Policija (25.10.22)
Statny škit přepytuje
Kulow. Tři skóncowane swjate křiže su sobotu dopołdnja policiji přizjewili. W prěnim padźe su njeznaći mjez Sulšecami a Lubhozdźom křiž ze zornowcoweho stołpa torhnyli. Po wšěm zdaću měrjachu so na železnu konstrukciju, kotruž sobu wzachu. Tamnej padaj staštej so na Salowskej dróze w Kulowje. Tam bě wobydler dwaj powalenej křižej přizjewił. Jónu běchu metalowy křiž wotrězali, ale ležo wostajili. Tamny metalowy křiž su skućićelo wułamali a sobu wzali. Kaž Zhorjelska policajska direkcija na naprašowanje zdźěli, je nětko statny škit dalše přepytowanja přewzał, a to do wšitkich směrow. Po dotalnych informacijach drje jedna so wo paduchow metala, nowinski rěčnik zdźěli.
Policija (24.10.22)
Paduchow spěšnje wuslědźili
Budyšin. Pjekarnja na Budyskej Seminarskej hasy bě w nocy na sobotu cil najprjedy njeznatych paduchow. Z pjenježneje kasety pokradnych woni 2 200 eurow. Njeskutk je wobstražowanska kamera filmowała. Hišće za čas policajskich přepytowanjow zjewištaj so na městnje njeskutka muž a žona w starobje 22 a 26 lět. Kaž z widejoweho materiala wuchadźeše, móhło so wo skućićelow jednać. Muž měješe wjace hač 2 000 eurow při sebi. W jeju bydlenjomaj namakachu mjez druhim grat za zadobywanja.
Policija (21.10.22)
Paduši w hosćencu
Nadźanecy. Njeprošenych hosći mějachu w nocy na srjedu w hosćencu w Nadźanecach (Nadelwitz) pola Budyšina. Korčmar bě hosćenc něhdźe w 23 hodź. zawrěł a so rano w 7.30 hodź. do njeho nawróći. W tym času běchu so njeznaći do lokala zadobyli. Napoje a jědźe pak běchu jim po wšěm zdaću wšojedne. Město toho wšitke rumnosće přepytachu a wzachu po informacijach policije něhdźe 600 eurow pjenjez sobu. Nimo toho načinichu na městnje njeskutka něhdźe 1 500 eurow wěcneje škody.
Policija (20.10.22)
Zasadźenje trašaceho filma dla
Wojerecy. Dokelž žona we Wojerecach w nocy na srjedu wótře wołanje ze susodneho bydlenja słyšeše, wona policiju wołaše. Do móžneho swójbneho rozestajenja pak zastojnicy zapřimnyć njetrjebachu. Podružnicy we wopisanym bydlenju běchu jeničce trochu wótře w telewizoru trašacy film hladali, w kotrymž so wotpowědne zwuki jewjachu. Mjeztym běchu telewizor mjelčišo nastajili, tak zo móžachu policisća zaso wotjěć.
Policija (19.10.22)
Drogi wotedał
Budyšin. Po wšěm zdaću swoje swědomje wolóžić chcyše w nocy na póndźelu 25lětny muž w Budyšinje. Krótko po połnocy klinkaše wón na policajskim rewěrje a rjekny, zo wonka na třěše policajskeho awta drogi leža. Kaž so wukopa, bě wón je sam tam połožił, hromadźe z trašawku, kapsnej lampu a móšnju. Muž policistam zdźěli, zo ma nimo 40 gramow crystala z třěchi awta doma dalše drogi a pólske praskotaki. Přepytawši jeho bydlenje a zahrodowy domčk namakachu zastojnicy wjetše mnóstwo amfetaminow, konopa a marihuany kaž tež kokain, crystal, trašawku a wulku hromadu pyrotechniki. 25lětneho na to nachwilnje zajachu. Při drogowym tesće zwěsćichu, zo bě wón wšelake družiny wopojnych jědow brał. Přećiwo młodemu Budyšanej přepytuja nětko podhlada wikowanja z drogami a přeńdźenja přećiwo zakonju wo brónjach a rozbuchadłach dla.
