Hodźij (SN). Wohnjowych wobornikow z Hodźija, Brězy, Spytec a Prěčec wołachu dźensa w nocy k hašenju do Hodźija. Tam je so krótko po połnocy wjetši skład drjewa bjezposrědnje při młodźinskim klubje na Žičeńskej dróze palił. Wobydler bě runje wot dźěła přijěł a płomjenja wuhladawši wohnjowu woboru alarmował. Dohromady bě nimale 30 kameradow zasadźenych. Woni drje móžachu tomu zadźěwać, zo płomjenja direktnje na młodźinski klub přeskočichu, přiwšěm zawostaji woheń na jeho třěše chětro wulku škodu. Zranił so na zbožo nichtó njeje, wšako je twarjenje koronowych postajenjow dla zawrjene. Kriminalna policija nětko přičiny wohenja přepytuje. Při hašenju wobornicy wuhladachu, zo steješe blisko składowaneho drjewa wužiwany gril. Hač tón z wohenjom zwisuje, dyrbja nětko přeslědźić.

Poskićeja praktikum

wutora, 21. apryla 2020 spisane wot:

Budyšin. Wšědne dźěło pola policije dožiwić móža šulerki a šulerjo, kiž chcyli w lětušich nazymskich prózdninach swój praktikum w Zhorjelskej policajskej direkciji wukonjeć. Městna za praktikum poskićeja policajske rewěry w Budyšinje, Kamjencu, Wojerecach, Zhorjelcu, Žitawje a Běłej Wodźe. Próstwy přijimuja hač do 30. junija pod tel. čo. 03581/ 468 2042.

Pytaja za pokiwami

Kulow. Dokelž je w pincach wjaceswójbnych domow Kulowskeje bydlenjotwarskeje towaršnosće wospjet k wohenjam dóšło, tam nětko z njewšědnej naprawu za skućićelom pytaja. W zdźělence tamnišim wobydlerjam rěka, zo wupisaja 5 000 eurow za pokiwy, kotrež k dosahnjenju skućićela wjedu. Dotal pak hišće žane pokiwy dóstali njesu.

Policija (21.04.20)

wutora, 21. apryla 2020 spisane wot:

19 lět bjez zawěsćenja

Budyšin. Zo policija hdys a hdys někoho lepi, kotrehož jězdźidło žane winowatostne zawěsćenje nima, so hdys a hdys stawa. Předwčerawšim pak dyrbjachu so zastojnicy w tym zwisku w Budyšinje z wosebitym padom zaběrać. Blisko Kopornika zadźeržachu 48lětneho muža, kiž bě tam ze swojim mopedom po puću. Na nim drje bě zawěsćenske čisło přičinjene. Kaž policisća zwěsćichu, pak bě wone hižo 19 lět njepłaćiwe. Dale jěć mopedist wězo njesmědźeše.

Dźěłaja po nuzowym planje

wutora, 21. apryla 2020 spisane wot:

Zarjadniske nadawki dyrbja tež pod ćežkimi wuměnjenjemi wukonjeć

Hamor /Łaz (AK/SN). Koronapandemije dla gmejnske zarjadnistwa hižo něšto tydźenjow po nuzowym planje dźěłaja. Tež w Hamoru a we Łazu to tak je, kaž Serbske Nowiny na naprašowanje zhonichu. Někotři sobudźěłaćerjo drje móža dźěl swojich nadawkow w domjacym běrowje wobstarać. „Wjetšina pak dyrbi přiwšěm w radnicy dźěłać, dokelž digitalizacija tu jenož krok po kroku zaćehnje. Krizowy stab zmištruju wokomiknje sam“, podšmórnje Łazowski wjesnjanosta Thomas Leberecht (CDU). W susodnej Hamorskej gmejnje je w kóždym zarjadniskim wobłuku znajmjeńša jedyn sobudźěłaćer na městnje. „Při nuznych naležnosćach w přizjewjerni a na stawnistwje dyrbja ludźo wězo do radnicy přińć, ale trěbne hygieniske naprawy a wotstawk dodźeržeć“, rozłožuje nawoda hłowneho zarjada Arian Leffs.

