Sorabija Lipsk ma nowe předsydstwo

pjatk, 25. meje 2018 spisane wot:

Swoju druhu hłownu a wólbnu zhromadźiznu po zapisanju jako towarstwo w lěće 2016 wotměchu čłonojo Lipšćanskeje Sorabije zawčerawšim w Centrifuze, klubowni serbskeho internata.

Lipsk (ddy/SN). Zawěrno bohata bě projektowa rozprawa cyłka, skedźbnjaca na wuspěšne zarjadowanja, kaž běchu to na přikład chodojtypalenje, mejemjetanje a studentske póstnicy. Wone swědča wo strowym towarstwowym žiwjenju Sorabičanow w Lipsku.

Rejwarjo SFAW pytaja dorost

pjatk, 18. meje 2018 spisane wot:

Wudwor (SN/bn). Serbski fol­klor­ny ansamb­l Wudwor (SFAW) pyta tuchwi­lu za nowymi čłonami, kotřiž chcedźa přichodnu dorostowu rejwansku skupinu wutworić. Dotalny młodźinski cyłk „je takrjec postupił a je nětko naše­ hłowne ćěleso“, rozłožuje předsyda SFAW Stanij Handrik. Změna bě trěbna, dokelž „je so předsydstwo hižo loni na­zymu rozsu­dźiło, rejwansku skupinu rozpušćić. Přičina toho bě, zo njebě mnohim­ rejwarkam a rejwarjam wjace móžno, prawidłownje na probach so wobdźělić – pak, dokelž su mjeztym studenća w zdalenych městach, na wukubłanju abo, a to njeměnju zacpějnje, su pro­sće přestari za skupinu. Njemóžeš dźě wot 22lětneho wočakować, zo z třinaćelětnej partnerku rejuje. Nic jenož starobneho rozdźěla dla, poriki měli wšak so tež někak po wul­kosći hromadźe hodźeć.“ Přiwšěm njeje „tajka fluktuacija za nas ničo wosebiteho. Skerje na te wašnje naš ansambl wobstajnje wobno­wja­my. To pak njepłaći za našich hercow a za našich spěwarjow Přezpólnych.“

Hordosć na korjenje budźić

pjatk, 18. meje 2018 spisane wot:

Hosćićeljo Serbskeho ewangelskeho domizniskeho dnja so přihotuja

Bluń (AK/SN). Jědnaty Serbski ewangelski domizniski dźeń Wojerowskeho regiona budźe 17. junija w Blunju, a to w cyrkwi kaž tež w swjedźenskim stanje. „Tón kónc tydźenja wotměja Blunjenjo swój wjesny swjedźeń. Njedźela steji cyle w znamjenju serbskeho domizniskeho dnja“, podšmórnje farar Heinrich Koch, zastupowacy superintendent cyrkwinskeho kruha šleska Hornja Łužica. Nimo toho je wón čłon serbskeho ewangelskeho dźěłoweho kruha, kotryž domizniski dźeń přihotuje. Zapřijeći su Blunjanska wjesna rada, wosadna cyrkwinska rada, towarstwa, chóry a dalši.

Zaměr je wobdźělnikow we wěrje sylnić, hordosć na jich serbske korjenje we Wojerowskim regionje budźić a jim zmužitosć do přichoda posrědkować.

