Njebjelčicy (AKr/SN). Dokelž dyrbi lětsa tež tradicionelne chodojtypalenje koronawirusa dla wupadnyć, je sej Njebjelčanska gmejna akciju za swojich woby­dlerjow wumysliła. Wjacori wjesnjenjo běchu so hižo do toho wobhonili, hdźe móža swoje wjetše a mjeńše hałzy wotbyć, njeje-li móžno je na zwučene městno zwozyć. Tak zrodźichu ideju, tajki serwis­ w gmejnskim twarskim zawodźe poskićić. Wobydlerjo mějachu minjeny pjatk a sobotu składnosć, tam wurězane hałzy bjezpłatnje wotedać. Pozdźišo je Wätzigec firma na małe kuski rozdźěła. Štóž chce potom hotowy rěz měć, smě sej jón kupić. Wšako dyrbi gmejna firmu a přistajenych zapłaćić. Zbytk budźe za swoje ležownosće trjebać.

Wothłós mjez wobydlerjemi bě dobry. Hižo pjatk ludźo z awtom a připowěšakom abo mjeńšim abo wjetšim traktorom hałzy do Njebjelčic wožachu. Tež sobotu tam pospochi jězdźachu. Dokelž bu akcija krótkodobnje přewjedźena, njeje informacija bohužel do wšitkich domjacnosćow gmejny dóšła.

Serbske Nowiny namołwjeja swojich čita­rjow pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čimž móhli so zaběrać. Pisajće­ nam na redaktion@serbske­nowiny.de. K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Weronika Šnajdrec z Pančic-Kukowa pisa:

W nalěću je naš nan na našej zahrodźe pilnje štomy wurězował a nadźěła tak wulke mnóstwo hałzow. Tola što nětko z nimi činić, hdyž chodojtypalenje wupadnje a hdyž swoje hałzy na wulku hromadu dowjezć njemóžemy?

Dopomniwši so na našich prjedownikow, kotřiž běchu walčki rubali a sušili, zo móhli na přikład kotoł zatepić, dachmy so tež my do dźěła a pilnje hałzy rubachmy. Změjemy tuž přichodne tydźenje a měsacy wjeselo na lěhwowych wohenjach z kołbaskami a ćěstom na kiju.

Njezbožo a smjertny wopor

Wojerecy. Z njewšědnym padom dyrbi so policija we Wojerecach zaběrać. Tam wčera rano zwěsćichu, zo bě so ćežke wobchadne njezbožo stało, při kotrymž bě wosobowe awto typa BMW w industrijnej štwórći na kromje dróhi do wobchadneho znamjenja a do latarnje zrazyło. Šofer abo šoferka pak bě městno nje­zboža hižo wopušćił/a. Tohorunja wčera rano je policija přez Wojerowsku wuchowansku dispatchernju zhoniła, zo bě na jednym ze železniskich přechodow města wosoba smjertnje znjezbožiła. Zastojnicy su na to městno zawěsćili a železnisku čaru zawrěli. Dotal njeje znate, štó mortwa wosoba je. Kriminalna policija nětko pruwuje, hač mjez wobchadnym njezbožom a morjenej wosobu někajki zwisk wobsteji.

Budyšin (UM/SN). Mjez dźensnišimi Budy­šanami drje so lědma štó dopomina, zo měješe Weigangowa něhdy cyle hinaši charakter. Nětko je to normalna dróha předměsta w tak mjenowanej wilowej štwórći z mało zelenym. Něhdy pak bě to aleja z čerwjenymi hłohoncami (Rotdorn) na woběmaj bokomaj. Kaž na mnohich druhich hasach a naměstach je so tež tu w běhu lětdźesatkow wjele zeleneho zhubiło.

Skupina žonow a muži, lěta 2016 jako „Měšćanscy wozelenjerjo“ załožena, pak so z tym wotnamakać nochce. Woni chcedźa přinošować, zo by sprjewine město zaso zeleniše, pisaniše a kćějate było. Skupinje přisłuša wukubłany zahrodnik Olaf Haase, kiž wěnuje so hłownje kulojtym městnam wokoło štomow. Jeho zaměr je, zo wobydlerjo tele měst­na zwosadźeja a je hladaja. Tak chcedźa witalnosć štomow w měsće polěpšić.