Aus der aktuellen Ausgabe vom Dienstag, 18 Juli 2017

Tójšto ludźi je wčera nawječor na Radworske sportnišćo přišło. Tam hudźeše młodźinski dujerski orchester z juhomadźarskeho města Bonyhád. 40 młodych hudźbnikow je na dompuću z mjezynarodneho festiwala młodźinskich orchestrow w Hamburgu a přenocuje w Radworskej wjacezaměrowej hali „Slavia“. W repertoiru maja woni tradicionalnu dujersku hudźbu runje tak kaž moderne wobdźěłanja. Foto: Werner Müller

W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće abo stawizniske zajimawosće zběraja a je zjawnosći spřistupnjeja.

Na zetkanjach chronikarjow, kotrež Domowinska župa „Michał Hórnik“ kóždolětnje organizuje, wobdźěla so nimale stajnje Worklečan dr. Beno Wałda. Jeho namjety a pokiwy su tam přitomnym dobry pućnik za wunošne zběranje a dokumentowanje časowych podawkow.

Hač do nazymy zatwarja w Konječanskej kapałce elektrisku připrawu

Konjecy (aha/SN). Na wčerawšej wobydlerskej zhromadźiznje, na kotruž bě wjesna rada Šunow-Konjecy do Konječanskeho towarstwoweho domu „Delany“ přeprosyła, wobdźěli so wjac hač štyrceći ludźi­. Tale ličba swědči wo wulkim zajimje a wo zhromadnej zamołwitosći, zo by zwón Konječanskeje starodawneje kapałki přichodnje dale zwonił.

Mjeztym 88lětna Hańža Rachelowa bě so wot lěta 1950 swěru wo to starała, zo zwón trójce wob dźeń – rano w šesćich, připołdnju w dwanaćich a wječor w šesćich – zwonješe. Starobnych a strowotnych přičin dla wšak to hižo njemóže.

Hižo loni w nowembru je wjesna rada wo tym rozmyslowała nańć móžnosć, zo by zwón tež dale wobydlerjow ze wšědnosće dnja k pomodlenju pozbudźał. Tak wobhoni so móžneho zatwara elektri­skeje připrawy za zwonjenje dla; a gmejna Ralbicy-Róžant, kotrejž kapałka słuša, staji próstwu wo spěchowanske srědki.

Budyšin (SN/mwe). Idealnej přewodźerjej za šulerjow a wučomnikow, kotřiž žanu měsačnu kartu za bus a ćah nimaja, stej za wuchodnu Saksku superlětni prózdninski tiket kaž tež prózdninski tiket­. Z tajkim lisćikom su młodostni pod 21 lětami hač do 6. awgusta lukratiwnje po puću. To rěka za jeno 64 centow wob dźeń móža woni po cyłej Sakskej a w Srjedźoněmskim wobchadnym zwjazku wšitke ćahi, nadróžne, busy a přewozy runje tak kaž jězby z Mužakowskej lěsnej železnicu knihować. Za wobaj lisćikaj pak trjebaja wužiwarjo kartu kupcow abo šulerski wupokaz, kotrejž njesmětej so dale dać.

Wjace kedźbnosće demency

Jědnaćoch wuchować dyrbjeli

Běła Woda. Z dotal njewujasnjeneje přičiny je wčera wječor w bydlenju na Bertolta Brechtowej w Běłej Wodźe na přizemju woheń wudyrił. Ze štyriposchodoweho domskeho dyrbjachu wuchowanske mocy a wohnjowi wobornicy jědnaće wosobow z pomocu wjerćiteho rybla wuchować. Pjećoch z nich dowjezechu podhlada zajědojćenja kura dla do chorownje. 37lětny wotnajer dospołnje wupaleneho bydlenja njebě doma. Kriminalna policija nětko přičiny wohenja přepytuje. Wobsteji podhlad zapalerstwa.

Bjez papjerow z mopedom jěł

Jitk. Jako chcychu zastojnicy Kamjenskeho policajskeho rewěra w nocy na minjenu sobotu w Ralbicach wodźerja mopeda kontrolować, so tón zawróći a ze sobujěducej do Jitka ćekny. Tam jeju lepiwši policisća zwěsćichu, a zo bě Simson w Běłej Wodźe pokradnjeny, zo njeměješe jeho 37lětny šofer ani jězbnu dowolnosć. Moped zastojnicy nablaku sćazachu.