31. januara 1926 narodźi so we Wotrowje Jurij Wróbl, pozdźišo w Serbach znaty jako sportowy wučer na Choćebuskej Serbskej rozšěrjenej wyšej šuli a jako župan wysokošulskeje župy „Jan Skala“. Wot lěta 1946 chodźeše ze swojim wjesnjanom Benom­ Šołtu a Kanečanom Jurjom Pěčku w Českej Lípje do čěskeje rjadownje tamnišeho měšćanskeho gymnazija. W šulskim lěće 1948/1949 bě wučer we Woje­recach, na to studowaše w Praze na ćěło­zwučowanskej fakulće Karloweje uniwersity. Tam zezna Emila Zátopeka a Evu Bosákovu. W prózdninach hraješe doma kopańcu we Wotrowje, Chrósćicach a w studentskej wubrance. Ze swojej spěšnosću a wuběrnej techniku Wróbl wosebje napadny. Wot lěta 1953 hač do 1980 bě wučer­ w Choćebuzu. Jeho iniciatiwje mamy­ so sobu dźakować, zo wotměwachu so wot spočatka 1954 w Chrjebi lětnje sportowe a kulturne swjedźenje serbskich kubłanskich institucijow. Po ćežkim wobchadnym njezbožu w lěće 1980 bu Jurij Wróbl inwalid. Wón zemrě 24. apryla 1981 w starobje jeničce 55 lět.

Mikławš Krawc

Budyšin (SN). Spěchowanski kruh za serbsku ludowu kulturu přewjedźe lětsa 63. wubědźowanje wo najrjeńše jutrowne jejko za dorosćenych a namołwja jich, so w bohatej ličbje na nim wobdźělić. „Chcemy tež rady wšěch tych narěčeć, kotřiž hižo dołho doma do jutrow jejka wóskuja, ale so hišće přewinyli njejsu na wu­bědźowanju so wobdźělić. Prošu zmužće so a zapodajće swoje najrjeńše kolekcije, stajnje 3 jejka za jednu kolekciju“, rěka w namołwje. Při debjenju jejkow měli so jeno znate serbske techniki z tradicionalnymi srědkami nałožować. Kóždy pak smě so z wjacorymi technikami na wubědźowanju wobdźělić. Dźiwać měło so na bohate tradicije w dekorje a barbje, kotrež hodźa so ze swójskimi idejemi wariěrować. Kolekcijam přidać měli wuměłcy mjeno, adresu, starobu a pomjenowanje techniki.

Stuttgart (SN/CoR). „Koncert za wiolinu a smyčkowy orchester“ Jana Pawoła Nagela (1934–1997) je hudźbny wědomostnik Tobias Bröker na swoju poručensku lisćinu­ bohužel zanjechanych wiolinowych koncertow přewzał. W lisće hudźbnemu nakładnistwu ENA Liany Bertók wón piše: „Slědźu hižo mnohe lěta wo kompozi­cijach za solowu wiolinu a orchester. A mjez tysacami twórbow, kotrež znaju, je wiolinowy koncert Jana Pawoła Nagela jedyn z najbóle wusahowacych scyła.“ Minjene 15 lět je w Stuttgarće by­dlacy Tobias Bröker wjace hač 12 000 kompozicijow za solo-wiolinu zběrał. Najwjace z nich je wón w jendźelskorěčnej antologiji „The 20th centuryviolin concertante – A repertoire guide to the compositions for violin concertante, written between 1894 and 2006“ zestajał. Zběrka je internetnje přistupna. Tež dalša Nagelowa twórba „Bórkowska“, třeća reja z krucha „Tři serbske reje za wiolinu a piano“, je tam zapřijata. „Zajimuju so tež za dalše wiolinowe koncerty serbskich komponistow“, pisa Tobias Bröker SN.

We Wojerowskim Lessingowym gym­naziju wotmě so sobotu mytowanski koncert regionalneho wubědźowanja „Młodźina hudźi“. Z cyłkownje 90 wobdźělnikow zarjadowanja je so 17 mytowanych předstajiło.

Wojerecy (DGe/SN). Dietmar Wolf jako předsyda saksko-łužiskeho towarstwa Młodźina hudźi je so wosebje sponsoram za pomoc dźakował. Někotrych instrumentalistow z Budyskeje a Wojerowskeje hudźbneje šule kaž tež ze Zhorjelskeho třiróžka, kotřiž běchu najwjace dypkow w swojej kategoriji docpěli, počesćichu darićeljo z wosebitym mytom. Mjez nimi bě Wojerowski wyši měšćanosta Stefan Skora (CDU), kiž přepoda wiolinistce Helen Vogel z Wojerowskeje hudźbneje šule čestne myto města. Wona smě nětko 17. apryla z Nowej Łužiskej filharmoniju 51. Wojerowske hudźbne dny wotewrěć.