Praha (ČŽ/K/SN). Lěto wob lěto přiběra ličba čěskich lěkarjow, kotřiž du do Němskeje, zo bychu tam w powołanju dźěłali. Hdyž bě 762 medicinarjow lěta 2012 takle jednało, naslědne lěto 862 a lěto pozdźišo 942, je jich ličba loni hižo wjace hač 1 000 wučinjała. Tole wozjewja nowina Mladá fronta dnes, powołujo so na statistiku Čěskeje lěkarskeje komory (ČLK). Tale ma ze swojeje strony za to, zo wotchadźeja čěscy lěkarjo do Němskeje předewšěm tójšto wyšeje zasłužby dla, nic naposledk wšak tež z teje přičiny, zo nadeńdu tam lěpši system dalšeho kwalifikowanja kaž tež mjenje běrokratije. „Móžno, zo wěstu rólu při tym tež cyłkowna atmosfera hraje“, přispomnja k naležnosći rěčnik ČLK Michal Sojka. Za njemnohich je po jeho wědźenju geografiska bliskosć prěnjotny motiw. Do susodneho kraja woni wšědnje na dźěło jednorje dojězdźeja. Čěsku wopušćeja hłownje lěkarjo-fachowcy, kaž na přikład chirurgojo, internisća abo ortopedojo. Někotre mjeńše chorownje maja z toho hižo personelne problemy, někotre starosća so samo wo swoju eksistencu.
Waršawa (dpa/SN). Hladajo na hrožacy wustup Wulkeje Britaniskeje z Europskeje unije so dźeń a wjace pólskich wupućowarjow radšo w Němskej za dźěłom rozhladuje hač w Jendźelskej. Tole je wuslědk woprašowanja, kotryž wčera we Waršawje wozjewichu. Tak by 34 procentow wšěch k wupućowanju zwólniwych najradšo w zapadnym susodnym kraju dźěłało, jenož hišće 18 procentow we Wulkej Britaniskej. „Začuwamy cyle jasnje z wustupom zwjazane strachi“, rjekny Maciej Witucki, čłon předsydstwa posrědkowanskeje firmy Work Service, kotraž bě woprašowanje pola slědźenskeho instituta Millward Brown skazała.
Ličba zajimcow, kotřiž we Wulkej Britaniskej za dźěłom pytaja, je porno minjenemu lětu 2015 wo dwanaće procentow woteběrała. „Ludźo so radšo stabilnym němskim dźěłowym wikam přiwobroćeja hač njewěstemu wuwiću we Wulkej Britaniskej“, Witucki podšmórny. Přidatnje jich němska zakładna mzda 8,50 eurow wabi. Nimo toho wšak w Němskej fachowych dźěłaćerjow a kompjuterowych specialistow z němskorěčnymi znajomosćemi pytaja.
Praha (dpa/K/SN). W stolicy Čěskeje je sobotu popołdnju něšto tysac ludźi za to demonstrowało, w kraju zlegalizować konop (cannabis). 19. raz hižo wotmě so w Praze tak mjenowany „milion marihuana march“, tónkróć z něhdźe 5 000 wobdźělnikami. Přewažnje młodźi demonstranća žadachu sej, zakonsce dowolić plahowanje a wobsedźenje mjeńšich mnóstwow konopje kaž tež priwatne konsumowanje marihuany za njemedicinske wotpohlady.
Dotal smědźa w Čěskej konopjowe produkty jeničce za wěste mediciniske zaměry wužiwać. Na raka abo aids schorjeni dóstawaju je přećiwo bolosćam na recept wot fachoweho lěkarja. Strona Piratow, sobuiniciatorka demonstracije, přihotuje znowelizowanje wotpowědneho zakonja, zo by přichodnje móžno było konop plahować. Tež w Ostravje je sobotu dobrych połsta ludźi za zlegalizowanje marihuany naležnje demonstrowało.
Waršawa. Wobydlerjo Pólskeje su wutoru, kaž kóžde lěto 3. meje, róčnicu wobstaća prěnjeje wustawy kraja swjećili, lětsa samo jubilejnu 225. Dnja 3. meje 1791 bě tehdyši pólski sejm po štyrilětnym wuradźowanju prěnju wustawu wobzamknył. Kopija rukopisneho manuskripta „konstitucije“, kaž Polacy wustawu mjenuja, pokazuja dźensa w něhdyšej rezidency pólskich kralow „Łazienki Królewske“ w stolicy Waršawje.
