Łužiske lodohokejowe liški –
Ravensburg Towerstars 0:3 (0:1, 0:1, 0:1)
Žane wrota – žane dypki! Po połojcy předkoła steja módro-žołći na dźewjatym městnje w tabulce. Běła Woda bě derje z kabiny přišła. Eric Valentin swobodnje před Jonasom Langmannom čornu tačel wotfalšowa, ale wrotarja njepřewiny (1.). Při zaso połnych rjadach smědźeše so Josh MacDonald raz jednorje přez škitne pasmo Liškow wuchodźować a puk zatřělić. To bě „perfektna zymna duša“. Srjedź prěnich 20 mjeńšin bu wurunanišo. W powerplayju mjez 14. a 16. min. wuhrachu sej domjacy štyri dobre šansy, kotrež pak stajnje posledni muž Langmann dźeržeše.