Berlin (dpa/K/SN). Němscy dźěłodawarjo kritizuja namjety kandidata SPD na kanclerstwo Martina Schulza, dźěłowe wiki nastupace. „Z nich njedźiwaja mnohe dokładnje dosć na ličby abo prawniske połoženje w Němskej“, rěka w posudku Zwjazkoweje unije zjednoćenstwow němskich dźěłodawarjow (BDA). Ta warnuje před tym, bjezdźěłnostny pjenjez dlěje płaćić. To by spěšne zarjadowanje do dźěła poćežiło. Nimo toho mjenuje Schulz „přewulke ličby“ nachwilnje dźěłacych. W starobnej skupinje 25 do 35 lět dźěła we woprawdźitosći jenož dobre dwanaće procentow po nachwilnym dźěłowym zrěčenju. Schulz bě w interviewje z nowinu Bild wo přibližnje 40 procentach rěčał. Kanclerski kandidat SPD bě spočatk tydźenja připowědźił, zo poćehnje do wólbneho boja z přilubjenjom, změnić Agendu 2010.
Berlin (dpa/SN). Zwjazkowy nutřkowny minister Thomas de Maizière (CDU) kritizuje wjacore zwjazkowe kraje, w kotrychž bě čerwjeno-zelene knježerstwo wotsunjenje požadarjow azyla do Afghanistana nachwilnje zakazało. „To mje wosebje mjerza, dokelž běchmy sej hakle před dnjemi w tymle prašeju přezjedni“, rjekny de Maizière wčera wječor w telewiziji ARD. Wjacore kraje, mjez nimi Schleswigsko-Holsteinska a Durinska, běchu připowědźili, zo njejasneho wěstotneho połoženja w Afghanistanje dla žanych wotpokazanych požadarjow azyla tam wróćo njepósćelu. De Maizière porno tomu twjerdźi, zo su wotsunjenja „w małym wobłuku“ do Afghanistana zastupujomne. To płaći předewšěm za sewjer kraja. „Tež w Kabulu njemóžeš rjec, zo je cyłkowne połoženje tak njewěste, zo njemóžeš ludźi tam pósłać.“
Pomocne organizacije z toho wuchadźeja, zo Němska jutře dalšu skupinu ćěkancow do Afghanistana wotsunje.
Waršawa (dpa/SN). Pólska wostanje w zwadźe z komisiju Europskeje unije wo njewotwisnosći swojeho wustawoweho sudnistwa njepowalna. Njeje žaneje přičiny twjerdźić, zo je prawostatnosć w kraju wohrožena, wonkowne ministerstwo we Waršawje wčera zdźěli. Z wida Pólskeje je problem z wuzwolenjom noweje předsydki sudnistwa a ze wšelakimi změnami justicneje reformy w decembru rozrisany. Demokratiski porjad zachować je Pólskej najwažniši zaměr, so narodnokonserwatiwne knježerstwo wumjetowanjam z Brüssela wobara. Komisija EU nochcyše wuprajenja z Waršawy na naprašowanje powěsćernje dpa najprjedy raz komentować.
Choćebuz (SN). Na delnjołužiskich dwórnišćach w Radušu, Gołkojcach a Kósobuzu (Kunersdorf) móhli bórze zaso ćahi zastawać. Tole předwidźi we Wětošowje předstajeny wobchadny koncept, nastaty w nadawku města Wětošowa a gmejny Gołkojce. Tak měła so wobstejaca najdlěša ekspresowa železniska čara Braniborskeje do dweju linijow rozrjadować. Jedna dyrbjała wjesć z Choćebuza k coowej w Berlinje a druha z Wismara na Berlinske wuchodne dwórnišćo. Tak bychu ćahi wjace ludźi transportować móhli a bychu nimo toho dypkowniše byli, štož by zastaće na mjenowanych dwórnišćach dowoliło. W Radušu, Gołkojcach a Kósobuzu hižo wot lěta 2015 žane ćahi wjace njezastawaja. Šmórnjenje zwiskow běchu z tym wopodstatnili, zo chcedźa zapozdźenjam ćahow zadźěwać.