Policija (18.10.22)
Dźěćo zawlec chcył
Huska. K pospytnemu zawlečenju dźěsća je minjenu sobotu popołdnju w Husce dóšło. Muž bližeše so ležownosći, na kotrejž dźěćacy wozyčk steješe. Wón storči staršeju doboka a hrabny sej wozyčk z ćěšenkom. Nan a wjacori swědkojo tomu zadźěwachu, zo móžeše skućićel wotjěć. Woni jeho přewinychu a policiju wołachu. Zastojnicy wzachu 29lětneho Egyptowčana sobu na rewěr a přećiwo njemu pospytne zawlečenje dźěsća přizjewichu. Samsny muž bě hižo dźeń do toho w Husce policajsce napadnył. Předwčerawšim dyrbjachu so zastojnicy z nim we Wallrodźe zaběrać.
Policija (17.10.22)
Moped manipulował
Němcy. Dobre wóčko mějachu policisća sobotu popołdnju w Němcach. Tam napadny jim moped typa S50 N, na kotrymž bu po wšěm zdaću technisce to a tamne změnjene. Jako chcychu wodźerja zadźeržeć, spyta so tutón policistam wuwinyć a jědźeše spěšnišo hač dowolene po Kulowskej dróze. Skónčnje pak jeho zastojnicy tola dosahnychu a zwěsćichu, zo bě 21lětny swój moped wjacore razy přetwarił. Nimo toho młody muž scyła žanu jězbnu dowolnosć njeměješe, dokelž běchu ju jemu hižo sćazali.
Kamjenje pokradnyć chcyli
Nowa Łuka. Z hałzami zawodźěte kamjentne platy w hódnoće 500 eurow je wobydler pjatk w Nowej Łuce namakał. Po wšěm zdaću běchu njeznaći w nocy do toho platy z bliskeho twaršćiznoweho składa wzali, zo bychu je pozdźišo wottransportowali.
Policija (14.10.22)
Hóršemu zadźěwać móhli
Budyšin. Takrjec zbožo w njezbožu měješe minjenu wutoru žona w Budyšinje, kotraž by so bjezmała z woporom wobšudnikow stała. Wokoło připołdnja dósta 64lětna powěsć přez whatsapp na swoje šmóratko. W powěsći prošeše pozdatny syn wo to, zo měła mać jemu 3 000 eurow dla někajkeje nuzoweje situacije přepokazać. Tule próstwu Budyšanka spjelni. Jako sej wobšudnik na to dalše pjenjezy žadaše, bě to žonje podhladne a wona wobroći so na sobudźěłaćerjow swojeje banki. Woni wobšudnistwo hnydom spóznachu a móžachu přepokazanku žony cofnyć. Tuž Budyšance žanažkuli škoda njenasta a wona móžeše změrowana domoj hić. Kriminalisća Budyskeho policajskeho rewěra tónle pad wobšudnistwa dale přepytuja.
Policija (13.10.22)
Kolesowar ćežko znjezbožił
Budyšin. Při wobchadnym njezbožu je so wčera rano 37lětny muž w Budyšinje strašnje zranił. Před dwórnišćom chcyše wón z Tuchorskeje na Jordanowu nalěwo wotbočić. W tym wokomiku přijědźe wotlěwa 43lětny wodźer motorskeho a do kolesowarja zrazy. Tón so ćežko zrani, tak zo dowjezechu jeho k dalšemu zastaranju do chorownje. Wěcna škoda wučinja něhdźe 250 eurow.
Policija (12.10.22)
Při telefonje wobšudźili
Budyšin. 73lětneho Budyšana su njeznaći předwčerawšim wobšudźili a jemu štyricyfrowu sumu pjenjez wulišćili. Cuzy muž so přez whatsapp pola škodowaneho přizjewi a so jako jeho syn wudawaše. Jemu so poradźi rentnarjej napowědać, zo je w nuzowym połoženju. Dobroćiwy Budyšan přepokaza na to nimale 4 000 eurow, zo by pozdatnemu synej pomhał. Jako sej wobšudnik na to dalše pjenjezy žadaše, bě to 73lětnemu podhladne a wón informowaše policiju.
