Aus der aktuellen Ausgabe vom Dienstag, 21 Februar 2017

Jewišćo na Kamjenskej Pastwinej horje tež lětsa derje wućežene

Kamjenc (SN/mwe). Město Kamjenc je minjene lěta něhdźe milion eurow inwestowało, zo móhli koncerty na jewišću pod hołym njebjom na znatej Pastwinej horje dale na wysokim niwowje přewjedować a zo by areal tež wěstotnemu standardej wotpowědował. Inwestowali su za to předewšěm we wopytowarskim wobłuku. Tež při natwarje jewišća je so tójšto činiło. Polěpšenja cateringowych městnosćow dla je gastronomiske zastaranje nětko aktraktiwniše. Tučasnje koncipuja změny za wopytowarjow za jewišćom a w backstage-wobłuku. To ma so do srjedźodobneho financneho planowanja města zapřijeć.

Kubłanske dny młodźiny

Worklecy. Wot pjatka, 17., do njedźele, 19. měrca, wotměja so kubłanske dny serbskeje młodźiny w Schmiedebergu. Dorosćacym skića tam Božu mšu, duchowne impulsy, film a kreatiwitu kaž tež zabawu a spěw. Přizjewjenja su hač do jutřišeho, 22. februara, móžne z mejlku na don.boskowy-dom@t-online abo pod www.facebook.com/DekanatneDusepastyrstwo. Přinošk zliči so wotpowědnje zasłužbje młodostneho.

Třo zranjeni při zražce

Horni Wujězd. Dźensa něhdźe w 6.50 hodź. dóńdźe na statnej dróze S 101 pola Hornjeho Wujězda k ćežkemu wobchadnemu njezbožu. Jako chcyše młoda wodźerka VWja Polo nalěwo na awtodróhu wotbočić, přewidźa wona napřećo přijěducy VW Caddy a zrazy frontalnje do njeho. Wotmach bě tak wulki, zo so wobě awće z jězdnje sunyštej. Zawinowarku njezboža, kotraž so ćežko zrani, dyrbjachu ju do kliniki dowjezć. Tež šofera a sobujěduceho tamneho awta zapokazachu do chorownje.

Darjensku boksu wurumowali

Budyšin. Zawčerawšim, njedźelu, su njeznaći w Budyskim wopomnišću na Weigangowej z darjenskeje boksy tójšto pjenjez pokradnyli. Kelko, to dotal znate njeje. Wěcna škoda wučinja něhdźe 20 eurow.

Njewědomje matracu zapalił

Kamjenc. 37lětny je wčera w pincy domu na Kamjenskej Wilhelma Külzowej njewědomje matracu zamiškrił. Zo by wjace widźał, zapali wón při rjedźenju kolesa zapalak. Při tym powali blešu z rjedźenskim srědkom. Tón so na to zapali a płomjenja přeskočichu na matracu.

Budyšin (SN/mwe). Dowolnosć, „problemoweho wjelka“ Pumpaka třělić, je njedźelu wotběžała. Kaž zamołwići Zhorjelskeho krajnoradneho zarjada wčera žurnalistam zdźělichu, njestaja w sakskim wobswětowym ministerstwje najprjedy žanu próstwu wo nowu dowolnosć problemoweho wjelka zatřelić směć. Wšako Pumpaka w Rěčičanskej wokolinje hižo tydźenje dołho widźeli njejsu. Čehodla, to dotal jasne njeje.

Znaty serbski skótny lěkar a nazhonity hajnik dr. Pětr Brězan z delnich Sulšec praji: „Wo žanym zwěrjeću so tak njełži kaž wo wjelku. Štó je Pumpaka naraz ze swěta wzał, wostanje potajnstwo.“

Łaz (AK/SN). We Łazowskej gmejnje maja tuchwilu jědnaće wjesnych a pjeć młodźinskich wohnjowych woborow. Loni wołachu kameradow z Běłeho Chołmca, Bjedrichec, Hermanec, Šćeńcy a Koblic k cyłkownje 44 zasadźenjam. Kaž hižo tamne lěta je wočiwidne, zo steji z 61 procentami techniska pomoc w srjedźišću zasadźenjow, ze statistiki gmejny wuchadźa. Štwórćina zasadźenjow běchu wohenje. Trójce wobdźělichu so wšitcy aktiwni kameradojo loni na zhromadnych zwučowanjach.

Přihotuja wubědźowanje BEAT

Budyšin (SN). 20. raz wotměje so lětsa 8. apryla w Budyskim Kamjentnym domje wubědźowanje kapałow BEAT. Kaž kóžde lěto su tež serbske skupiny namołwjene so na nim wobdźělić. Přizjewić móža so hač do 24. měrca. Nadrobnje informować móža so solisća a spěwytwórcy na internetnej stronje sociokulturneho domu.

