Aus der aktuellen Ausgabe vom Montag, 27 März 2017

Baršć/Brożek (dpa/SN). Wjacore hodźiny warnowachu zarjady wčera wobydlerjow regiona wokoło Baršća, durje a wokna sylneho kura dla njewočinić. Najnowše přepytowanje pak je nětko wunjesło, zo strowota hižo wohrožena njeje, zdźěli rěčnik braniborskeho nutřkowneho ministerstwa Ingo Decker. Tuž su warno­wanje najprjedy raz zbě­hnyli. Přiwšěm chcedźa powětrowe hódnoty dale wobkedźbować. Woheń na deponiji blisko pólskeje wsy Brożek zarjady w susodnym kraju kaž tež w Němskej hižo dlěje zaběra. 25 000 tonow kumštneho materiala so tam přez tydźenje žehli. Wot minjeneho tydźenja woheń nětko z pjeršću pokrywaja, zo bychu šćipaty smjerd a njelubozny kur doskónčnje podusyli.

Dawid Statnik nawjeduje tež přichodne štyri lěta Domowinu. To mam za jednu z dobrych powěsćow sobotneje hłowneje a wólbneje zhromadźizny we Wojerecach. Dalši pozitiwum je, zo njeje so Domowina wotmjezowała, ale pokazała, zo je jej, kaž sama stajnje potwjerdźa, dialog wažny. Tak mějachu tež iniciatiwnicy składnosć so wuprajić. Njedobry signal pak je, zo přednjese mysle iniciatiwy „němsce rěčacy Serb“, kaž Měrćin Krawc sam wo sebi praji. Mnozy so prašachu, što je poprawom słowo­ „serbski“ w zapřijeću Serbski sejm hódne, hdyž tola swoje mysle hižo nětkole němsce předstajeja. Prašenje dale steji. Wšako błyšćachu so iniciatorojo sejmi­koweje mysle z njepřitomnosću. Najlěpša powěsć­ z Wojerec pak za mnje je, kak derje dźěći zakładneje šule „Handrij Zejler“ serbšćinu wobknježa! Bě wulkotne jich program sćěhować. Wulka chwalba přede­wšěm jich wučerkam! Janek Wowčer

Mjenje milinarnjoweho wukona, mjenje wuhla. A mjenje wučomnikow?

Choćebuz (JoS/SN). Njewěstosć w Slepjanskej wosadźe kaž tež we wokolinje Wjelceje nastupajo wuwiće brunicoweju jamow Wochozy II a Wjelcej II dale traje. „Politiske a wičnohospodarske wuměnjenja kóždežkuli planowanje poćežuja“, rjekny personalny předstejićel LEAG dr. Michael von Bronk minjenu wutoru w swojej narěči składnostnje wuwjazanja 136 wučomnikow předewzaća w Choćebuzu. Połoženje, wot politiki zawinjene, twori njestabilitu. Rozsudne prašenje za LEAG je, kotre inwesticije ma zwoprawdźić. W tymle zmysle rozsudźi skónčnje politika w Němskej ze swojej poziciju k wudobywanju, zlěpšowanju a zmilinjenju brunicy wo přichodźe předewzaća. Dr. von Bronk zawěsći, zo nowy mějićel łužiskeje brunicy kruće k tomu steji, brunicu a milinarnje dale wuwiwać. „Tak widźane móžemy na wěsty přichod našeho předewzaća hladać. Pola Vattenfalla njeby to hižo zaručene było.“

Podstupim (dpa/K/SN). Po 23 lětach pokućenja­ w forensiskej psychiatriji (Maßregelvollzug) přepołoža zasudźeneho mordarja a seksualneho njedočinka Franka Schmökela w aprylu do Dubinskeho (wokrjes Dubja-Błóta) regularneho jastwa. To je braniborske wyše sudnistwo postajiło. Wón poćahowaše so při tym na posudk, wuswědčacy mordarjej „narcistisku a disocialnu psychozu“, kotrejež přeměna njeje wočakować.

Schmökel bu hižo 1994 zasudźeny. Lěta­ 2000 bě na wuchodźowance swojeho hladarja zranił a nazajtra rentnarja morił.­ Wot 2002 je wón mordarstwa dla zasudźeny.­ Zasudźeny je na čas žiwjenja ze sćěhowacej­ wěstotnej jatbu.

Domowina spožči nestorej projekta Witaj Janej Bartej čestne čłonstwo

Wojerecy (SN/JaW/at). Dawid Statnik wostanje předsyda Domowiny. 156 del­egatow je jemu na sobotnej 18. hłow­nej a wólbnej zhromadźiznje třěšneho zwjazka serbskich župow a towarstwow znowa dowěru wuprajiło. To je 92,86 procentow płaćiwych hłosow. We wulkej přezjednosći schwali hłowna zhromadźizna rezoluciju nastupajo naćisk za wobnowjenje serbskeho šulskeho postajenja w Braniborskej a zo spočža iniciatorej projekta Witaj Janej Bartej čestne čłonstwo Domowiny.

