Towarstwo Cyrila a Metoda, katolske zjednoćenstwo z přewšo šěrokej paletu skutkowanja, je wčera w Baćonju swoju kóždolětnu hłownu zhromadźiznu přewjedło – z nowym předsydu na čole.

Baćon (SN/MkWj). Čłonojo towarstwa běchu loni w meji Cyrila Hančika z Radworja jako naslědnika zasłužbneho Jurija Špitanka za noweho předsydu wuzwolili. Nowy nawoda bilancowaše wčera w połnje wobsadźenej žurli Baćonskeje fary skutkowanje towarstwa minjeneho lěta, kotrež bě po nanuzowanej přestawce dweju lět koronawirusa dla zaso w normalnych kolijach běžało. Cyril Hančik chcył wustawki towarstwa z nimale 200 čłonami změnić, dokelž njewotpowěduja po 25 lětach wjace žadanjam časa. Na přichodnej hłownej zhromadźiznje chcedźa wo změnach wuradźować a je schwalić. Starosće ma towarstwo předewšěm přiběracych wudawkow zwyšenych płaćiznow dla, Hančik rozłoži.

Šěroke polo skutkowanja Towarstwa Cyrila a Metoda pokaza so w rozprawach cyłkownje dźesać sekcijow a korporacijow, kotrymž móžeše Damian Dyrlich jako nawoda wčerawšeje zhromadźizny słowo přepodać.

Budyšin (SN/bn). „Diferenca mjez spisownej a wobchadnej serbšćinu njeměła nadal rozrosć. Měli wobchadnu rěč připóznać a ju we wučbje wobjednawać.“ Tónle facit na kóncu přednoška Leńki Šołćic „Róla wobchadneje rěče w modernym swěće“, z kotrymž rěčespytnica předwčerawšim na žurli Budyskeho Serbskeho muzeja hłownu zhromadźiznu Maćicy Serbskeje (MS) zahaji, zbudźi mjez něhdźe 40 přitomnymi čiłu diskusiju. Tezy, zo woznamjenja jeje dopóznaća „zwrěšćenje serbskeje šulskeje politiki minjenych 60 lět“, Šołćic z ramjenjomaj sukajo přihłosowaše. Wupuć móhł po jeje měnjenju być „na přikład dowolić artikle a njeobligatoriski dual“. Ze slědowacym přednoškom „Prócowanja Maćicy wo serbske pomniki“ bilancowaše Trudla Malinkowa „wuspěšne skutkowanje pomnikoweho wuběrka MS po wožiwjenju towarstwa w lěće 1991“. Zdobom wona připowědźi, zo so wotpowědna sekcija lětsa rozpušći, dźěl jeje nadawkow ma přichodnje fachowa přirada Załožby za serbski lud wukonjeć. Za jeje wjelelětny angažement spožčichu Trudli Malinkowej čestne čłonstwo MS.

Zjawnosći spřistupnjeny wutk z rozprawy prawniskeho wuběrka Zwjazkoweho předsydstwa Domowiny nastupajo tematiku zastojnstwo a mandat za načolnych zastupjerjow serbskeho třěšneho zwjazka je plista wšěm tym, kotrymž je nahladnosć Domowiny wažna. So jeničce na Zakładny zakoń powołać, rěka, zo ma so čłonstwo w přichodźe tež z tym wotnamakać, hdyž Domowinu reprezentowaca wosoba za AfD mandat nastupi abo so samo w scenje reichsbürgerow na wusahowacym městnje angažuje. Běchu čłonojo prawniskeho wuběrka snano přežadani, zo njejsu linije móžnych konfliktow jasnje pomjenowali? Abo njejsu to chcyli? Naležnosć měsac do hłowneje zhromadźizny Domowiny ze swěta njeje. A to bě dobra přičina, ju tohodla minjeny pjatk zboka kóždeježkuli zjawnosće rozjimać. Nadźija na moralku je snadnuška. Hdyž dźe jenož hišće wo taktiku, moralka podrjadowanu rólu hraje. Abo budźe dospołnje na bok stłóčena. Axel Arlt

Budyšin (KJ/SN). Posledni raz w tutej zestawje je předsydstwo Domowinskeje župy „Jan Arnošt Smoler“ Budyšin wčera w tudyšim Serbskim domje župnu hłownu a wólbnu zhromadźiznu dopřihotowało. Tuta budźe sobotu za tydźeń na samsnym městnje. Za zastojnstwo županki/župana dotal jedyn namjet předleži. Za nowe župne předsydstwo je jich wosom kandidatow. Wobdźělnicy tež městožupanku/městožupana a rewizijny wuběrk wuzwola. Dalše wólbne namjety su witane. Na „hłownej“ chcedźa Radworsku staršisku iniciatiwu z. t. do župy přiwzać.

Kaž je na wuradźowanju předsydstwa z wašnjom, rozprawještaj rěčnaj motiwatoraj župy wo swojich aktiwitach. Tak bě so Raphaela Wićazowa na filmowym popoł­dnju Bjesady w Rakecach wobdźěliła a zwiski nawjazała. Wona chce sebje a swoju dźěławosć nětko w gmejnskich nowinach regiona předstajić. Lucian Kaulfürst namjetowaše, šulske radijo w Hućinjanskej zakładnej šuli nastorčić. – Leńka Thomasowa hódnoćeše schadźowanku swójbow minjenu njedźelu jako wulki wjeršk za swójby a serbske žiwjenje w Radworju.