Waršawa. Bywši pólski statny prezident Bronisław Komorowski je so minjenu njedźelu druhi króć z krajanami rozžohnował – a to z wulkej blamažu. Hišće nalěto běchu ludźo namołwjeni, w referendumje wo reformje wólbneho zakonja a wo změnje skutkowanja financnych zarjadow rozsudźić. Připowědźił bě jón Komorowski w prezidentskim wólbnym boju, zo by sej hłosy ludźi zdobył. Hakle nětko, po wólbnej poražce Komorowskeho, pak ludowe wothłosowanje přewjedźechu. Ale njedźelny wuslědk wostrózbja: Runje 7,8 procentow wólbokmanych so wobdźěli. W něhdźe 40 wólbnych lokalach krajach ani jeničkeho wolerja njewuhladachu. Nawoda wólbneje komisije rěčeše wo „najhóršim wuslědku referendumow w stawiznach kraja“, kotryž płaćeše 20 milionow eurow.
Waršawa. Dosć intensiwnje rozprawjeja pólske a mjeztym tež mjezynarodne medije wo pozdatnej spektakularnej namakance njedaloko delnjošleskeho města Wałbrzycha, wokoło kotrejež so tójšto bajow pleće: „złoty ćah“ z kónca Druheje swětoweje wójny, połny pokładow a drohoćinkow.
Wšitko nastorčił bě před tydźenjomaj pólski prawiznik. W nadawku swojeju mandantow – Polaka a Němca – wón zdźěli, zo staj wobaj wony drohotny ćah namakałoj a zo žadataj sej mzdu dźesać procentow wšeje hódnoty. Šansy na to wšak njejsu ani tak špatne: Hakle w juniju bě pólski parlament nowy zakoń wobzamknył, kotryž tajke dźesaćprocentowske myto předwidźi. Za to pak dyrbjało wěste być, zo je ćah woprawdźe namakany. Pječa je dopokazane, zo bě w meji 1945 ćah z Wrócławja do Wałbrzycha wotjěł, tam pak nihdy njedojěł. Pólske medije wuslědźichu swědkow, kotřiž su ćah hišće na swojej woči widźeli. Fakt tež je, zo bě we Wrócławju za čas němskeje okupacije wulka wotnožka němskeje Reichsbanki. Ju su na kóncu wójny ewakuowali.
Praha (SN). Čěscy lěkarjo wusměrjeja so powołansce dale a bóle na Němsku. Woni wědźa, zo tam lěkarjow pytaja. Wo tym rozprawješe rozhłosowy sćelak Deutsch- landfunk. Jedna z přičin, zo so čěscy lěkarjo za dźěło w Němskej rozsudźeja, je mzda. „Absolwenća w Čěskej zasłužeja jako započatkarjo měsačnje 850 do 900 eurow brutto, bjez słužbow. W Němskej je mzda štyri do pjeć króć wyša“, rjekny dr. Michal Boháč, kiž je před sydom lětami do Němskeje přišoł a skutkuje jako anestezist w Drježdźanach.
W Sakskej dźěła hižo wjac hač 300 čěskich lěkarjow. Ličba je so minjene tři lěta wjac hač potrojiła. Čěscy lěkarjo přichadźeja rady bliskosće k domiznje dla sem. Nimo mzdy wabja jich tež dobre dźěłowe wuměnjenja a wuhotowanje chorownjow. Za dale a bóle zestarjace regiony su čěscy lěkarjo po měnjenju sakskeje lěkarskeje komory žohnowanje. Wosebje w chorowni we Wojerecach, ale tež druhdźe hižo mnozy wukrajni lěkarjo skutkuja. Mjeztym pochadźa nimale kóždy dźesaty medicinar w Sakskej z wukraja.
Serbske pomjenowanje wosmeho měsaca lěta „žnjenc“ so mi jako nastork za moju kolumnu derje hodźi. Hdyž su naši ratarjo pola jednotliwych družin žita poměrnje dobre wunoški měli, da je Słowakska hospodarsce w awgusće zawěrno wurjadny wuslědk nažnjała. Njenadźicy zamó wona indiskeho mějićela britiskeje awtomobilownje Jaguar Land Rover za to zdobyć, swoju nowu fabriku natwarić pola nas a nic w Čěskej, Pólskej abo Madźarskej. Mjeztym štwórta twornja awtow pod Tatrami nastanje pola Nitry, za čož nałoži předewzaće hobersku sumu pjenjez, 1,4 miliardy eurow. 5 000 ludźi změje tam dźěło a budźe počasu lětnje hač do 300 000 luksusowych wozydłow zhotowjeć.
Na polu sporta my tohorunja dospołnje njenadźicy wulki wuspěch žnjeli. Na swětowych mišterstwach w lochkoatletice w Pekingu doby w disciplinje 50 kilometrow chodźenje słowakski reprezentant Matej Tóth złotu medalju. Po lětach njepřitomnosće w medaljowym špihelu je Słowakska w nim tuž derje zastupjena, ze samsnym zaměstnjenjom kaž bratrowska Čěska.
Praha/Nürnberg (dpa/SN). Prěnja zhromadna krajna wustajeńca Bayerskeje a Čěskeje je dale a konkretniša. Zastupjerjo štyrjoch muzejow a slědźerskich zarjadnišćow, kotrež su na njej wobdźělene, podpisachu minjeny tydźeń w Praze kooperaciske zrěčenje, kaž powěsćernja dpa rozprawja. Přehladku, wěnowacu so žiwjenju kejžora Korle IV. składnostnje jeho 700. narodnin, matej na němskej stronje hłownje Nürnbergski Dom bayerskich stawiznow a w Čěskej Praska narodna galerija na starosći.
Korlu IV., kejžora ze splaha Luxemburgčanow a čěskeho krala, chcedźa w mnohich fasetach předstajić. Najwu- znamniša požčonka čěsko-němskeje wustajeńcy budźe originalne napodobnjenje mócnarstwoweje króny z Aachena. Widźeć budu tež dźěle Praskeje tachantskeje pokładownje a wuznamne rukopisy. Pokazać chcedźa přehladku wot meje do septembra 2016 w Praskej Wallensteinskej jěchanskej hali a potom hač do měrca 2017 w Nürnbergskim Germanskim narodnym muzeju.