Błóta tež w zymje atraktiwne

Na Hamorskim přibrjohu Bjerwałd­skeho jězora ma dołhodobnje hotel nastać. Tomu přihłosowała je Hamorska gmejnska rada na swojej njedawnej zjawnej zhromadźiznje.

Hamor (AK/SN). Na posedźenju wobzamknychu radźićeljo druhu změnu wobtwarjenskeho plana. Třo hłosowachu z „ně“, jedyn so hłosa wzda. Nadawkidawar za hotel je Hamorska gmejna. Nošer předewzaća je firma Hotel a dožiwjenski park Hornja Łužica. Wona lětsa tež zakuskowe zastaranje na Hamorskim přibrjohu přewozmje.

Po tym zo bě Toni Barnickel (prědku naprawo) za Budissu Budyšin w testowej hrě přećiwo Biskopičanskemu KT 08 na kopanišćo přišoł, bu hra Budissy trochu žiwiša. Tež Barnickelej pak so rozsudna změna njeporadźi. Regionalny ligist podleža wyšemu ligistej 1:5. Za Budyšanom widźimy Franka Zillu a nalěwo Erica Bachmanna (wobaj Biskopičanske KT). Foto: Torsten Zettl

Wokrjesny wyši koparski ligist Póst Germania Budyšin ma noweho šeftrenarja. Hłowny zamołwity nazwučowar je tam nětko Jiří Krohmer, kiž je dotal koparjow U 23 Budissy Budyšin trenował. 38lětny Krohmer je jako bywši kopar dwanaće hrow w europskim pokalnym kole wotměł, a to za Sigma Olomouc w Čěskej a za FK Ventspils w Letiskej. Wón wobsedźi trenarsku licencu B. Za Serbske Nowiny je z nim Hanspeter Benad porěčał.

Wot hdy sće za prěnje mustwo Pósta Germanije Budyšin zamołwity?

J. Krohmer: Thomas Laue je mje njedawno zazwonił a so prašał, hač móžu sej předstajić zamołwitosć za mustwo přewzać. Dokelž sym před lětami hižo młodźinu A Pósta trenował, njejsym dołho přemyslował a sym připrajił.

Kak dołho maće zrěčenje?

J. Krohmer: Wone traje najprjedy jónu hač do kónca sezony 2016/2017.

Kotre cile maće za druhu połseriju?

J. Krohmer: Chcu z porjadnym treningom wukony wšitkich hrajerjow polěpšić a tak zdobom wukon mustwa. To pak trjeba swój čas. Snano poradźi so nam potom wjace přihladowarjow do koparskeho stadiona dóstać.

Maće kotrenarja abo staraće so sam?

Słowa trenarja regionalneho koparskeho ligista FC Energije (FCE) Choćebuz Clausa-Dietera Wollitza wuskutkuja wulke diskusije – nic pak na čole Němskeho koparskeho zwjazka (DFB), skerje na bazy.

Wučer za kopańcu je zamołwitych DFB zjawnje atakował a swojich kolegow-trenarjow namołwjał, přećiwo njedostatkam w štwórtej koparskej lize Němskeje z warnowanskim stawkom postupować. „Jenož, hdyž po tymle puću swój hłós pozběhnjemy, budu knježa tam horjeka snano wo tym rozmyslować, što so tu deleka poprawom stawa“, so 51lětny Wollitz rozhorja.

Wo čo dźe? Wollitz nochce so z tym wotnamakać, zo dyrbi staflowy dobyćer po dołhej sezonje w štwórtej lize, hišće dwaj direktnej duelej wo postup do třećeje ligi wuhrać. Wšěm prěnim a tež druhemu w stafli-juhozapad ma so direktny postup zmóžnić, tak rěka warianta šeftrenarja FCE. „Tale liga so z relegaciskimaj hromaj prosće podrywa. Tučasnje so naša liga z praktikowanymi regularijemi niči. To pak zamołwitych w DFB njezajimuje!“

Krajna koparska liga

Eilenburg – Kamjenc1:0 (0:0)

Pirna-Copitz – Wocl Riesa 2:3 (2:1)

1. Eilenburg 15 40  :  10 39

2. Grimma 15 35  :  15 36

3. Kamjenc 15 34  :  14 32

4. Wocl Riesa 15 33  :  27 28

5. Hohenstein-Ernstthal 14 33  :  21 23

6. Pirna-Copitz 14 27  :  21 23

7. Markkleeberg 13 25  :  28 17

8. Niska 15 20  :  24 16

9. Glauchau 14 25  :  30 14

10. Reichenbach 14 13  :  21 13

11. Lößnitz 14 12  :  25 13

12. Rapid Kamjenica 14 26  :  26 12