Z nowej studiju zaběraja so nětko w ministerstwje za wobchadnu infrastrukturu. Hač so wobšěrny planowanski proces ze wšitkimi wobdźělenymi gmejnami, ministerstwami a nošerjemi zajimow zahaji, njeje hišće jasne.
Choćebuz (dpa/SN). Regionalny ligist Energija Choćebuz wojuje dale přećiwo financnej katastrofje. Jeno z wulkomyslnym priwatnym pjenježnym darom „w šěsćcyfrowym wobłuku“ su sej za tele lěto eksistencu zawěsćili, přiznawa prezident Michael Wahlich w rozmołwje na internetnej stronje koparskeho kluba. Jemu bě so poradźiło „dobreho přećela swójby“ pohnuć, hódnotne papjery Energije kupić. Swójski kapital towarstwa bě hižo kónc lěta 2015 přetrjebany, Wahlich praji. Loni mějachu deficit w šěsćcyfrowym wobłuku, kotryž je nětko wurunany. Po třoch zestupach do mjeztym štwórteje ligi je „lukratiwne žórło telewizijnych pjenjez wusaknyło“. W zwjazkowej lize dósta FC Energija kóžde lěto hač do 17 milionow eurow wot telewizijnych sćelakow. W třećej lize bě to hišće 800 000 eurow. Aktualnje je klub „nulu“ docpěł.
Pytajo za nowymi móžnosćemi dochodow nadźija so prezident „koparskemu klubej přichilenych ludźi a institucijow“. Postup do přichodneje ligi w lěću by połoženje widźomnje polěpšił.
K aktualnym podawkam w kopańcy piše Heinz Noack z Wulkeje Dubrawy:
Lětdźesatki běchmy we wuchodnej Sakskej wot zapadoněmskeje kopańcy wuzamknjeni. Zo móhli najwažniše hry widźeć, stajichmy swoje anteny do směra na Čěsku, bjerjechmy zwuk z radijoweho sćelaka Rias a běchmy z přewšo špatnym wobrazom spokojom. Nětko móžemy kopańcu zwjazkoweje ligi wšědnje sćěhować, byrnjez z dołhimi wabjenskimi přestawkami.
Bjezdwěla su Mnichowscy Bayerojo wusahowace mustwo, kotrež ma prosće tež wjele zboža. Nimo toho su woni lubušcy sudnikow. To pak mje tež na čas NDR dopomina, jako stawaše so mustwo ministra za statnu wěstotu BFC lěto wot lěta mišter, mjezynarodnje pak bě spěšnje na kóncu. Minjeny kónc tydźenja čujach so kaž woneho 22. měrca 1986. Tehdy přizwolichu BFC w hrě přećiwo Lok Lipskej w přidatnym hrajnym času „jědnatku hańby“, kotraž wjedźeše k njesprawnemu wurunanju 1:1.
Zwěrjency w Drježdźanach, Zhorjelcu a we Wojerecach su so z čěskimi partnerskimi coologiskimi zahrodami w Děčínje, Chomutovje a Ústíju nad Labem na zhromadny projekt dojednali.
Wojerecy (SN/mwe). Pod hesłom „Partnerske zhromadne dźěło šěsć zwěrjencow we wobłuku organizowanja, kubłanja, přirodo- a družinoškita“ chcedźa so jednotliwe zwěrjency přichodnje internetnje zwjazać a sylnišo na so skedźbnjeć. Za to su loni nazymu kooperaciske zrěčenje podpisali.
W srjedźišću spěchowanskeho programa steji wuwiće zhromadneje app, kotraž předstaja družinoškitne projekty a wohrožene družiny w kóždym zwěrjencu. Čěsko-, němsko- a jendźelskorěčnje móža so tuž tež wukrajni wopytowarjo hišće lěpje w němskich a čěskich zwěrjencach orientować. We Wojerecach pak maja so přez spěchowanski projekt tablety za modernišu coologisku šulu kaž tež za nowe infoměstnosće wobstarać. Přez webcam dóstanu wopytowarjo cyle nowe dohlady do zwěrjećich rewěrow, a to we wšitkich šěsć mjenowanych zwěrjencach.