Podpěra trěbna

srjeda, 16. meje 2018 spisane wot:
Kelko prócy nałožuja tam, hdźež lědma hišće serbsce rěča, wuhotować napisy dwurěčne, móža wopytowarjo zwěsćić w Čornochołmčanskim Krabatowym młynje. Tak steja tež prašenja w kwisu wo Krabaće, pod so napisane, we woběmaj rěčomaj. Wučerki wšak namjetuja, za serbšćinu wuknjacych prašenja jenož w serbskej rěči poskićeć. To chce jednaćel Krabatoweho młyna Tobias Čižik nětko najspěšnišo zwoprawdźić. Ćešo porno tomu budźe sporjedźeć prawopisne njedostatki. Za to trjebaja tam podpěru. Hdźe pak ju namakaja? Poprawom w institucijach, kaž w Serbskim instituće, Rěčnym centrumje WITAJ a Ludowym nakładni­stwje Domowina. To dyrbjeli towarstwa a zarjadnišća w serbskim rěčnym rumje zhonić. A pomhać dyrbjało sobudźěłaćerjam mjenowanych a dalšich serbskich ­institucijow wšědna samozrozumliwosć być. Milenka Rječcyna

W Kubšiskej gmejnje

srjeda, 16. meje 2018 spisane wot:
Nic gmejna Bukecy, kaž w rozprawje wo wuradźowanju pomnikoweho wuběrka Maćicy Serbskeje (wudaće SN ze 14. meje) mylnje rěka, ale Kubšiska chce hišće lětsa pomjatnu taflu za Korlu Bohuwěra Šěcu w Rachlowje wotkryć. Prawje je, zo je to iniciatiwa Domowinskeje skupiny Rachlow/Mješicy, wohnjoweje wobory Rachlow a gmejny Kubšicy, do kotrejež wjes tež słuša. Na to skedźbnja dr. Ludwig Ela z Rachlowa pod Čornobohom.

Rostliny měnjeli a kupowali

srjeda, 16. meje 2018 spisane wot:

Mjeztym třeća bursa rostlin je minjenu njedźelu syłu zajimcow do Miłočanskeje skały při Krabatowym kamjenju přiwabiła. Mnozy wužiwachu zdobom składnosć, tež nazhonjenja wuměnjeć.

Miłoćicy (SN/MiR). Towarstwo Kamjenjak je po wuspěšnymaj prěnimaj zarjadowanjomaj loni a předloni dalši króć na rostlinsku bursu přeprosyło. Tak přichwatachu njedźelu popołdnju do Miłočanskeje skały ludźo z wokoliny kaž tež z dalšich kónčin. Mjez poskićerjemi běchu tuž zahrodkarjo ze wsy, ale tež z Nowoslic, Kulowa a samo Narća.

Spočatnje witaše čłon Kamjenjaka Thomas Noack na přednošk wo permakulturje. W tym zwisku sej přitomni wuwědomichu, zo su wysoke hrjadki (Hochbeete), kotrež maja mnozy přijomneho wobhospodarjenja dla w swojej zahrodce, dźěl mjenowaneje kultury. „Permakulturu mjenuja někotři tuž tež lěnje zahrodkarjenje. Štóž pak so tomu wašnju plahowanja rostlin wěnuje, spěšnje pytnje, zo wone wužaduje“, fachowc podšmórny.

Premjera za Gretu Schulzojc

wutora, 15. meje 2018 spisane wot:
Na 1. wěžowy swjedźeń při „Ćežkej horje“ přeprosy Towarstwo za hórnistwowy turizm­ Wjelcej minjenu sobotu na měšćansku kromu Běłeje Wody. Nimo wšelakich kulturnych poskićenjow je tež Serbski folklorny ansambl Slepo mały program předstajił.­ Swój premjerny wustup měješe při tym hakle dwanaćelětna Greta Schulzojc­ (druha wotlěwa) z Baršća na dudach. Dale hudźachu Melanie Kotisekec na wul­kich huslach, Frank Hermaš na trompeće, Wolfgang Kotisek na dudach a Emi­ Panašec na małych huslach (wotprawa). Foto nasta na platformje wuhlad­neje wěže, zwotkelž maš wuhlad na hižo rekultiwowane přestrjenje Wochožan­skeje brunicoweje jamy hač k Hamorskej milinarni. Foto: Joachim Rjela

Dalše pomniki narodowcam

póndźela, 14. meje 2018 spisane wot:

Row městopředsydy Domowiny, rěčespytnika a fararja Bogumiła Šwjele (1873–1948) na Choćebuskim sewjernym pohrjebnišću je ponowjeny. 17. meje chcedźa tam přidatu taflu swjatočnje wotkryć. Tak zwoprawdźi so lětuši druhi pomnikowy projekt, zdźěli sobu­dźěłaćer Załožby za serbski lud John Petrik minjenu wutoru na zeńdźenju pomnikoweho wuběrka Maćicy Serbskeje.

