Wojerecy (SN/at). Domowinska župa „Handrij Zejler“ a dźěłowe zjednoćenstwo „Serbske žiwjenje“ při Wojerowskej Kufa chcetej zhromadne dźěło nazymu na zrěčenski zakład stajić. To je konkretny wuslědk z rozmołwy wuběrka za zjawnostne a wukrajne dźěło Zwjazkoweho předsydstwa Domowiny z filmowču a awtorku Grit Lemke. Na zetkanju minjeny pjatk w bróžni župneho domu we Wojerecach so zdobom kožupanka Gabriela Linakowa wobdźěli.

Poprawny předmjet bě wuměna wo tym, kak hodźało so serbstwo zboka folklory we łužiskej zjawnosći zakótwić. „Za prócowanje wo doprědkarske serbstwo widźu we Wojerecach wulki potencial“, zwěsći zjimajo předsyda wuběrka Krystof Grofa. Přeco zaso wuzběhnychu rozmołwni partnerojo wuznam widźomneje serbskeje rěče. „Rěč je kluč za wšo, hakle potom rozumiš, zwotkel pochadźeš. Sym po swojim žiwjenju běhała, bjez toho, zo sym to wědźała“, zhladowaše Grit Lemke na skok dopóznaća za sebje po wobdźělenju na prěnim kursu delnjoserbšćiny w Choćebuzu.

Grodk (SN/bn). Franciska Grajcarekec z Budyšina je nowa předsydka Spěchowanskeho kruha za serbsku ludowu ­kulturu. Na swojej hłownej a wólbnej zhromadźiznje předwčerawšim, sobotu, w Grodku wuzwolichu čłonojo towarstwa nimo njeje „tójšto młódšich mjezwočow“ do předsydstwa, kaž w nowinarskej zdźělence rěka. Zdobom dźakowachu so zastojnstwo na čole kruha 20 lět wukonjacemu Eberhardej Zobelej, kiž bě so dalšeje kandidatury wzdał.

Rozprawa wo dźěławosći kruha w minjenych třoch lětach wujewja, zo bu „na­jebać koronu dosć wulka ličba projektow na polu lajskeje a ludoweje kultury ze sylnym serbskim razom přewjedźena“. Jako přikłady mjenowachu mjez druhim „dźěłarnički za molerjow, rězbarjow, wušiwarki a keramikarjow“. Drje najwažniši wjeršk, wubědźowanje wo najrjeńše jutrowne jejko, móžachu njehladajo wobmjezowanjow pandemije dla „swěru zwoprawdźić“, byrnjež z nim zwisowace jutrowne wiki w Budyskim Serbskim domje dwójce wupadnyli.

Do zhromadźizny wopytachu přitomni zhromadnje Serbsku tkajersku jstwu w Drjowku a po tym Eitnerec keramisku dźěłarnju w Grodku.

Berlin (SN/JaW). Přichodny kongres Federalistiskeje unije europskich naro­dnych mjeńšin (FUEN) bě jedne z ćežišćow zetkanja Mjeńšinoweje rady Němskeje srjedu a wčera, štwórtk, w Berlinje. Kaž zdźěli předsyda Domowiny Dawid Statnik na naprašowanje, wotměje FUEN kongres hinak hač planowane w Němskej. „Předwidźane bě, jón w Estiskej přewjesć, štož pak je so hladajo na aktualnu krizu na wuchodźe změniło. Naležnosć smy tuž z generalnej sekretarku FUEN Évu Pénzes rozjimali“, tak Statnik.

Dale su so zastupnicy štyrjoch naro­dnych mjeńšin Němskeje – Frizow, Sintow a Romow, Danow w Němskej a Serbow – z nowej społnomócnjenej zwjazkoweho knježerstwa za wusydlencow a narodne mjeńšiny Natalie Pawlik zetkali. „Tam smy wo swojim dźěle na dobro mjeńšin rozprawjeli a so mjez sobu zeznali.“

Hižo srjedu wopyta mjeńšinowa rada financne ministerstwo w Berlinje a je hižo prěnje rozmołwy ze zastupnikami politiki wjedła, mjez druhim ze zapósłancom mjeńšinoweje strony Južnošleswigskeho wolerskeho zjednoćenstwa SSW Stefanom Seidlerom.

„Bychmy-li pola nas něšto tajke kaž špihel popularnosće wudawali ... by jeho mjeno sobu cyle prědku stało“, pisaše k sydomdźesaćinam Bjarnata Nowaka serbski publicist a spisowaćel Cyril Kola. Tehdy, hdyž bě tak mjenowane koło Starych serbskich knjezow wjetše a młódše. Hdyž potom, doniž njemějach za zastup do starych muži trěbnu starobu, sobu z nimi na měsačnych zetkanjach sedźach, wobdźiwach Bjarnata Nowaka, hdyž ze swojeho žiwjenja srjódki powědaše. Moje napominanje, tole napisać abo do protokola dać, nochcyše rady słyšeć: što da sym wulkeho činił ...

Nětkole, w sydomadźewjećdźesatym žiwjenskim lěće, je wutroba Bjarnata Nowaka 27. junija zastała bić.

Čas žiwjenja je so Bjarnat Nowak wobarał: jako hólčec a jako młodźenc, w systemje, kotryž jeho njeběše, jako młody muž w systemje, kotryž jeho běše, jako starc w hinašim systemje, kotryž znowa jeho njeběše. Tak widźane, je Bjarnat Nowak w swojej wosobje nazhonjenja mnohich Serbowkow a Serbow zjednoćił.