Njezbožo z kolesom
Kulow. Srjedu nawječor je 43lětna při Budyskej w Kulowje parkowała. Jako durje swojeho awta wotewrě, bližeše so kolesowarka. 14lětna pódla awta padny a so ćežko zrani. Wěcna škoda žana njenasta. Dotal njeje jasne, hač je so kolesowarka scyła durjow dótkała. Swědkojo, kotřiž su podawk wobkedźbowali, njech zazwonja na słužbu za wobchadne njezboža policije pod telefoniskim čisłom 03591 3670.
Paduchow lepili
Wětrow. Policija je dweju muži lepiła, jako na ležownosći we Wětrowje wšelake wěcy z bróžnje nošo do swojeho awta składowaštaj. Wobsedźer běše to widźał a zastojnikow informował. Tući lepichu Čechow, 53lětneho šofera a 47lětneho sobujěduceho w Bělšecach a jeju zajachu.
Pytaja swědkow
Kamjenc. Njeznaći su minjeny kónc tydźenja na ležownosći pěstowarnje na Christiana Weißmantelowej zachadźeli. Skućićeljo su zaměrnje z kastanijemi mjetajo wokno wobškodźili a info-tafli skóncowali. Wěcna škoda wučinja 500 eurow. Po informacijach potrjechenych njeje to prěni króć. Policija pyta tuž za swědkami. Tući njech zazwonja na Kamjensku policiju pod telefonowym čisłom 03578 3520.
Bobry njezbožo zawinowali
Mohorn/Běła Woda. Zhorjelski policiski zarjad zdźěli, zo su minjeny kónc tydźenja bobry wobchadne njezbožo zawinowali. Sobotu nawječor běše žona zdźěliła, zo leži mjez Mohornom a Porchowom zdónk štoma na awtodróze A 4 a zo saha hač na prawu jězdnju. Krótko po tym přizjewi so žona w Běłej Wodźe pola policije a zdźěli, zo je jej štom na awto padnył. Policisća zawěsćichu slědy. Po dopóznaćach zastojnikow su bobry winicy: woni su štomy takrjec podrězali a dalše štomy we wokolinje nahrymzali. We woběmaj padomaj njebu nichtó zranjeny. Wěcna škoda wučinja dohromady 2 400 eurow.
Ćežko zranjenaj při zražce
Mučow. Něhdźe 200 metrow před wjesnej taflu Mučowa na B96 do směra na Wojerec je 33lětny šofer wosoboweho awta w křiwicy na napřećiwny bok jězdneje zjěł. Tam prasny wón do małotransportera. Šofer awta a w nim sedźace štyrilětne dźěćo buštaj ćežko zranjenaj, 68lětny šofer transportera snadnje.
Njerjany žort
Wojerecy. Na Brězowym puću we Wojerecach bědźa so wobydlerjo ze sćěhami Halloweena. Njeznaći běchu na fasady wjacorych wjaceswójbnych domow jeja mjetali a powostanki njehodźa so lochce wotstronić. Wěcna škoda njeje znata.
Show bjez dowolnosće
Budyšin. Zastojnicy policije su wčera njedaloko Budyšina, při awtodróze A 4 jězdźidło zadźerželi, dokelž běchu swěcy jěducych slepili. 39lětny Bołharčan měješe wšelake srědki k wobswětlenju, kotrež so w krajach bliskeho wuchoda wužiwaja, zatwarjene. Šofer dyrbješe swěcy na městnje wutwarić a ma pjenježnu pokutu płaćić.
Z drogami po puću była
Budestecy. Minjenu nóc je 45lětna Čechowka w swojim awće marki VW w Budestecach po puću była. Jako ju zastojnicy policije na Hornjołužiskej dróze zadźeržachu, zwěsćichu z pomocu testa, zo bě drogi brała.
Wandalojo po puću byli
Niska. W nocy na pjatk su w Niskej wandalojo na wjacorych dróhach, kaž na Mužakowskej, Budyskej a Rothenburgskej, zachadźeli. Policiji je cyłkownje 21 wozjewjenjow wo móranjach dóšło. Wěcna škoda wučinja po prěnich trochowanjach něhdźe 18 850 eurow. Potrjechene su mjez druhim radnica, krajnoradny zarjad, nakupowanske wiki, mnohe jězdźidła, bydlenske domy a murje kaž tež wobchadne znamjenja. Skućićeljo wužiwachu čornu, čerwjenu kaž tež žołtu barbu a zawostajichu zdźěla přećiwo wustawje so měrjace symbole abo napisy. Decernat statny škit so z padami zaběra.
Wuchowar žiwjenja počesćeny
Wojerecy. Zastojnicy policije a wohnjoweje wobory su srjedu 13lětneho hólčeca jako wuchowarja žiwjenja počesćili. Finn Elias běše 23. septembra wobkedźbował, kak z bydlenja na Starej Berlinskej we Wojerecach kur z wokna stupa a informowaše hnydom wohnjowu woboru. Jako wobornicy zhromadnje z policiju bydlenje wočinichu zwěsćichu, zo běše 74lětny muž wobjed na kachlach přismudźić dał. Jeho dyrbjachu z podhladom zajědojćenja kura dla do chorownje dowjezć. Finn Elias přija dobropis a dósta wjedźenje po policajskim rewěrje.
Awto pokradnjene a namakane
Budyšin. Paduši su so na Leibnitzowej w Budyšinje w nocy na njedźelu do wosoboweho awta typa Hyundaj zadobyli a z nim wotjěli. Wobsedźer móžeše pozdźišo swoje jězdźidło z pomocu techniki na parkowanišću při Schliebenowej zwěsćić. Tam steješe wone njezamknjene a njewobškodźene.