Při wšěch techniskich wunamakanjach je ratarske dźěło zdźěla z tym zwjazane, zo druhdy smjerdźi. Tež to pak spytaja na mi­nimum redukować, kaž njedawno tule mjez Koslowom a Sernjanami. Tam je posłužbowe předewzaće hnójnicu agrarneho ­zawoda na pola kidało a ju hnydom do zemje zadźěłało. Foto: Feliks Haza

Nalěćo je swoju krasnu pychu minjene dny po cyłej Łužicy rozwiło. Štomy a kerki wšudźe w najrjeńšich barbach kćěja. Tež při Choćebuskim Statnym dźiwadle móža je ludźo wobdźiwać. Wšu přičinu so wjeselić maja tež hladajo na ličbu z koronawirusom natyknjenych. Hižo wosom dnjow za sobu njejsu w delnjołužiskej metropoli žane nowe pady zwěsćili. Foto: Michael Helbig

Krótkopowěsće (21.04.20)

wutora, 21. apryla 2020 spisane wot:

Žane nowe infekcije

Budyšin/Zhorjelc. Ličba wobkrućenych koronainfekcijow w Budyskim wo­krjesu njeje so wčera porno njedźeli powjetšiła, dokelž njejsu tón dźeń žane testy přewjedli. Dotal bu 326 korona-natyknjenjow zwěsćenych. Tuchwilu je 421 ludźi w karantenje. W Zhorjelskim wo­krjesu je ličba z 243 wobkrućenymi pa­dami dale konstantna.

Pjeć nowych sobustawow

Malešecy. Naprawy župy „Jan Arnošt Smoler“ k wožiwjenju serbskeho žiwjenja w Malešecach su so mjeztym tež ­na tamnišu Domowinsku skupinu wuskutkowali. Tam móžachu nětko pjeć młódšich nowych sobustawow třěšneho zwjazka witać, kotřiž bydla we wsy samej a w Barće. Mjez nimi je Ma­lešanski wjesnjanosta Matthias Seidel (CDU). Dwaj nowaj Domowinjanaj serbsce rěčitaj.

Hospodarstwo loni rozrostło

Rědke ptački so zaso nawróćeja

póndźela, 20. apryla 2020 spisane wot:
Tuchwilu přichadźa dale a wjac ćahawych ptačkow ze zymskeho kwartěra z Afriki wróćo do Łužicy. Jako prěnje wróćichu so pliški (Bachstelze) a šwiški (Hausrotschwanz). Mjeztym su so tež hižo dymowki (Rauchschwalbe) přidružili. Na łastojčki mamy hišće hač do meje čakać. Wot minjeneho tydźenja pak wuhladamy we Łužicy zaso rědke hupaki (Wiedehopf). Tajki je hižo wjacekróć ležownosć w Bronju wopytał a wobydlerjow ze swojej pyšnosću zawjeselił. Foto: Handrij Baumgärtel

Wojerecy (KD/SN). Hižo wjacore lěta pyta Wojerowski hrodowy a měšćanski muzej nowy depot, dokelž so dotal wužiwana łubja k tomu njehodźi. Tam tuchwilu hišće składowany fundus je za wjerchi přećežki. Nimo toho njejsu jednotliwe eksponaty před insektami, wohenjom, wodu a prochom dosć škitane, rozłoži nawodnica hrodu Kerstin Noack. Nastajnosći měnjaca so włóžnota powětra a temperatury wuměłskej zběrce, starym křinjam, železnym nastrojam šewcownje a druhim objektam tohorunja njetyje. Za čas NDR wobdźěłachu drjewjane hrjady ze škitnym srědkom Hylotox, w kotrymž bě tehdy škódna maćizna DDT. Tohodla smědźa sobudźěłaćerjo muzeja nětko jenož w škitnych woblekach na łubju hrodu.

Policija (20.04.20)

póndźela, 20. apryla 2020 spisane wot:

Wopiteju šoferow lepili

Smjerdźaca. Z napadnje wjele alkoholowymi deliktami w nadróžnym wobchadźe dyrbi so tele dny policija zaběrać. Tak su sobotu wječor wodźerja transportera w Smjerdźacej z jednym promilom alkohola lepili. Šofer VWja we Wojerecach měješe w samsnym času nimale dwójce telko alkohola intus.

Serbska debata

nowostki LND