Dr. Arnošta Mukowa zawrjena
Budyšin. Dospołneho ponowjenja kanalizacije budźe w sprjewinym měsće Dr. Arnošta Mukowa mjez Walskej a Tuchorskej wot jutřišeho dospołnje zawrjena. Wo tym informuje měšćanske zarjadnistwo w nowinskej zdźělence. Kaž tam rěka, wostanje dróha hač dosrjedź oktobra zawrjena. Jednosměrowe rjadowanje na puću za čas twarskich dźěłow zběhnu. Z awtom na Mukowu so dóstać a ju zaso wopušćić je potom jenož hišće přez Walsku móžno. Přidatnje njebudźe wot jutřišeho hač do 16. junija tež móžno Mukowu přez Belebelowe naměsto docpěć. Tohodla pojědu busy w tym času na busowe dwórnišćo jeničce ze směra Tuchorskeje.
Telefoniske poradźowanje
Budyšin. Hornjołužiski zwjazk Carity poskića za čas koronakrizy telefoniske poradźowanje. Tež ći, kotřiž chcedźa so prosće raz z někim rozmołwjeć, smědźa tam tohorunja zazwonić. Sobudźěłaćerjo Carity móžeće wot póndźele do pjatka wot 8 do 16 hodź. pod telefonowym čisłom 03591/ 49 82 20, ale tež pod mejlowej adresu docpěć.
Kamjenski elementarij ma přikładnych hosći
Do elementarija Kamjenskeho Muzeja zapadneje Łužicy zaćehnje pomału zaso normalita.
Policija (25.05.20)
Dom sportowcow cil był
Njeswačidło. W nocy na sobotu su so dotal njeznaći skućićeljo na Njeswačanskej Kastanijowej aleji namócnje do tamnišeho domu sportowcow zadobyli. Při tym rozłamachu woni wjacore mjezydurje a spakosćichu hišće njeznatu sumu pjenjez. Wěcna škoda wučinja něhdźe 2 000 eurow. Kriminalny technikar je na městnje slědy zawěsćił. Policija pad nětko dale přepytuje.
Dalokowid sobu wzali
Budyšin. Njeznaći su so w nocy na sobotu do lawby w zahrodce na Budyskej Salvadory Allendowej zadobyli a tam dalokowid pokradnyli. Dalši zaměr běše dom towarstwa. Tam pak wuspěch njemějachu. Přiwšěm načinichu 700 eurow škody. Spakosćeny dalokowid bě połsta eurow hódny. Tež tam kriminalna policija nětko za winikami slědźi.
Alkohol piła a jěła
Budyšin. Při wobchadnej kontroli je policija sobotu wječor šoferku Dacije na Budyskej Dr. Pětra Jordanowej zadźeržała. Při rozmołwje zastojnikaj zwěsćištaj, zo bě wona alkohol piła. Naslědny test wunjese 1,3 promile. 50lětna dyrbješe krej a jězbnu dowolnosć wotedać.
Nowosći w zwěrjencu sej wotkryć
Spočatk junija etat wobzamknu
Gmejna Dźěwin chce lětsa mjez druhim financy za pěstowarnje, wohnjowe wobory a kěrchowy nałožić.
Brězowka (AK/SN). Dźěwinska gmejna chce lětsa mjez druhim do pěstowarnjow, dobrowólnych wohnjowych woborow a do kěrchowow komuny inwestować. To podšmórny komornica Carmen Petrick na minjenym wuradźowanju gmejnskeje rady. Po wšěm zdaću hižo 4. junija měli gmejnscy radźićeljo etat wobzamknyć. „Předewšěm pak nastupajo inwesticije su wjacore prašenja njewotmołwjene. Dyrbimy je nadrobnje rozrisać“, wujasni komornica.
