Koło serbskich spisowaćelow (KSS) Zwjazka serbskich wuměłcow je wčera čłonow ZSW do Budyskeho hosćenca „Zum Echten“ přeprosyło. Tema bě lětsa planowany 39. mjezynarodny swjedźeń poezije, kotryž wupadnje.
Budyšin (SN/CoR). „Ženje do toho njejsym tajku krizu Zwjazka serbskich wuměłcow dožiwił kaž nětko. Wutroba mje boli, hdyž wo tym rozmysluju, zo Swjedźeń serbskeje poezije wupadnje a zo je mjezynarodne připóznaće a wšo to, štož smy sej jako niwow w zhromadnym dźěle z wukrajnymi spisowaćelemi natwarili, wohrožene“, rjekny wčera spisowaćel a basnik Beno Budar.