Berlin (SN/JK). Plany k zniženju wustorkowanja wuhlikoweho dioksida (CO2) z łužiskich milinarnjow so po móžnosći předźěłaja. To je wuslědk zetkanja načolnych politikarjow srjedu wječor w Berlinje. Po informacijach z knježerstwowych kruhow je hospodarski minister Sigmar Gabriel (SPD) wot zwjazkoweje kanclerki Angele Merkel (CDU) dóstał nadawk, nowy­ plan k zniženju wupuchow CO2 předpołožić. Po informacijach sćelaka MDR dźe při tym nimo dodźerženja klimoškitnych zaměrow wo zachowanje dźěłowych městnow we łužiskich milinarnjach a wuhlowych jamach.

Hospodarski minister Sigmar Gabriel budźe přichodne dny z hospodarskimi ministrami zwjazkowych krajow kaž tež dźěłarnistwami a zawodnymi radami wo móžnych změnach diskutować. Šef SPD je ke kompromisam a přilubjenjam zwólniwy.

Budyšin/Berlin (SN/JK). Za dźensa wječor je kanclerka Angela Merkel (CDU) na brunicowy wjeršk do Berlina přeprosyła. Mjez druhim póńdźe wo hižo dlěje diskutowany popłatk za stare milinarnje w zwisku z němskimi klimoškitnymi zaměrami. Hač powjedźe wjeršk k nowym dopóznaćam a so hižo raz korigowane ličby hospodarskeho ministra Sigmara Gabriela (SPD) dale změnja, njeje wěste.

Dotalne ličby njejsu kmane, potrjechenych we Łužicy změrować. Łužiska wobwodna nawodnica dźěłarnistwa hórnistwo, chemija a energija Ute Liebsch widźi to takle:„Z nowymi namjetami njeje pokuta za stare milinarnje hišće z blida. Strach wo tysacy dźěłowych městnow w milinarnjach a jamach dale wobsteji.“ Podobnje posudźuje René Šuster, čłon braniborskeho brunicoweho wuběrka. „Redukowanje wupucha wuhlikoweho dioksida ma so na cyłu Němsku rozdźělić. Tohodla njeliču z tym, zo so milinarnje zrazom wšitke ze syće wozmu. Skerje dyrbjeli so potrjechene bloki poměrnje jedyn po druhim wotšaltować, štož by strukturnu změnu wolóžiło.“ Hač k tomu dźensa rozsud padnje?