneje koronapandemije dla pak njeje móžno, kaž hišće spočatk lěta předwidźane, mnohich wukrajnych wuměłcow přeprosyć. Fokus leži lětsa na Łužicy kaž tež na susodnymaj krajomaj, Čěskej a Pólskej. Dźěłarnička wotměje so kónc awgusta/spočatk septembra.
Ze Šćěpanom rysowali
Wobchod z nowym poskitkom
Pančicy-Kukow (SN/BŠe). Po tym zo předawaja w Pančičansko-Kukowskim klóšterskim wobchodźe křižiki za dźěći a modlensku kóstku w serbskej rěči, poskićeja tam nětko tež wosebite serbskorěčne hrónčkowe taflički. „Stajnje zaso pytam za nowymi idejemi, kotrež móhli zwoprawdźić“, rozprawja Karina Čižankowa z klóšterskeho wobchoda. A tak su tafličku za dźěći z hrónčkom jandźela pěstona wuwili. Rady powěsnu sej ludźo tajke škitne symbole do jstwy abo nad łožom dźěsća.
Podpěru dóstali su wot sobudźěłaćerjow Don Boskoweho domu. Předewšěm Sabina Lanzyna je sobu pomhała hodźace so hrónčko wupytać a je skorigować, za čož je sobudźěłaćerka wobchoda dźakowna. Předewzaće w Južnym Tirolu, z kotrymž klóšterski wobchod wuske styki pěstuje, je taflički zhotowiło. Hnydom štyri warianty maja na wuběr. Jónu je to přirodny stil, dale je to jandźel pěston w módrej, čerwjenej abo běłej sukni. „Tak móža sej kupcy tajku tafličku samo za holcu abo hólca wupytać“, měni Karina Čižankowa.
Hdźež měr a wjeselo knježitej
Na Jakubec twjerdźiznje swjatki zwóńcu poswjeća
Mortkow (AK/SN). Zwóńca saha wysoko k njebju. Twarjena je wona z klinkerowych cyhelow, zornowca, třěšnych cyhelow a dalšeho recyclowaneho materiala. Na zadnjej stronje Mortkowskeje Jakubec twjerdźizny přeproša zwóńca wotnětka na wotpočink. „Sancte Johannes Baptista pro Nobis“ (Swj. Jana Křćenika za nas) steji na wulkim zwonje. Tón waži něhdźe 450 kilogramow a ma přeměr 1 050 milimetrow. Laty je kaž tamnej dwaj ze železa. Srjedźny zwón z přeměrom 940 milimetrow waži 300 kilogramow. Najmjeńši, kiž ma přeměr 840 milimetrow, je něhdźe 200 kilogramow ćežki.
Lětuša kupanska sezona zahajena
Wojerecy (SN/MiR). Přichodne dny ma so poněčim woćoplić. To je mnohim přičina, sej přijomny blečk při wodźe pytać. Wotnětka móža zmužići – woda wšak hišće přećopła njeje – zaso do Šibojskeho jězora skočić. Kaž rěčnik Wojerowskeho wyšeho měšćanosty Bernd Wiemer zdźěli, móža so ludźo na wotrězku zapadneho přibrjoha kupać. Šibojski jězor nasta w lěće 2011 a je 684 hektarow wulki, po tym zo su něhdyšu brunicowu jamu Šiboj zapławili, na kotrejež městnje bě hač do 1980tych lět wjes Šiboj stała.
W Rogeńskim parku lěćo zaćehnje
Jednohłósnje za pomocny paket
Koronakriza a jeje wuskutki tworjachu ćežišćo wčerawšeho posedźenja Budyskeje měšćanskeje rady. K dalšim diskutowanym dypkam słušachu přichod turizma a ćeže na Bohatej hasy.
Budyšin (SN/bn). Jednohłósnje schwali rada wčera zhromadny namjet kataloga naprawow „Budyšin dožiwić“ wšitkich frakcijow a měšćanskeho zarjadnistwa. Tak mjenowany pomocny paket za wot krizy potrjechene předewzaća mjez druhim wopřijima, přemysłowy dawk bjez danje nachwilnje wusadźić. Nimo toho płaća hač do kónca lěta najniše móžne popłatki za wabjenje w zjawnym rumje. Wikowarjo a gastronomojo móža přichodnje darmotnje na internetnej stronje www.bautzen.de wo swojich poskitkach informować, za reklamu na njej njetrjebaja hač do 20. junija ničo płaćić.
Krótkopowěsće (28.05.20)
Jedyn nowy pad korony
Budyšin. Ličba w Budyskim wokrjesu z koronawirusom natyknjenych powjetši so wčera wo jednu wosobu na 486. Sto z nich je schorjenych. W 147 padach je strowotniski zarjad karantenu postajił. Dźesać pozitiwnje testowanych w chorowni lěkuja, pola dweju je přeběh ćežki. W Zhorjelskim wokrjesu hižo połtřeća tydźenja žane nowe pady njejsu, dwě wosobje stej tam w karantenje.