Budyšin (ML/SN). Prěni lětuši pomnik bu 28. apryla w lěsu pola Łomska za wot Gestapo zamordowaneho pólskeho nućenca Stanisława Błażejczuka w přitomnosći 150 Polakow ze Żarow, Serbow a Němcow na ekumeniskej nutrnosći wotkryty. Wo złóstnistwje nacijow nalěto 1942 je Trudla Malinkowa dokumentaciju spisała, kotraž je zhromadnje z powědančkom Marje Kubašec „Row w serbskej holi“ trojorěčnje w LND wušła. Awtorka přednošowaše wo tym tež pólskim wobdźělnikam nutrnosće. Serbske Nowiny wo emocionalnje jara skutkownym podawku rozprawjachu.

Zhromadnosć je jej wažny element skutkowanja

póndźela, 14. meje 2018 spisane wot:

W Nowej Jaseńcy je Monika Cyžowa wčera 65. narodniny swjećiła. W Serbach znata je wona mjez druhim jako wjele­lětna předsydka Zwjazka serbskich rjemjeslnikow a předewzaćelow (ZSRP). ­Nimale runje tak dołho zastupuje swoje towarstwo w Zwjazkowym předsydstwje Domowiny.

Jako załoži horstka horliwcow-předewzaćelow 1997 swoje towarstwo w Chrósćicach, wuzwolichu sej Moniku Cyžowu za předsydku. W krutej prawidłownosći čłonojo ZSRP jej tele zastojnstwo kaž tež tamne w zwjazkowym předsyd­stwje zas a zaso dowěrjachu. Měnjachu, zo „nima firmu nawjedować“, a móže so tohodla lěpje hač mnozy druzy wo nawod towarstwa starać.

Na prěnim zhromadnym wulkim zarjadowanju ZSRP w Chróšćanskej „Jednoće“ ze Serbskim ludowym ansamblom citowachu baseń Jakuba Barta-Ćišinskeho „Lećće z časom“ a Jurja Brězanowu „My to mamy w ruce“. To bě spomóžny započatk, wšako zwurazništej basni na swoje wašnje programatiku zwjazka rjemjeslnikow a předewzaćelow.

Nadźijeja so podpěry gmejny

pjatk, 11. meje 2018 spisane wot:

Z mnohostronskimi, originelnymi zarjadowanjemi chce spěchowanske towarstwo Zetkawanišćo Dom Zejlerja a Smolerja Łaz kulturne žiwjenje regiona dale wobohaćić. „Naš najnuzniši nadawk wostanje nowych čłonow zdobyć“, podšmórny předsyda Reinhardt Schneider srjedu na hłownej zhromadźiznje towarstwa z 41 čłonami.

Łaz (AK/SN). W rozprawje wo zdokonjanym dźěle w minjenymaj lětomaj skedźbni Reinhardt Schneider na předźěłanu trajnu ekspoziciju „Domizniske stawizny Łazowskeje gmejny“. Loni wotewrjena wjedźe wona po Domje Zejlerja a Smolerja, po wučbnej šćežce „Stacije žiwjenja Handrija Zejlerja“ kaž tež do cyrkwje. Dalši wjeršk bě składnostnje lětušeho serbskeho wječorka poswjećene napo­dobnjenje originalneje połpostawy Zejlerja z lěta 1931. Intensiwnje wobswětliło je towarstwo wotměnjate stawizny Zejlerjoweho pomnika při torhošću.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND