Delenjo probuja

pjatk, 10. awgusta 2018 spisane wot:
Konjecy. Serbski muski chór Delany změje wutoru, 21. awgusta, swoju prěnju probu po lětnjej přestawce. Spěwarjo zetkaja so kaž zwučene w 19 hodź. w Konječanskej burskej stwě. Zwu­čować budźe z nimi Pawoł Šołta-Ku­lowski. Swój přichodny wustup změja Delenjo 9. septembra na chórowym spěwanju we Wochožanskim parku błudźenkow. Muski chór pyta přeco hišće­ za wuměłstwowym nawodu/wuměłstwowej nawodnicu. Dotalny dirigent Handrij Henčl je cyłk kónc junija wopušćił. Štóž je hudźbnje nadarjeny a ma zajim muski chór dirigować, njech přizjewi so pola předsydy Janeka Wowčerja pod .

Stup dale z kandidatomaj

štwórtk, 09. awgusta 2018 spisane wot:

Drježdźany (SN/bn). Towarstwo Stup dale­ je na swojej wurjadnej zhromadźi­znje wčera kandidataj za Serbski sejm wuzwoliło. Za wólby namjetuja Jadwigu Pjacec a wjelelětneho předsydu towarstwa dr. Andreasa Klugu. Tele dny chcedźa tuž wólbnemu wuběrkej wotpowědne podłožki přepodać.

„Nimo toho smy wo tym wuradźowali, hač tež zajimcam, kotřiž njejsu z čłonom Stup dale, kandidaturu přez naše towarstwo zmóžnimy. Jedna-li so wo kmane, mysl sejma podpěrace wosobiny, jich rady zapřijamy. Mějachmy tójšto napra­šowanjow wot ludźi, kotřiž bychu so rady angažowali, štož pak w jich, nažel Domowinskich strukturach njemóža“, dr. Kluge rozłoži.

Dalšej dypkaj dnjoweho porjada běštej rozprawa – mjez druhim mjenowaše dr. Kluge „Łobjowy swjedźeń wulki wuspěch, z kotrymž je so nam poradźiło, łuži­ske žiwe žiwjenje a politiske hibanje Serbow zjawnosći sposrědkować“ – a planowanje zarjadowanjow za nowe šulske lěto. Tak chcedźa so wo měsačny poskitk kaž na přikład dźiwadłowe předstajenje abo ptačokwasny swjedźeń starać.

Njepilowy chlěb bórze zaso změja

srjeda, 01. awgusta 2018 spisane wot:

Spěchowanske towarstwo Njepilic dwór w Rownom je so minjenu sobotu wšitkim pomocnikam a podpěraćelam towarstwa za njesebičnu pomoc na dobro cyłka a wo zwoprawdźenje předewzaćow, předewšěm při přewjedźenju ­zarjadowanjow, z lětnim swjedźenjom na Njepilic statoku dźakowało.

Rowno (JoS/SN). Lětni swjedźeń na Rownjanskim Njepilic statoku, lětsa bě to 19. pospochi, ma dobru tradiciju. Kóždolětnje dźakuja so z nim tym, kotřiž zarjadowanja w běhu lěta na najwšelakoriše wašnje čestnohamtsce podpěruja. Tak bě tež zaso minjenu sobotu na Njepilic statoku. „Smy na kóždu pomocnu ruku pokazani“, rjekny Manfred Nikel. „Tajku poskićeja nam předewšěm wobydlerjo wsow Slepjanskeje wosady, Slepjanske gmejnske zarjadnistwo, tamniša ewangelska wosada, towarstwa a kameradojo dobrowólneje wohnjoweje wobory“. Dźak wupraji Nikel tež Grodkowskim hercam, kotřiž su mjeztym k domjacej kapale na statoku postupili. Tak běchu wězo tež na lětnim swjedźenju zastu­pjeni. Kapała pod nawodom Rolanda Bartka ma mjeztym njeličomne serbske pěsnje na składźe.

Poradźeny program młodźiny

póndźela, 30. julija 2018 spisane wot:

Přitomnym wjesne stawizny na zajimawe wašnje posrědkowali

Serbske Pazlicy (aha/SN). Zo njebě so před štyrjomi lětami kaž do toho kóždolětnje w zamołwitosći wjesneho kluba wjesny swjedźeń wotměł, tehdy mnozy Serbskopazličenjo wobžarowachu. Tohodla jara witachu, zo je młodźinski klub nadawk mjeztym přewzał.

Porjedźenka

srjeda, 18. julija 2018 spisane wot:
W rozprawje wo Smolerjowym dnju w Lubiju­ w Serbskich Nowinach z 9. julija je dóšło k změšenju faktow. Prawje ma rěkać:­ Při farje spominachu na Rudolfa Mjenja­ a na poćah młodeho Handrija Zejle­rja, pěsnjerja znateje „Lubki lilije“, k njemu. Při Janskej cyrkwi bě rěč wo tam namakanych serbskich rukopisach a wo K. B. Preuskeru, kiž přihotowaše knihu městnych mjenow Łužicy a sej ze serb­skimi duchownymi dopisowaše. Awtorka prosy wo wodaće za misnjenje. SN