Staro-nowy šef słowakskeho knježerstwa koalicije štyrjoch stron Robert Fico měješe 18. apryla Narodnej radźe přednjesć program přichodnych zaměrow. Dóšło k prěnjemu jeho wustupej w parlamenće pak njenadźicy njeje. Fico bě krótko do toho swój obligatoriski rańši běh po nasypach Dunaja zabsolwował, nadobo pak bolosće w hrudźi čuł. Jeho přewodnicy mějachu tuž za radźomne premiera hnydom do chorownje dowjezć, mějo infarkt za móžny. Dowjezechu jeho tuž do wustawa za schorjenja wutroby. Tam su pola premiera někotre trochu „zatykane“ žiły zwěsćili a jeho na to 22. apryla operowali. Kardiochirurgiski zasah je direktor kliniki prof. Michal Hulman wosobinsce wuwjedł a pacientej tež dwójny bypass połožił. Zjawnosć mjeztym zhoni, zo je ministerski prezident wšitko derje přetrał a zo su jeho wčera z chorownje pušćili. Póńdźe pak najprjedy na kuru.
Waršawa. Štóž wobrazy němskeje zwjazkoweje kanclerki Angele Merkel (CDU) w zjawnosći spali, njetrjeba so w Pólskej chłostanja bojeć. To je Wrócławske statne rěčnistwo zdźěliło. Wuchadźišćo bě skóržba tamnišeho wyšeho měšćanosty Rafała Dutkiewicza. Tón bě na antieuropskim zarjadowanju nacionalistiskeje Organizacije narodnoradikalneho lěhwa (ONR) před radnicu města wobkedźbował, kak demonstranća plakaty z wobrazom Angele Merkel pala.
Praha (dpa/SN). Čěska republika je prěnich štyrjoch ćěkancow z Grjekskeje na zakładźe loni w septembru wobzamknjeneho plana Europskeje unije wo rozdźělenju migrantow přiwzała. „Je to skupina Syričanow“, zdźěli rěčnik statneho lěhwa za registrowanje ćěkancow Kiril Christov powěsćerni ČTK. Cyłkownje sydom Syričanow bě wěstotne přepruwowanje čěskich institucijow wuspěšnje wobstało. Třo z nich pak so zminychu. Prawdźepodobnje nochcychu do Čěskeje, kotraž je za swoju restriktiwnu politiku napřećo ćěkancam znata.
Dalšich 23 požadarjow azyla je Čěska wotpokazała. „W podłožkach tychle ludźi, kotrež smy z Italskeje a Grjekskeje dóstali, pobrachuja kopije wosobinskich dokumentow, kiž bychu jich identitu jasnje dopokazali“, ministerstwo rozłoži. Před sydom měsacami běchu nutřkowni ministrojo EU přećiwo woli Čěskeje, Madźarskeje, Rumunskeje a Słowakskeje wobzamknyli, 120 000 ćěkancow po wšej Europje rozdźělić. Čěska ma tuž 2 978 ludźi přiwzać.
Špindlerův Mlýn (dpa/SN). Čěska republika chce předań praskotakow přichodnje wobmjezować. Wotpowědnu iniciatiwu je justicny minister Robert Pelikán wčera připowědźił. W Němskej smědźa wobchody praskotaki hakle něšto dnjow do silwestra poskićeć. „Je hódne wo tym rozmyslować, hač nječinimy to podobnje“, rjekny Pelikán. To je jedyn z wuslědkow dwudnjoweje wuměny nazhonjenjow justicnych ministrow Sakskeje, Bayerskeje, Čěskeje a Pólskeje w Špindlerův Mlýnje. Ilegalne praskotaki z Čěskeje po měnjenju sakskeje justicy nutřkownu wěstotu swobodneho stata chětro wohrožeja. Kriminelni wužiwaja praskotaki, zo bychu awtomaty rozbuchali abo atentaty na ćěkancow skućeli. Hakle njedawno bě policija na raciji přećiwo prawicarskim skupinam wjetše mnóstwa čěskeje pyrotechniki našła.
Dalša tema zetkanja bě bój přećiwo wopojnemu jědej chrystal. Wulki dźěl drogi, kotruž w Němskej předawaja, pochadźa z Čěskeje. Praha je wotpowědne přećiwne naprawy připowědźiła.