Serbske ewangelske towarstwo (SET) je wčera w Rakecach na aktiwity minjeneho lěta zhladowało a swójski namjet nastupajo kandidatow za radu Załožby za serbski lud podało.
Rakecy (GH/SN). Po zwučenym wašnju na reformaciskim dnju schadźowachu so čłonojo Serbskeho ewangelskeho towarstwa na swojej lětušej hłownej zhromadźiznje wčera w Rakečanskej farskej bróžni. Nimale 35 čłonow SET a hosći, mjez nimi tež předsyda delnjołužiskeho Towarstwa za spěchowanje serbskeje rěče w cyrkwi dr. Hartmut Leipner, je do Rakec přichwatało.
Pozawnowy chór Rakečanskeje ewangelskeje wosady witaše wobdźělnikow ze serbskimi kěrlušemi a spěwami před bróžnju. Serbski superintendent Jan Malink zahaji zetkanje z nutrnosću.