Kniha wuzběhuje jeje zasłužby

srjeda, 11. julija 2018 spisane wot:
Spěchowanske towarstwo Čornochołmčanskeho Krabatoweho młyna je nětko knihu wudało, kotraž rěka „Dźiwje lěta Gertrud Wincarjoweje“. Nowostka hódnoći zasłužby bywšeje Čornochołmčanskeje wjesnjanostki, kotrejž maja so hłownje dźakować, zo móžeše dožiwjenski areal na kromje wsy nastać. Dopomnjenki Wincarjoweje spisa awtorka Gabriele Kohlmann. Tež wid sobuwojowarjow angažoweneje žony je w knize protokolowany. Dale je zapřijata mała chronika wo stawiznach nastaća Krabatoweho młyna. Jednu z inscenacijow lětušich Krabatowych swjedźenskich hrow je sej tež Gertrud Wincarjowa wobhladała a dósta při tej składnosći knihu wo sebi přepodatu. Zajimcy móža sej nowostku w Krabatowym młynje kupić. Nimo toho je tam tele dny kniha Stefana Rössela „Dospołnje zakuzłany“ wušła, ­kotraž rysuje wuwiće Krabatowych swjedźenskich hrow. Foto: Carmen Schumann

Lubij (cyna/SN). Minjeny pjatk wule­ćachu sej čłonojo towarstwa Přećeljo Smolerjec kniharnje do Lubija, zo bychu na slědach serbskeje literatury jeje two­riće­­low Rudolfa Mjenja, Michała Šewčika a wosebje tež Jurja Wingera, kiž je před sto lětami zemrěł, wopominali.

Jurij Winger njeje nam jenož powědančka zawostajił, kaž znatu historisku powědku „Hronow“, kotraž horjo w Třicećilětnej wójnje dokumentuje. Wón bě tež přełožowar, pisaše reportaže a dźiwadłowe hry. Wot lěta 1903 hač do swojeje smjerće bě farar w Lubiju. Tuž wo­pytachu čłonojo towarstwa najprjedy kato­lsku cyrkej Marije mjena, hdźež bě do Wingera hižo Šewčik skutkował.

Michał Šewčik bě prěni serbski duchowny w Lubiju a spisaćel kulturno­historiskich studijow, basnjow, směškow a powědančkow. Nimo toho bě tež prěni serbski knihownik Serbskeho seminara w Praze. Po Wingeru přińdźe do Lubija farar Pawoł Šołta. Wón započa tamnišu farsku chroniku pisać.

Kóžda toboła jónkrótna

póndźela, 09. julija 2018 spisane wot:
Hižo dlěši čas sej žony chóra Serbskeho folklorneho ansambla Slepo přejachu, měć na turnejach abo na swjedźenskich ćahach tobołu, kotraž so k narodnej drasće hodźi. Ideja lubješe so tež Giseli Kotisekowej, bywšej nawodnicy Brězowskeje přazy. Wona je někotre modele naćisnyła. Mjeztym stej so dwě lěće minyłoj, a wuslědki móžachu holcam a žonam jako hotowe toboły prezentować. Kóžda z nich je unikat. Z dźewjeć předležacych mustrow dyrbja so žony chóra nětko za jedyn rozsudźić. ­Potom změje Brězowska přaza zaso wjele dźěła, z wěstosću pak njebudźe so žana ­toboła druhej runać. Foto: Wolfgang Kotisek

Hórčenjo party z MDR dobyli

štwórtk, 05. julija 2018 spisane wot:

Hórki/Drježdźany. (SN/JaW). Hórčanske wjesne towarstwo Při skale je wčera wothło­sowanje radijoweho sćelaka MDR Sakska wo wuhotowanje koparskeho wječora dobyło. Jutře wječor přijědźetaj tuž moderatoraj Gert „Zimmi“ Zimmermann a Ronny Maywald do Hórkow, zo by­štaj z wjesnjanami a wšěmi dalši­mi zajim­cami swjećiłoj a sej zdobom štwórć­finalnu partiju Brazilska – Belgiska na wulkej płachće wobhladałoj.

Čłonka předsydstwa wjesneho towarstwa Katharina Jurkowa bě Hórčanow na wubědźowanje sćelaka přizjewiła, a wčera mějachu ludźo-słucharjo na internetnej stronje MDR wothłosować, hač dóstanu Hórki swjedźeń abo wohnjowa wobora w Ochranowje. Wuslědk bě, zo je hač do popołdnja w třoch 18 510 ludźi hłosowało, z nich 9 886 za Hórčanow.

Kaž Katharina Jurkowa na naprašo­wanje zdźěli, přewjedu zarjadowanje „na łuce za Smolic statokom. Započatk je w 19 hodź., to budźetaj moderatoraj hižo na městnje. Wot 20 hodź. wobhladamy sej zhromadnje koparsku hru. MDR změje darmotne piwo sobu, dalše zastaranje budźe zaručene. Wšitcy sće přeprošeni.“

Wot wustawy so jara zdaluja

štwórtk, 05. julija 2018 spisane wot:

Žadanje AfD, Serbow ličić, sylne reakcije zbudźiło

Rowno (SN/JaW). Žadanje AfD, zo měli Serbow ličić, je tež mjez čłonami Zwjazkoweho předsydstwa Domowiny njezrozumjenje a diskusiju zbudźiło. Informowała bě wo naležnosći předsydka Rady za serbske naležnosće Sakskeje Marja ­Michałkowa we wobłuku rozprawy wo skutkowanju rady na minjenym wuradźowanju zwjazkoweho předsydstwa na Rownjanskim Njepilic statoku.

nawěšk

nowostki LND