Pěstowarnja „Baćonjace hnězdo“ w Brězowce, kotraž je w nošerstwje gmejny, ma na přikład nowy hrajkanski nastroj dóstać. Za njón chcedźa cyłkownje 18 700 eurow nałožić. Komuna, tak Carmen Petrick, nadźija so ma 80procentowske spěchowanje z programa integrowaneho wuwiwanja wjesnych kónčin ILE. „Z 80 procentami spěchowanja bychmy derje zastarani byli“, podšmórny komornica.
Naprašowanje přiběra
Čornochołmčanski Krabatowy młyn chce butřankowe plincy dale poskićeć
Čorny Chołmc (SN/JaW). Tuchwilu časćišo słyšimy, kajke njelěpšiny je koronakriza wunjesła. Tola wšitko, štož bu w minjenych tydźenjach a měsacach wupječene, zo by so najebać wobmjezowanja koronapandemije něšto hibało, njeje tak špatne, kaž wupada, kaž so na prěni pohlad zda. To su tež sobudźěłaćerjo Čornochołmčanskeho Krabatoweho młyna wokoło Tobiasa Čižika nazhonili. Tam poskićeja mjenujcy wotsrjedź apryla serbske butřankowe plincy a je wuspěšnje wotbywaja. Ideja nasta w ćežkim połoženju korony dla. „Gastronomiske zastaranje je tež pola nas nadobo nimo było. Móžno jenož hišće bě jědźe dodawać abo zo su sej kupcy něšto skazali a sami wotewzali“, rozłoži jednaćel towarstwa Krabatowy młyn Tobias Čižik na naprašowanje. Swoje plincy poskićeja wšědnje wot 11 do 16 hodź., pak na městnje do ruki, pak je na skazanku we wobkruhu 15 kilometrow rozwožuja, abo kupcy móža sej je skazać a sami wotewzać.
Wuspěšna to premjera
Mejemjetanje z postajenjemi
Krótkopowěsće (25.05.20)
Ličba infekcijow snadnje wjetša
Budyšin/Zhorjelc. Kónc tydźenja bu dalša z koronawirusom natyknjena wosoba zwěsćena, tak zo je w Budyskim wokrjesu tuchwilu 481 dopokazanych padow. Sydom pacientow je so wustrowiło. Ličba postajenych karantenow je so na 247 jasnje pomjeńšiła. W Zhorjelskim wokrjesu njejsu dale žane infekcije zwěsćili. Tam je hišće sydom schorjenych. Dwě wosobje stej w karantenje.
VW dyrbi wotškódnjenje płaćić
Karlsruhe. Awtotwarc Volkswagen je zasadnje winowaty wobsedźerjam dieselowych awtow, kotřiž manipulowaneho wotpłuna dla skorža, wotškódnjenje płaćić. To je Zwjazkowe sudnistwo w Karlsruhe dźensa rozsudźiło. Kupcy, kotřiž chcedźa pjenjezy za swoje awto wróćo měć, dyrbja pak sej kilometry, kotrež su z nim mjeztym po puću byli, přiličić dać.
Geyer: Mnohe wěcy su chore
Kemše dale přez internet
Chrósćicy. Zajutřišim, njedźelu, 24. meje, kaž tež tydźeń na to, njedźelu, 31. meje, wusyłaja we 8.30 hodź. Božu mšu na Youtube z fararjom Gabrišom Nawku z Kulowskeje cyrkwje. Trěbny link na wotpowědny internetny kanal podawa Katolski Posoł pod www.posol.de kaž tež internetna strona Kulowskeje wosady pod www.st-mariae-himmelfahrt-wittichenau.de. W 10 hodź. wusyłaja na samsnym kanalu němske kemše z Kulowa. Tohorunja njedźelu, 24. meje, we 8.30 hodź. wusyłaja tež kemše z Ralbičanskeje cyrkwje, ale jenož k słuchanju. Link namakaće tohorunja pod www.posol.de.
Poskićeja jědź k wotewzaću