„Załoženje Domowiny we Wojerecach je so do stawiznow města hłuboko zakótwiło“, rjekny Dawid Statnik w swojich witanskich słowach. 174 delegatow ze sobustawskich župow a towarstwow bě so na žurli Wuchodoněmskeje lutowarnje na Hrodowej zešło, jeno sep kročelow wot dozałoženskeho domu Domowiny zdaleneje.

Po štyrjoch dnjach wčera zakónčene Lipšćanske knižne wiki su z 285 000 znowa wjace wopytowarjow přiwabili. Loni bě jich 260 000. Na terenje wikow zličichu lětsa 208 000 hosći, zbytk je literarny swjedźeń „Lipsk čita“ přinošował.

Lipsk (SN/CoR). Tež bilanca Ludoweho nakładnistwa Domowina je pozitiwna. „Ludźo su so zajimowali, a smy tež knihi předawali. Wosebje požadane běchu nowostka wo reformaciji a zwjazkaj z historiskimi fotografijemi kaž tež znowa wuhotowany 5. nakład knihi ‚Kurze Geschichte der Sorben‘“, rozprawja wotrjadnica rozšěrjenja LND Manja Bujnowska.

Na předstajenju knihi „Sorben im Blick der Staatssicherheit“ dr. Tima Meškanka pjatk witaše zajimcow Tobias Hollitzer z Lipšćanskeho wobydlerskeho komiteja. W rozmołwje z awtorom je sakski krajny społnomócnjeny za podłožki stasi bywšeje NDR Lutz Rathenow wosebitu situaciju Serbow mjez statnym spěchowanjom na jednej a sylnym wobkedźbowanjom wšitkich kulturnych aktiwitow na tamnej stronje wobswětlić spytał.

Viktoria Worklecy

– VC Olympia Drježdźany 2:3

(25:20, 24:26, 25:17, 21:25, 14:16)

Za znowawotewrjenje Worklečanskeje sportownje a k 25lětnemu wobstaću towarstwa Viktoria Worklecy su sej zamołwići wosebje zajimawy volleyballowy team přeprosyli. 15- do 19lětne holcy VC Olympije Drježdźany su rezerwa zwjazkoweho ligista Drježdźanski SC a hraja w druhej zwjazkowej lize. Někotre z młodych volleyballistkow přisłušeja němskim wubrankam, a libera Michelle Petter­ agěruje pola zwjazkoweho ligista VfB Suhl. Petter je sobotu we Workle­cach wupomhała, dokelž běchu štyri hrajerki hosći na dalekubłanju narodneho mustwa.

Awtor dźensa

Toni Ryćer

Byrnjež w někotrych serijach hižo dlěje rezultaty předleželi, započa so wčera z prěnimaj běhomaj formule 1 w awstralskim Melbournu a MotoGP w katarskim Doha za mnohich entuziastow woprawdźita sezona w motorowym sporće. To stej tak mjenowanej kralowskej motorsportowej disciplinje. Poprawom planowachu protagonisća a nowi wobsedźerjo zwičnjenskich prawow formule 1, seriju z někotrymi změnami techniskeho razu přihladowarjam atraktiwnišo prezentować. Po prěnim běhu trochuju, zo nas tež lětsa wulke překwapjenja njewočakuja. Mercedes je stary a nowy faworit, byrnjež wčera po dołhim času zaso jónu Ferrari dobył. Wo tym pak nochcu dźensa pisać.

Sokoł Ralbicy/Hórki II

– FSV Łuty 0:2 (0:2)

Zestawa domjacych: Matka – Bogusz, Šwejda, Čórlich, Gerlich, Kobalc, Wowčerk (77. Šěn), Serbin (88. Šołta), Strelow, Jakubaš, Młynk (55. Šnajder)

Dwacety raz pobychu šulerjo Serbskeho gymnazija Budyšin (SGB) w čěskich Janskich Láznjach, zo bychu so tam w sportowej družinje alpinske sněhakowanje wukmanili.

W stawiznach SGB započa so sněhakowarske wukubłanje w februaru 1995 w čěskej Malej Úpje blisko pólskeje hranicy. Do Kyrkonošow dojědźeštej sej te­hdy rjadowni 8a a 9b z wučerjomaj Marku Pěčcynej a Rolfom Leidlerom. Minjeny tydźeń přebywaše nětko 49 šulerjow a šěsć wučerjow w Janskich Láznjach, městačku blisko Čorneje hory. Tež lětsa bě pensija „Protěž“ kwartěr Budyskich gymnaziastow.