Zyma so bliži a z tym čas tepjenja. Nic jenož w bydlenjach, ale tež w běrowach, dźěłarnjach a domjacnosćach budu za dobru atmosferu trěbne přijomne abo znajmjeńša dosahace temperatury. Tež w ćmě njebudźe nichtó sedźeć chcyć a ćopłu jěsć chce kóždy tež rady měć. K tomu je a budźe milina trěbna.
Tučasne politiske wusměrjenja a z tym zwisowace wukazy a postajenja zwjazkoweho knježerstwa wšak so njehodźa za to, być optimist.
Naprawy stata dosćahnu wobydlerjow na wšelake wašnje. Kak z wyšimi płaćiznami za milinu a tepjenje wobchadźeja, je z wulkeho dźěla wot socialneho stawa a dochodow jednotliwcow a swójbow wotwisne. Tomu je tež na wjeskach w Budyskim a Zhorjelskim wokrjesu tak.
Ći jedni činja sej wulke hłowułamanje wo tym, kak měli wysoke zličbowanki za milinu zapłaćić, mjeztym, zo druzy scyła na to njemysla, so z tym zaběrać.
Dźěłowe wiki we wuchodnej Sakskej maja dale swobodne kapacity. To je konkluzija z rozprawy za měsac september, kotruž bě Budyska wotnožka Zwjazkoweje agentury za dźěło minjeny pjatk předstajiła.
Choćebuz (SN/BŠe). Brunicowy koncern Łužiska energija a milinarnje (LEAG) zahaji puć do noweje doby. Tak chcedźa tam přichodnje na wobnowjomne energije sadźić město wuhla. Tole připowědźi nawoda předsydstwa Choćebuskeho koncerna Thorsten Kramer minjeny štwórtk na wuchodoněmskim energijowym forumje w Lipsku (SN informowachu). Po jeho wuprajenjach chcedźa wudobywanje brunicy we Łužicy hač do lěta 2030 zakónčić. To je wosom lět prjedy hač je brunicowa komisija wobzamknyła. Město toho ma we Łužicy najwjetši centrum za wobnowjomne energije Němskeje nastać. Thorsten Kramer mjenuje centrum „GigawattFactory“, kotraž dyrbi z wukonom sydom gigawattow něhdźe štyri milionow domjacnosćow z milinu zastarać. „Gigawattowa fabrika zwjazuje inowatiwne składowanske móžnosće, zeleny wodźik a za přichod wuhotowane milinarnje, kotrež wobswětej přihódnu energiju produkuja. To je cyle nowa kwalita, ludźi wěsće z energiju zastarać. Tak budźemy hladajo na energijowu změnu z přikładom“, je sej nawoda předsydstwa wěsty.
Hamor (AK/SN). Bjerwałdski jězor słuša najwoblubowanišim wulětnišćam po cyłej Sakskej. To je online-naprašowanje internetneho portala wunjesło. „Smy z informacije přewšo zwjeseleni“, rjekny Hamorski měšćanosta Hendryk Balko (Wolerske zjednoćenstwo Hamor) na njedawnym posedźenju měšćanskeje rady. Lětuša kupanska sezona je drje zakónčena, tola hač do 31. oktobra móža so wuchodźowacy a při jězorje sportowacy hišće zjawne nuzniki wužiwać. To potrjechi sanitarne připrawy w turistiskim informaciskim centrumje „Bjerwałdski jězor“ při Hamorskim přibrjohu, při wuchowanskej straži při Klětnjanskim brjoze, wopytowarske parkowanišćo Delni Wujězd a surfowanski přibrjóh we wobkruhu brjoha Łućo. Wone su srjedu hač do njedźele wot 10 do 16 hodź. přistupne. Hendryk Balko dźakowaše so čestnohamtskim pomocnikam, wohnjowym wobornikam, wódnej straži Němskeho čerwjeneho křiža, kotrež běchu so za čas kupanskeje sezony wo wočerstwjenišćo starali.
Najwjetši Budyski industrijny zawod, zhotowjer wagonow Alstom, so w lěće 1846 jako železowa lijernja a dźěłarnja mašinow załoži. Předewzaće móhło potajkim w lěće 2021 swoje 175. narodniny swjećić. Koronapandemije dla pak tole njemóžachu a to sobotu, 17. september nachwatachu. Na něhdźe 300 000 kwadratnych metrach wulkej ležownosći mjez Fabrikskej dróhu a Sprjewju su sobudźěłaćerjo twornje na dnju wotewrjenych duri wjele wopytowarjow witali. Wjace hač 4 600 hosći su tam naličili.
Grodk (JoS/SN). Mjeztym 20. wukubłanske a studijne wiki na powołanja orientowanej wyšej šuli w Grodku běchu zańdźenu sobotu wulki wuspěch. A to wosebje za zajimowanych šulerjow, kotřiž dyrbja so w swojim poslednim šulskim lěće za powołanje rozsudźić kaž tež za předewzaća, kotrež so prezentowachu. Wobjim poskitkow sahaše wot rjemjesła přez srjedźny staw hač k we Łužicy a zwonka njeje zasydlenym wulkim zawodam. K tomu podachu hišće mnohe a najwšelakoriše poskitki ze zarjadnistwow. Z rozmołwow ze zastupjerjemi firmow wuchadźa, zo we wšěch branšach wučomnikow trjebaja, tež pola policije a cłownistwa. Studijne móžnosće rozłožichu zajimcam zastupjerjo agentury za dualny studij Braniborska, Powołanska akademija Sakska a BTU Choćebuz-Zły Komorow.
Přezjednje a chwalobnje wuprajichu so wustajerjo wo wuběrnej organizaciji wukubłanskeje bursy. Dźeń bě derje wuzwoleny, wšako móžachu so swójby wobdźělić a rozhladować. Tak přichadźachu w bohatej ličbje a so zaměrnje wobhonichu.
Nic jenož w sakskim dźělu Łužiskeje jězoriny so wjele hiba, ale tež w braniborskim. Tam zwěsćichu lětsa samo nowy trend, rozłoži zastupjer zaměroweho zwjazka Braniborska Martin Wolf.
Hamor (AK/SN). Za Łužisku jězorinu w Braniborskej so w lěće 2022 nowy dowolowy trend wotbłyšćuje. „Ludźo su tu dlěje wostali“, podšmórny nawoda wobłuka infrastruktury zaměroweho zwjazka Łužiska jězorina Braniborska Martin Wolf na njedawnym posedźenju w Hamorje. Na zhromadźiznje susodneho zaměroweho zwjazka wón wo aktualnym wuwiću rozprawješe.
Před dwěmaj lětomaj zliči zaměrowy zwjazk braniborskeho dźěla jězoriny ke kóncej awgusta 47 200 wopytowarjow z cyłkownje 208 158 přenocowanjemi. Lětsa bě jich w samsnym času 46 581 hosći z 217 679 přenocowanjemi. Ličba wopytowarjow je wo 1,3 procentow woteběrała. Ličba přenocowanjow pak je wo 4,57 procentow stupała. Hač trend dale tajki wostanje, je njejasne.