Powołanske wukubłanje LEAG zajimuje ludźi
Čorna Pumpa (JoS/SN). Na dnju wotewrjeneho wukubłanja bě energijowe předewzaće LEAG do swojeho stejnišća w Čornej Pumpje přeprosyło. Něhdźe 340 wopytowarjow je minjenu sobotu přišło. Zo běše lětuše zarjadowanje dwaj měsacej prjedy hač w minjenych lětach, „ma swoju přičinu. Smy loni dobre nazhonjenja při planowanju wučomnikow měli a to ma tak wostać. Lětsa smy požadansku kampanju hižo w meji zahajili. Dyrbimy spěšni być, zo bychmy předewšěm najlěpšich požadarjow našli“, rjekny Axel Ziller, nawoda wukubłanja hórnistwo a milinarnje. Za přichod trjeba LEAG dobry dorost.
We wukubłanskim lěće 2024 LEAG w dźesać powołanjach wukubłuje. Železnicar w zawodnej słužbje mjez tymi wjace njebudźe. LEAG 78 wukubłanskich městnow sama wobsadźi. Dalše přińdu wot partnerow, tak w Janšojskim wukubłanišću 136 wot Němskeje železnicy za nowu porjedźernju ćahow ICE w Choćebuzu. Dalšej wažnej partneraj su towaršnosć Łužiska woda zwr a Choćebuske zawody za zastaranje z energiju.
Bórze změja wjesny wobchod za žiwidła
W Hamorje su na njedawnym forumje za bliske zastaranje wo idejach a konceptach diskutowali. Zaměr toho běše wjesny wobchod z regionalnymi produktami.
Hamor (AK/SN). Hamorska gmejna pyta intensiwnje za rozrisanjemi bliskeho zastaranja w regionje do přichoda k fairnym płaćiznam. Z tym ma so domizniska produkcija zesylnić. Tole wuzběhowaše wjesnjanosta Hendryk Balko (Wolerske zjednoćenstwo Hamor) póndźelu na forumje za regionalne zastaranje. Tutón měrješe so na zastupjerjow z wikowanja, přemysła, ratarstwa, turizma a dalšich wobłukow. Někak 30 wobdźělnikow přichwata do gmejnskeho domu. Na forumje zaběrachu so woni ze wšelakorymi idejemi, kaž wjesnym wobchodom w Rychwałdźe, měsačnymi reagionalnymi a přirodnymi wikami w gmejnskich dźělach, digitalnym žiwidłowym awtomatom, drustwom přetrjebarjow a lěsnu zahrodu. Přeprosyłoj staj na forum gmejna Hamor a sakska agentura za regionalne zežiwidła AgiL.
Kopor: Prašenja wotewrjene
Koporowe podkopki chce towaršnosć Koporowy šćěpjel zwr (KSL) mjez Grodkom a Slepom blisko Syjka (Graustein) wutworić. Planowane zwoprawdźenje projekta pak ke konfliktam při wuwiću kónčiny wjedźe. Tute wšak njehodźa so z postajenjemi rozrisać.
Grodk/Podstupim (SN/at). Jednanje wo krajinowym rjadowanju za předwidźane koporowe podkopki je wotzamknjene. Wo tym je Zhromadny planowanski wotrjad krajow Berlin-Braniborska předwčerawšim informował. K tomu dóšło je 270 stejišćow. We wuslědku toho wšitko tak chětře njepostupuje, kaž sej to w předewzaću KSL předstajeja. Konflikty wurostu z hibanjow zemje w zwisku z podzemskim wudobywanjom. Problematisce je, kak so wotpohladane zawjedźenje z chloridom a sulfatom poćeženeje jamoweje wody do Sprjewje na wokolinu wuskutkuje. Wotewrjene su prašenja nastupajo zaručenje pitneje wody a wužitneje wody. Starosće wubudźeja dale wuskutkowanja a wotewrjene prašenja nastupajo wotpohladane składowanje powostankow předźěłaneje kamjenizny.
Pola LEAG 2 500 ludźi stawkowało
Wjelk dale wužadanje za wokrjes
Budyšin (SN/BŠe). Žane druhe zwěrjo, kotrež je w Němskej zadomjene, telko diskusijow njewuwabja kaž wjelk. „Wjelk polarizuje“, je jasne wuprajenje referenta za škit družinow sakskeho statneho ministerstwa za energiju, škit klimy, wobswět a ratarstwo Bernda Dankerta. Wón bě zawčerawšim hósć techniskeho wuběrka Budyskeho wokrjesa. W minjenych 16 lětach je so wón intensiwnje z rubježnym zwěrjećom w Sakskej zaběrał. Přitomnym wuběrka rozkładowaše wón postupowanje wjelčeho managementa a kak so genetiske proby nańdu a přepytuja. Wot lěta 2010 do 2022 su fachowcy po cyłej Sakskej cyłkownje 4 652 probow wuhódnoćili. Dokładnje 1 779 z nich je z Budyskeho wokrjesa. Při tym sobudźěłaćerjo wjelčeho monitoringa 1 100 jednotliwych zwěrjećow dopokazachu. Genetiske wuslědki přirunowachu fachowcy stajnje z tymi wjelka a psyka. W jednotliwych padach probow z druhich zwjazkowych krajow móžachu wědomostnicy hybridy dopokazać. Poslednjeho hybrida w Sakskej běchu w lěće 2003 zwěsćili, potajkim před 20 lětami.