Myto SPTWS Radworčanam
Budyšin. Radworska młodźina je šesty dobyćer Serbskeho poskitka tydźenja w syći (SPTWS) a je sej po hódnoćenju jury sto eurow zasłužiła. Z livestreamom, wuhotowanym kaž wusyłanje, su k tomu přinošowali, zo móžachu přihladowarjo lětsa nałožk mejemjetanja přiwšěm dožiwić. Dale běchu Radworčenjo hižo z poskićenej nakupowanskej akciju za čas korony wažnu pomoc organizowali.
Nawrót Romow z ćežemi
„Maći, my njechamy hišće wumrěć!“
Swoje dopomnjenki na frontu a na čas bjezposrědnje po Druhej swětowej wójnje w Róžeńće spisała je nam Budyšanka Chrysta Meškankowa. Nastawk jeje staršeje sotry Angele „Kónc wójny w Róžeńće“ bě ju k tomu pohnuł.
Fronta so bliži
Na čas před 75 lětami so hišće poměrnje derje dopominam. To njebě tohorunja moja ródna wjes před wójnskimi wojowanjemi zalutowana wostała. Mjeztym wšak njeje wjace wjele Róžeńčanskich wočiswědkow žiwych. My Rječkecy běchmy štyri dźěći a same z maćerju. Našeho nana, młodeho wučerja, běchu hižo 1939 do wójny sćahnyli. Najmłódša sotřička běše w nalětnich dnjach 1945 runje swoje prěnje narodniny docpěła. Ja běch tehdy šěsćlětna šulerka 1. lětnika w Róžeńće. Šulu wjace žanu njemějachmy. Nimo běše tež čas, zo so dopołdnja w bydlenskej stwě na woknowu ławku čapnych a na póstowe awto čakach. Hdyž je wuhladach, běžach do wsy ke Glawšec ćeće, zo bych so za listom wot nanka prašała. W awgusće 1945 pak přińdźechu maćerne listy na njeho do pola wróćo z přispomnjenjom „Unzustellbar“. Wot toho časa płaćeše jako zhubjeny.
Kónc wójny w Róžeńće
Tehdy wosomlětna šulerka Angela Rječkec, sotra Chrysty Meškankoweje, napisa nastawk wo wonych dnjach:
Je 20. apryla 1945, dźeń Hitlerowych narodnin.
Rano w pjećich přińdźe Pjekarjec Madlenka k nam do lěhanskeje stwy k našej maćeri. Šulska chěža, w kotrejž mějachmy na hornim poschodźe bydlenje, njebě zamknjena, dokelž běchu w šulskich rumnosćach němscy wojacy zakwartěrowani. Wona wołaše cyle rozhorjena: „Rusojo tu su. Pancery jězdźa hižo nimo wsy po hornim puću do Kamjenskeho směra.“ Někotre hodźiny pozdźišo přińdźe naš susod, we wójnje zbrašeny němski wučer ze swojej swójbu k nam. Běchmy runje při wobjedźe. Je dźiwne, ale móžu so hišće derje dopomnić, zo sydaše čerwjena rěpa. Wón měješe strach a chcyše z Róžanta ćeknyć.
Žana zahrodowa nóc
Pančicy-Kukow. Nóc „W swěcy 1 000 swěčkow“, kotraž měješe so 18. julija na zahrodźe klóštra Marijineje hwězdy w Pančicach-Kukowje wotměć, dyrbi Křesćansko-socialny kubłanski skutk Miłoćicy (CSB) nažel wotprajić. Přičina su powšitkowne wukazy Sakskeje we wobłuku škita před infekcijemi kaž tež aktualny korona-wukaz. CSB pak hižo nětko na klětušu zahrodowu nóc w zežiwjenskim a zelowym centrumje přeproša, kotraž budźe potom 17. julija. Za lětsa kupjene lisćiki wobchowaja płaćiwosć.
Dom biskopa Bena wotewrjeny
Smochćicy. Dom biskopa Bena w Smochćicach je wotnětka zaso za Bože słužby a zarjadowanja kaž tež dowolnikam přistupny. Tam skutkowacy chcedźa ludźom zaso bliscy być a jich z Bohom do zwiska přinjesć. Po dźewjeć tydźenjach nanućeneje přestawki smědźa tam nětko zaso hosći witać, tež hdyž pod wosebitymi hygieniskimi wuměnjenjemi a konceptom škita před infekcijemi. Při wšěch naprawach je sobudźěłaćerkam a sobudźěłaćerjam Domu biskopa Bena wažne zaručić, zo so kóždy derje čuje, kiž do Smochćic přijědźe.
CDU kmótřistwo přewzała
