Dyrdomdej w swěće powěsćow
Hórnikecy. Na wječor ze zmijemi, lutkami a fantastiskimi swětami přeproša Hórnikečanska energijowa fabrika jutře, 29. julija, wot 17 hodź. We swójbnej atmosferje a před bajkojtej kulisu předstajitaj Beate Tarrach a Reinhard Simmgen we 18 a 20 hodź. swójbne lěćne dźiwadło „Powěsćowy pokład wuhloweho zmija“. Swoju kreatiwnu žiłku wužiwać móža młódši a starši zajimcy při paslenju, hudźenju, šminkowanju a wuhódanju hódančka błudničkow. Wjeršk a zdobom kónc wječora budźe w 22 hodź. wohnjowa show.
Koncert Rieuja w kinje dožiwić
Budyšin. Swětoznaty koncert wiolinista a entertainera Andréja Rieuja w Maastrichće móža zajimcy njedźelu, 30. julija, w 16.30 hodź. w Budyskim filmowym palasće dožiwić. Lětuša wosebitostka je 30. róčnica załoženja Johanna Straussoweho orchestra, najwjetšeho priwatneho orchestra swěta. Prěni raz wusyłaja koncert před romantiskej, srjedźowěkowskej kulisu tež w němskej rěči. Zajimawe dohlady dožiwja wopytowarjo kina po koncerće w ekskluziwnym interviewje z wuměłcom popularneje klasiskeje hudźby Andréjom Rieujom.