Regiotydźeń: Zežiwidła domizny sej wotkryć
Móžeš so tydźeń dołho z regionalnych žiwidłow zežiwjeć? K tomu su mjenujcy ludźo kónčiny tele dny namołwjeni, dokelž přewjedźe so po cyłej Sakskej tak mjenowany Regio-tydźeń. To njetyje jenož klimje a wobswětej, ale wobdźělnicy podpěruja z tym tež zawody regiona. Dalše informacije k regionalnym žiwidłam a k zarjadowanjam Regio-tydźenja dóstanu zajimcy na Instagramje pod @regionale.lebensmittel.sachsen.
Organizatorojo tydźenja chcedźa ludźom nowe impulsy nastupajo swoje zežiwjenje posrědkować. Tohorunja móža sej wobdźělnicy zajimawe žiwidła domizny wotkryć. Jelizo sće přepozdźe wo Regio-tydźenju zhonili, móžeće sej wězo swójski tajki tydźeń zarjadować. Snano nańdźeće nowe žiwidła, kotrež nochcećepřichodnje hižo wšědny dźeń parować. Bianka Šeferowa
„Městnosć wikow je highlight“
W Kamjencu chcedźa přichodnu njedźelu, 17. septembra, kwasne wiki přewjesć. Bianka Šeferowa je so z organizatorku zarjadowanja Anne Hasselbach rozmołwjała.
Wy wabiće ze sloganom „Wosebite kwasne wiki we Łužicy“ – Čehodla je zarjadowanje tajke wosebite?
A. Hasselbach: Rady we Łužicy bydlu a wjetšina mojich sobuwojowarjow je tež z Kamjenca abo wokoliny. Zarjadowanje ma regionalny a swójbny raz kónčiny wotbłyšćować, a to na městnosći, kotrež dołho kedźbnosć njeměješe. Chcemy zaso zajim a hódnoćenje za historisku městnosć – bywšu kupjel „Baderei“ zbudźić. Ja sym woprawdźe jara romantiska a měnju, zo je kupjel městno wěčneje lubosće.
Wotměja so tajke wiki prěni raz?
A. Hasselbach: Koncept zarjadowanjow do toho je Sylvia Stephan z Kamjenskeho wobchoda „hautnah“ za spódnju drastu iniciěrowała. Po wjacelětnej přestawce sym ja takrjec „kwěćel njewjesty popadnyła“ a nowy koncept wuwiła. Kamjenc je prosće město, hdźež móžeš so zalubować a woženić!
Kajka je nalada mjez wustajerjemi?
Tradicije sej zachowaja a so nowemu přiwobroćeja
Budyšin (CS/SN). Tradicija a moderna stej wobłukaj, kotrejž rjemjeslnicy wobknježa. K tradicijam słuša, zo so wučomnicy z wukubłanja wuwjazaja. Tak bě tomu minjeny pjatk w Budyskim Němsko-Serbskim ludowym dźiwadle. W běhu ceremonije tam chorhoje rjemjeslniskich zjednoćenstwow zmawowachu, wosebitu křinju wočinjachu a swěčku zaswěćichu. Ze symboliskim aktom zamołwići wučomnikow z wukubłanja wuwjazachu.
Wrota k jězorinje móža přetwarić
Rań (SN/BŠe). Přetwar bywšeje centrale mjezynarodneje wustajeńcy za twarstwo (IBA) w Ranju (Großräschen) móže pokročować. Nastać ma tam campus za turizm, dźěło, kubłanje, wědomosć a kulturu. We wobłuku prěnjeho twarskeho wotrězka přetwara IBA-terasow je nowy wopytowarski centrum nastał. Za druhi twarski wotrězk je braniborska ministerka za infrastrukturu a krajne planowanje Kathrin Winkler (SPD) wčera zdźělenku wo dalšim spěchowanju we wobjimje 11,1 milionow eurow Rańskemu měšćanosće Thomasej Zenkerej (SPD) přepodała. Město IBA terasy při Rańskim jězoru wobhospodarja. Pjenjezy su z hornca strukturnych srědkow, kotryž zwjazkowe knježerstwo k dispoziciji staja. Nětko móža twarjenje 1 do 3 na IBA terasach přetwarić.
„Město wuwiwa so k wrotam Łužiskeje jězoriny. Z přistawom, hotelom a z terasami je Rań prěnja adresa za ludźi, kotřiž z wokoliny abo z daloka přichadźeja“, ministerka wuzběhny. Wuspěšne lěta mjezynarodneje twarskeje wustajeńcy wot lěta 2000 do 2010 naslědnje skutkuja. „Regionej běše wustajeńca motor.“
