Domowina wo sorabistice w Lipsku jednała

Lipsk (SN/mb). Kritiski list studentow towarstwa „Sorabija Lipsk“ nastupajo Institut za sorabistiku na Lipšćanskej uniwersiće njeje jenož dosć diskusijow zahibał. Tež zamołwići w Radźe za serbske naležnosće Sakskeje a w Domowinje su so gratu přimali a so palacej tematice wěnuja. Wčera staj so předsyda Domowiny Dawid Statnik, kotryž je tež z čłonom serbskeje rady, a kubłanska referentka třěšneho zwjazka Katrin Suchec-Dźisławkowa w Lipsku z prorektorom uniwersity za wuwiwanje talentow, prof. Rogerom Gläserom, a z dekanom filologiskeje fakulty, prof. Beatom Siebenhaarom, na rozmołwu wo přichodźe sorabistiki zešłoj. Zastupjerjej Domowiny staj na njedawnu rozmołwu předsydy serbskeje rady, Marka Sucheho, a radźićela Juliana Nyče z prof. Siebenhaarom a jednaćelskim direktorom Instituta za sorabistiku, prof. Edwardom Wornarjom, nawjazowałoj.