Janšojce (HA/SN). Kak hodźało so při planowanej wokrjesnej reformje w Braniborskej, kotraž je za lěto 2019 předwidźana, na serbske naležnosće dźiwać? Tele prašenje steješe w srjedźišću wčerawšeho posedźenja předsydstwa župy Delnja Łužica w Janšojskim Serbsko-němskim domizniskim muzeju.
Jako najwažniši kriterij wčera po čiłej diskusiji zwěsćichu, zo njesměła reforma na žadyn pad na škodu serbstwa być. Tež w nowych strukturach měli wuměnjenja za dalše spěchowanje rěče a kultury zaručene być, kaž sej čłonojo předsydstwa žadachu. Najlěpje by so to po jich słowach radźiło, by-li so wokrjes wutworił, do kotrehož słuša wšón serbski sydlenski rum Braniborskeje. Tón wšak so tuchwilu na tři wokrjesy a na město Choćebuz rozpřestrěwa. W zhromadnym wokrjesu móhło so na přikład serbske šulstwo wo wjele lěpje rjadować. Swoju poziciju chcyłoj župne předsydstwo runje tak kaž Rada za serbske naležnosće Braniborskeje 5. a 6. oktobra na zarjadowanjomaj tamnišeho nutřkowneho ministerstwa w Baršću a Choćebuzu přednjesć.